“ომთან ერთად ცხოვრება ვისწავლეთ” - უკრაინის მოდის კვირეული დაბრუნდა
მას შემდეგ, რაც 2022 წელს რუსეთის შეჭრამ ქვეყანა ომის პირობებში ჩააყენა, უკრაინის მოდის კვირეული კიევში პირველად ჩატარდა. მოდის ჩვენების დაწყებამდე მაყურებელმა წუთიერი დუმილით პატივი მიაგო უკრაინელ ჯარისკაცებს, რომლებიც ბრძოლის ველზე დაიღუპნენ. ამის შემდეგ განათება ჩაქრა, მუსიკა ჩაირთო და მოდელები პოდიუმზე გამოჩნდნენ, რაც დამსწრეებმა მობილურებით გადაღებულ ფოტოებსა და ვიდეოებში აღბეჭდეს.
უკრაინაში ომის ფონზე ყოველდღიური ცხოვრება მაინც გრძელდება. კიევში თეატრები და ოპერები ღიაა და ქალაქის რესტორნები და ბარებიც აქტიურად მუშაობს შუაღამემდე, ვიდრე კომენდანტის საათი დაიწყება. შავი ზღვის სანაპიროებიც სავსეა დამსვენებლებით, თუმცა, უკრაინის მოდის კვირეული აქამდე შეჩერებული იყო და ახლა პირველად გაიმართა.
ღონისძიება კიევში, სხვადასხვა ლოკაციაზე სხვადასხვა დიზაინერის ჩვენებებს მოიცავს. ერთ-ერთი ყველაზე გამორჩეული ჩვენება დიზაინერ ივან ფროლოვის ნამუშევრებს წარმოადგენდა, შოუს თემატიკა კი უკრაინულ ზღაპარზე იყო დაფუძნებული. ჩვენება კიევში ელექტრონული მუსიკის ერთ-ერთ ყოფილ კლუბში გაიმართა, სადაც სტუმრებს ვიდეოინსტალაციებით, ცოცხალი მუსიკითა და ემოციური მხატვრული ნამუშევრებით გაჯერებული საიდუმლო კონცეფცია ელოდათ.
უკრაინელი დიზაინერები ცდილობენ, თავიანთ ნამუშევრებში ომის გავლენები ასახონ. მაგალითად, კოსტიანტინ ომელიამ თავისი კოლექცია იმ ხმელ ყვავილებზე დააფუძნა, რომელიც 2022 წლის მაისში, კიევში, თავის სტუდიაში დაბრუნების შემდეგ ნახა. ასევე, ქსენია შნაიდერმა შექმნა პიჯაკი ძველი ჰალსტუხებისგან, რადგან ომის დროს მამაკაცებს ჰალსტუხების ტარების დრო არ აქვთ და ძირითადად სამხედრო ან ყოველდღიური ტანსაცმლით იმოსებიან.
მიუხედავად იმისა, რომ ზოგიერთი კოლექცია ომის ყოველდღიური რეალობისგან შორსაა, ომმა მოდის ინდუსტრიაზე დიდი გავლენა მოახდინა. დიზაინერი რუსლან ბაგინსკი, რომელიც ძირითადად ქუდების წარმოებაზე მუშაობს, აღნიშნავს, რომ ომი მის შემოქმედებით პროცესსაც შეეხო.
“რა თქმა უნდა, ომში სამხედროების გაწვევამ ჩემს შემოქმედებაზე მოახდინა გავლენა. ჩემი ნახევარძმა ფრონტის ხაზზე დაიღუპა", - აცხადებს დიზაინერი.
მაგრამ მისივე თქმით, ცხოვრება უკრაინაში გრძელდება.
"მეორე მსოფლიო ომის დროს, მოდის ინდუსტრია მუშაობდა - ლონდონში ხალხი იმოსებოდა და რესტორნებში დადიოდა. მსოფლიოში ყველას უნდა ესმოდეს, რომ ცხოვრება აქაც გრძელდება”, - აღნიშნავს ბაგინსკი.
უკრაინის მოდის კვირეულის აღმასრულებელი დირექტორის, ირინა დანილევსკას თქმით, კვირეულის მთავარი მიზანი უკრაინული დიზაინისა და შემოქმედების გლობალური პოპულარიზაციაა. რუსული აგრესიის შემდეგ, უკრაინაში უამრავმა ხელოვანმა განიცადა ახლებური კულტურული გააზრება და ბევრი მათგანი ცდილობს, მანამდე ნაწილობრივ უგულებელყოფილი ისტორია და ფოლკლორი შთაგონებისთვის გამოიყენოს.
კომპანია Gunia, რომელიც 2017 წელს დაარსდა, ტრადიციულ უკრაინულ თემებს ეხება. მათი შემოქმედება ხალხურ მოტივებზე დაფუძნებული სამოსისა და კერამიკის წარმოებას მოიცავს.
ბრენდის თანადამფუძნებელი, მარია გავრილიუკი ამბობს, რომ მსოფლიო ახლა იწყებს უკრაინული კულტურისა და უნიკალური ტექნიკის აღიარებას, რაც სამწუხაროდ, სწორედ ომის შედეგია.