სახალხო აჯანყება - 100 წლისთავი - შეხვედრა როსტომ ჩხეიძესთან და გიორგი კეკელიძესთან
1924 წლის სახალხო ეროვნული აჯანყებიდან 100 წელი გავიდა —უმნიშვნელოვანესი თარიღი საქართველოს ისტორიაში.
ამ მნიშვნელოვანი მოვლენის აღსანიშნავად, გამომცემლობა „პალიტრა L“-მა ცნობილი ქართველი მწერლისა და ლიტერატორის, როსტომ ჩხეიძის მხატვრულ-დოკუმენტური წიგნი - „შავი ჩოხა“ გამოსცა. წიგნი აჯანყების გმირისა და ეროვნული წინამძღოლის, ქაქუცა ჩოლოყაშვილის ცხოვრებას ეძღვნება.
„შავი ჩოხა“ „ბიბლუსის“ წიგნის მაღაზიებში 9 სექტემბრიდანაა ხელმისაწვდომი. წიგნის წარდგენა კი 24 სექტემბერს, მარნეულის დემოკრატიული ჩართულობის ცენტრში გაიმართება. ღონისძიებას გაუძღვებიან თავად წიგნის ავტორი, როსტომ ჩხეიძე და მწერალი გიორგი კეკელიძე.
როსტომ ჩხეიძის ბიოგრაფიული რომანი „შავი ჩოხა“ აჯანყების წინამძღოლის, ქაიხოსრო (ქაქუცა) ჩოლოყაშვილის ცხოვრებას ეფუძნება.
ჯანსუღ ჩარკვიანმა წიგნი ასე შეაფასა: „ეს არის წიგნი, რომელიც სამ დროს - წარსულს, აწმყოსა და მომავალს აერთიანებს“.
ავტორი თვალსაჩინოდ აღწერს აჯანყების მონაწილეებსა და მის მთავარ გმირს, ქაქუცა ჩოლოყაშვილს, და რეალისტურად წარმოგვიდგენს ბოლშევიზმის დამანგრეველ ბუნებასა და იმ ზიანს, რაც მან საქართველოს მიაყენა.
როსტომ ჩხეიძე ქართული ლიტერატურისა და მეცნიერების თვალსაჩინო ფიგურაა. მისი შემოქმედება მოიცავს მონოგრაფიებს, ლიტერატურულ-კრიტიკულ სტატიებს, ესეებს, პიესებსა და მხატვრულ-დოკუმენტურ ნაწარმოებებს. განსაკუთრებით აღსანიშნავია მისი 29 ბიოგრაფიული რომანი, რომლებიც XIX-XX საუკუნეების საქართველოს საზოგადოებრივ, პოლიტიკურ და ლიტერატურულ-კულტურულ ცხოვრებას ეხმიანება.
მარნეულის დემოკრატიული ჩართულობის ცენტრში გამართული ღონისძიება იქნება ქაქუცა ჩოლოყაშვილის მემკვიდრეობისა და საქართველოს ეროვნული სუვერენიტეტისადმი პატივისცემის კიდევ ერთი გამოხატულება.
მარნეულის დემოკრატიული ჩართულობის ცენტრი; 16:00 საათი