"მესიჯი მიიღეს, რომელიც თითქოს მათი ლიდერებისგან მოდიოდა" - როგორ დაიგეგმა საუკუნის სპეცოპერაცია და რატომ იყენებს "ჰეზბოლა" პეიჯერებს
ისრაელის სავარაუდო ოპერაციის ფარგლებში, ლიბანში "ჰეზბოლას" რამდენიმე ასეული წევრის პეიჯერები აფეთქდა. გავრცელებული ინფორმაციით, პორტატული პეიჯერების გატეხა და მათი აფეთქება ისრაელმა მოახერხა. ლიბანის ოფიციალურმა პირებმა განაცხადეს, რომ დაიღუპა სულ მცირე 12 ადამიანი, მათ შორის ორი ბავშვი. დაშავებულია დაახლოებით 2800.
აფეთქებები დაიწყო ლიბანის დედაქალაქ ბეირუთში და ქვეყნის რამდენიმე სხვა რაიონში სამშაბათს, ადგილობრივი დროით 15:45 საათზე (13:45 BST). მოწმეებმა განაცხადეს, რომ დაინახეს კვამლი, რომელიც ხალხის ჯიბეებიდან ამოდიოდა, ასევე გაისმა აფეთქების ხმა.
ინტერნეტში გავრცელებულ ერთ-ერთ ვიდეოში ჩანს, რომ მოწყობილობა მამაკაცს შარვლის ჯიბეში აუფეთქდა. Reuters-ის ინფორმაციით, აფეთქებები დაახლოებით 1 საათის განმავლობაში გაგრძელდა. გავრცელებული ინფორმაციით, დაახლოებით 15:30 საათზე, პეიჯერებმა მესიჯი მიიღეს, რომელიც თითქოს ჰეზბოლას ლიდერებისგან მოდიოდა. აფეთქებამდე კი მათ რამდენიმე წამით ხმოვანი სიგნალის გამოცემა დაიწყეს.
- რა გახდა აფეთქების მიზეზი
ზოგიერთი ექსპერტი ვარაუდობს, რომ აფეთქება პეიჯერების ბატარეების გადახურებამ გამოიწვია. ზოგის თქმით, ეს ნაკლებად სავარაუდოა, რადგან აფეთქებების კადრები არ შეესაბამება ბატარეების გადახურებას.
ამერიკელი და სხვა მაღალჩინოსნების მიხედვით, ისრაელმა ლიბანში იმპორტირებული პეიჯერების პარტიაში ფეთქებადი ნივთიერება დამალა.
ამბობენ იმასაც, რომ თავდასხმა განხორციელდა მიწოდების ჯაჭვის მეშვეობით - მიწოდების ჯაჭვი ეწოდება კომპანიის და მისი მიმწოდებლების შეკავშირებულ სისტემას, რომელიც ემსახურება პროდუქციის წარმოებას და მომხმარებლამდე მიტანას, ანუ ნედლეულის მოპოვების, მასალის თუ პროდუქციის წარმოების, გადაზიდვის, დასაწყობების და გასაღების მთელ პროცესს და მასში ჩართულ ორგანიზაციებსა თუ ადამიანებს. კომპანიის საქმიანობიდან გამომდინარე, მისი მიწოდების ჯაჭვები სხვადასხვა მასშტაბისა და კონფიგურაციის იქნება.
BBC-სთან საუბრისას, ბრიტანული არმიის საბრძოლო იარაღის ერთ-ერთმა ყოფილმა ექსპერტმა, ვარაუდი გამოთქვა, რომ მოწყობილობები შესაძლოა დისტანციური სიგნალით გააქტიურებულიყო.
- რა არის ცნობილი მსხვერპლის შესახებ?
ჰეზბოლასთან დაახლოებულმა წყარომ AFP-ს განუცხადა, რომ დაღუპულთაგან ორი ჰეზბოლას ორი დეპუტატის ვაჟია. მათ ასევე განაცხადეს, რომ მოკლულია ჰეზბოლას წევრის ქალიშვილი. დაშავებულებს შორის იყო ლიბანში ირანის ელჩი მოჯთაბა ამანი. ირანული მედიის ცნობით, მის სიცოცხლეს საფრთხე არ ემუქურება.
„დაზიანებების უმეტესი ნაწილი სახეზე, განსაკუთრებით თვალების არეშია მიყენებული. რამდენიმე შემთხვევაში საჭირო გახდა ხელის ამპუტაცია. დაშავებულთა უმეტესობა სამოქალაქო ტანსაცმელში იყო გამოწყობილი, ამიტომ ჯერჯერობით შეუძლებელია იმის თქმა, ეკუთვნოდა თუ არა რომელიმე მათგანი ჰეზბოლას" - განაცხადა ლიბანის საზოგადოებრივი ჯანდაცვის მინისტრმა ფირას აბიადმა.
- ვინ არის პასუხისმგებელი?
მომხდართან დაკავშირებით ჯერჯერობით პასუხისმგებლობა არავის აუღია - თუმცა ლიბანის პრემიერ-მინისტრი და ჰეზბოლა ისრაელს ადანაშაულებენ.
პრემიერ-მინისტრ ნაჯიბ მიქათის თქმით, აფეთქება წარმოადგენს "ლიბანის სუვერენიტეტის სერიოზულ დარღვევას". ქვეყნის უსაფრთხოების წყარომ მომხდარში ისრაელის სადაზვერვო სააგენტო Mossad-ი დაადანაშაულა.
"ეს მოღალატე და კრიმინალი მტერი აუცილებლად მიიღებს თავის სამართლიან სასჯელს ამ აგრესიისთვის, მიუხედავად იმისა, მოელის თუ არა ამას", - განაცხადა მიქათმა.
ისრაელის ოფიციალური პირები ამ ბრალდებებზე კომენტარს არ აკეთებენ, მაგრამ ანალიტიკოსების უმეტესობა თანხმდება, რომ თავდასხმის უკან სწორედ ის დგას.
- რატომ იყენებს ჰეზბოლა პეიჯერებს?
ჰეზბოლაში პეიჯერებს მრავალი წელია იყენებენ, რისი მიზანიც ერთმანეთისთვის გაგზავნილი მესიჯების გატეხის გართულებაა.
ლიბანის უშიშროების ოფიციალურმა წარმომადგენელმა როიტერს განუცხადა, რომ ქვეყანაში ხუთი თვის წინ დაახლოებით 5000 პეიჯერი შემოიტანეს. აფეთქებული პეიჯერების ფრაგმენტებზე არსებული ეტიკეტები პეიჯერის მოდელზე მიუთითებს, სახელწოდებით Rugged Pager AR-924 - მისი მწარმოებელი ტაივანური კომპანია Gold Apollo-ა. კომპანიის დამფუძნებელი ჰსუ ჩინგ-კუანი მომხდარში მონაწილეობას უარყოფს.
- გამწვავდება თუ არა კონფლიქტი ისრაელსა და "ჰეზბოლას" შორის?
შემთხვევამდე რამდენიმე საათით ადრე, ისრაელის უსაფრთხოების კაბინეტმა ჩრდილოეთში ჰეზბოლას თავდასხმების შედეგად დევნილი 60,000 მოსახლის უსაფრთხო დაბრუნება ომის ოფიციალურ მიზნად აქცია.
”უსაფრთხოების კაბინეტმა განაახლა ომის მიზნები: ჩრდილოეთის მაცხოვრებლების უსაფრთხოდ დაბრუნება სახლებში”, - განაცხადეს პრემიერ-მინისტრის ოფისში - "ისრაელი გააგრძელებს მოქმედებას ამ მიზნის განსახორციელებლად." ისრაელმა ადრეც არაერთხელ განაცხადა, რომ ჰეზბოლას "საზღვრიდან" განდევნის მიზნით, სამხედრო ოპერაციას დაიწყებდა. 7 ოქტომბერს, ღაზაში ისრაელსა და ჰამასს შორის ომის დაწყების დღიდან, საზღვარზე თითქმის ყოველდღიური ცეცხლის გაცვლა ხდება. ლიბანის ჯანდაცვის სამინისტროს ცნობით, ოქტომბრიდან მოყოლებული სულ მცირე 589 ადამიანი დაიღუპა - მათი უმრავლესობა ჰეზბოლას მებრძოლია.
დაძაბულობის ფონზე არსებობს შიში, რომ სიტუაცია შეიძლება კონტროლიდან გამოვიდეს. აფეთქებების შემდეგ, ჰეზბოლა ისრაელისგან პასუხს ითხოვს და მუქარით მიმართავს.
წაიკითხეთ ასევე: