5-დღიანი "კოსმოსური გასეირნება" დასრულებულია: მილიარდერი აიზეკმანი და სხვა ტურისტები დედამიწას დაუბრუნდნენ - რატომ მიიჩნევა ეს მისია ისტორიულად?
SpaceX-ის Polaris Dawn-ის ეკიპაჟი ორბიტაზე ხუთდღიანი მოგზაურობის შემდეგ, რაც მსოფლიოში პირველ კომერციულ "კოსმოსურ გასეირნებას" წარმოადგენდა, დედამიწაზე დაბრუნდა. კაფსულა Dragon-ი, ადგილობრივი დროით, 03:37-ზე, ფლორიდის სანაპიროსთან დაეშვა, რაც SpaceX-მა პირდაპირ ეთერში გადასცა.
"Dragon-ის დაშვება დადასტურებულია! კეთილი იყოს თქვენი დაბრუნება დედამიწაზე", - განაცხადა SpaceX-მა. აშშ-ის კოსმოსური სააგენტო NASA-ს განცხადებით, ეს მისია წარმოადგენდა "უზარმაზარ წინ გადადგმულ ნაბიჯს" კომერციული კოსმოსური ინდუსტრიისთვის.
დედამიწის ატმოსფეროში შესვლისას, კოსმოსური ხომალდის ტემპერატურამ 1 900°C-ს მიაღწია, რაც ჰაერში დაახლოებით 27,000 კმ/სთ სიჩქარით მოძრაობისას ინტენსიური წნევითა და ხახუნით იყო გამოწვეული.
ოთხკაციანი სამოქალაქო გუნდი, რომელსაც მილიარდერი ჯარედ აიზაკმანი აფინანსებდა და ხელმძღვანელობდა, კოსმოსში უფრო შორს გაფრინდა, ვიდრე ნებისმიერი სხვა ადამიანი ბოლო 50 წლის განმავლობაში.
აიზაკმანის გარდა, ეკიპაჟის წევრები იყვნენ სკოტ პოტიტი, აშშ-ის საჰაერო ძალების გადამდგარი პილოტი და SpaceX-ის თანამშრომლები: სარა გილისი და ანა მენონი.
აიზაკმანი და გილისი პირველი არაპროფესიონალები არიან, რომლებმაც ე.წ. კოსმოსური გასეირნება შეასრულეს, რაც სახიფათო მანევრია და ეკიპაჟის ხომალდიდან ღია კოსმოსში გასვლას გულისხმობს. ამ ფრენამდე ეს მხოლოდ სახელმწიფოს მიერ დაფინანსებული კოსმოსური სააგენტოების ასტრონავტებს უცდიათ.
პირდაპირ ეთერში გადაცემულმა კადრებმა აჩვენა, როგორ გამოვიდა ეკიპაჟის ორი წევრი თეთრი კაფსულიდან დედამიწიდან 700 კმ დაშორებით ყოფნისას.
კოსმოსური გასეირნების დროს დედამიწასთან საუბრისას, აიზაკმანმა თქვა:
"სახლში ყველას ბევრი საზრუნავი გვაქვს, მაგრამ აქედან ყველაფერი სრულყოფილ სამყაროს ჰგავს".
რადგან Dragon-ს არ აქვს საჰაერო საკეტი, ეკიპაჟი "კოსმოსური გასეირნების" დროს კოსმოსის ვაკუუმში იყო. ეს კოსმოსური გასეირნება, რომელიც ისტორიაში დედამიწიდან ყველაზე შორს განხორციელდა, შესაძლებელი გახდა ინოვაციური ასტრონავტის კოსტიუმების წყალობით, რომლებიც ახალი ტექნოლოგიითაა აღჭურვილი.
ხუთი დღის განმავლობაში ეკიპაჟმა ჩაატარა 40-ზე მეტი ექსპერიმენტი, მათ შორის - გამოკვლევები კოსმოსური მისიების გავლენის შესახებ ადამიანის ჯანმრთელობაზე და Dragon ხომალდსა და SpaceX-ის Starlink თანამგზავრს შორის თანამგზავრული ლაზერული კომუნიკაციის ტესტირება.
გილისმა, რომელიც გაწვრთნილი მევიოლინეა, თან წაიღო თავისი ინსტრუმენტი და დედამიწაზე მყოფ ორკესტრებთან ერთად შეასრულა Rey’s Theme ფილმიდან "Star Wars: The Force Awakens".
მისი შესრულება SpaceX-ის Starlink-ის გამოყენებით გადაიცა, რაც კოსმოსში კავშირის უზრუნველსაყოფად თანამგზავრული ქსელის პოტენციალის ერთგვარი ტესტი იყო.
მისია ისტორიაში შევიდა მაქსიმალური სიმაღლის - 1 400 კმ-ის მიღწევით, რაც 1972 წელს ბოლო "აპოლოს" მისიის შემდეგ, ყველაზე შორი მანძილია, სადამდეც ადამიანი გაფრენილა. წყარო
იხილეთ ასევე: