"გთხოვთ, გაიტანოთ ნივთები, მიხედოთ ახლობლებს და საკუთარ თავს" - საგანგებო მდგომარეობა პოლონეთში: რიგ ქალაქებში მოსახლეობას ტერიტორიის დატოვებისკენ მოუწოდებენ
პოლონეთის ქალაქ ნისას მერმა, 44 000-მდე მოსახლეს, წყალდიდობის გამო ქალაქის დატოვებისკენ მოუწოდა. არსებობს რისკი. რომ მიმდებარედ არსებული ტბიდან წყლის მასამ დასახლებულ პუნქტს კიდევ უფრო დიდი ზიანი მიაყენოს. ადგილობრივი ხელისფულება ევაკუაციის დაწყებამდე მოქალაქეებს მოუწოდებს მაღალ ადგილებს შეაფარონ თავი.
პოლონეთში, ევროპის ზოგიერთი სხვა ქვეყნის მსგავსად, უკვე რამდენიმე დღეა, წყალდიდობას ებრძვიან. ევროპის მასშტაბით, სტიქიის შედეგად დაღუპულთა რიცხვმა 16-ს მიაღწია. მათ შორის, შვიდი ადამიანი რუმინეთში დაიღუპა. მსხვერპლი იყო ავსტრიაში, ჩეხეთში და პოლონეთშიც. სინოპტიკოსები წყალდიდობის კიდევ უფრო დიდ მასშტაბს პროგნოზირებენ.
- "გთხოვთ, გაიტანოთ თქვენი ნივთები, მიხედოთ ახლობლებს და საკუთარ თავს. თუ ქალაქის დატოვებას ვერ ახერხებთ, უმჯობესია, შენობის ზედა სართულზე გადახვიდეთ, რადგან წყალი რამდენიმე მეტრის სიმაღლის შეიძლება იყოს, რაც ნიშნავს, რომ მთელი ქალაქი დაიტბორება,“ – აცხადებს პოლონეთის ქალაქ ნისას მერი.
პოლონეთის პრემიერ-მინისტრმა, დონალდ ტუსკმა, განაცხადა, რომ ქვეყანაში წყალდიდობით დაზარალებულთათვის ერთი მილიარდი ზლოტი გამოიყოფა და პოლონეთი ასევე მიმართავს ევროკავშირის დახმარების ფონდებს.
- მიუხედავად იმისა, რომ ზოგიერთ რეგიონში სიტუაცია სტაბილურდება, სხვა ადგილებში უფრო მეტი საფრთხისთვის ემზადებიან შტორმ "ბორისის“ შედეგად გამოწვეული წყალდიდობის გამო.
გარდა ამისა, პოლონეთის სამხრეთ-დასავლეთ მდებარე ქალაქის პაჩკოვის მერმა მოსახლეობას მოუწოდა, რომ სახლები დატოვონ, რადგან ახლომდებარე წყალსაცავიდან წყალი გადმოვიდა, რაც ქალაქს საფრთხეს უქმნიდა.
პოლონეთის სხვა რეგიონებში წყლის დონე ნელ-ნელა იკლებს. კლოდზკოს მერმა, მიხალ პიშკომ, პოლონურ მედიასთან განაცხადა, რომ წყლის დონე მკვეთრად შემცირდა და ვარაუდობენ, რომ ყველაზე მძიმე უკვე წარსულში დარჩა.
- წყალდიდობის გამო პოლონეთის მთავრობამ საგანგებო მდგომარეობა გამოაცხადა.
- სად წავა შტორმი "ბორისი“ შემდეგ?
უახლოეს დღეებში ავსტრიაში, ჩეხეთსა და სამხრეთ-აღმოსავლეთ გერმანიაში კვლავ იწვიმებს. თუმცა, შესაძლოა რამდენიმე დღე მაინც დასჭირდეს წყლის დონეების შემცირებას, მაგრამ ცენტრალურ ევროპაში უახლოეს დღეებში უკეთესი და მშრალი ამინდებია მოსალოდნელი.
შტორმი "ბორისი", ახლა უფრო იტალიის სამხრეთით გადაიწევს, სადაც ის კიდევ უფრო გაძლიერდება და მეტეოროლოგები აქაც წყალდიდობას პროგნოზირებენ.
ნახეთ ასევე: