გამოფენა ლუვრში, ინტერესი ვან გოგის მუზეუმიდან და მის შემოქმედებაზე შეყვარებული ამერიკელი მწერალი - "ყველაფერში ვხედავ ღმერთს და მის ხელს..."
"ქართველი დამთვალიერებელმა 2018 წელს გამიცნო, რასაც მოჰყვა საზღვარგარეთ კონკურსებსა და გამოფენებში მონაწილეობა, გამარჯვება. ინტერესი უცხოეთიდან, მათ შორის ამსტერდამის ვან გოგის მუზეუმიდან, რომელმაც თავის სოციალურ ქსელებში, ჩემი ნახატი ვან გოგის ნახატთან ერთად გამოაქვეყნა. ასევე 2019 წელს, ჩემი ორი ნახატი შეიძინა კანადის ოქროს მწარმოებელმა კომპანიამ თავისი დახურული კოლექციისთვის..." დიდი მუშაობისა და სხვადასხვა პოპულარულ პლატფორმებზე გამოჩენის შემდეგ, 2021 წელს, მივიღე კიდევ ერთი ღირსშესანიშნავი მოწვევა ლუვრის მუზეუმიდან, სადაც ჩემი ხარჯებით და გულშემატკივრების დახმარებით (რომლებმაც ნახატები შეიძინეს), მონაწილეობა მივიღე ოთხდღიან გამოფენაში..." - გვიყვება ახალგაზრდა მხატვარი ალექსანდრე ვაშაყმაძე რომლის შემოქმედება მსოფლიოში უამრავ ადამიანს აღაფრთოვანებს...
- ბატონო ალექსანდრე, მალე თქვენი ნამუშევრების გამოფენა იგეგმება საქართველოს ხელოვნების სასახლეში...
- დიახ... ამ წლის დასაწყისში, ხელოვნების სასახლიდან მივიღე პერსონალური გამოფენის მოწყობის შემოთავაზება. ორგანიზატორებთან მოლაპარაკების დროს გადაწყდა, რომ ექსკლუზიური ექსპოზიცია, ძირითადად, ახალი ნამუშევრებით იქნება წარმოდგენილი. ამასთანავე, დამთვალიერებელი იხილავს ტილოებსაც, რომლებიც სოციალურ პლატფორმებზეა ატვირთული და ბევრისთვის ნაცნობია, მაგრამ აქამდე არსად გამოფენილა... მთელი წლის დაძაბული მუშაობის შემდეგ, 7 სექტემბერს საზოგადოება ოცამდე ახალ ნამუშევარს გაეცნობა. გამოფენას ჰქვია "EXODUS” რაც სიმბოლურად, ჩემი შემოქმედების გარკვეული პერიოდიდან გამოსვლასა და ახალ ეტაპზე გადასვლაზე მიანიშნებს. ვიმედოვნებ, რომ ეს ტრანსფორმაცია ფერწერის თაყვანისმცემლებისთვის საინტერესო იქნება...
- რომ გაიხსენოთ კარიერის დასაწყისი, პირველი ნაბიჯები და ვან გოგის მუზეუმის დაინტერესება...
- ჩემი სამხატვრო კარიერა, დაიწყო 2015 წელს, როდესაც თბილისის სამხატვრო აკადემიიდან, "Life beyond tourism“ პროექტის ფარგლებში, სხვა სტუდენტებთან ერთად ფლორენციაში გამაგზავნეს, სადაც მხოლოდ ჩემმა ნამუშევრებმა გამოიწვიეს ღონისძიების ორგანიზატორებისა და დამსწრე საზოგადოების დიდი ინტერესი და რამდენიმე სერიოზული შემოთავაზებაც მივიღე. ეს ჩემთვის დიდი სტიმულის მომცემი გახდა. შემდეგი ეტაპი იყო პირველი პერსონალური გამოფენისთვის მზადება და ქართველი დამთვალიერებლისთვის თავის გაცნობა 2018 წელს, რასაც მოყვა საზღვარგარეთ კონკურსებსა და გამოფენებში მონაწილეობის მიღება, გამარჯვება. მათ შორის ამსტერდამის ვან გოგის მუზეუმიდან, რომელმაც თავის სოციალურ ქსელებში, ჩემი ნახატი ვან გოგის ნახატთან ერთად გამოაქვეყნა.
ასევე 2019 წელს, ჩემი ორი ნახატი შეიძინა კანადის ოქროს მწარმოებელმა კომპანიამ თავისი დახურული კოლექციისთვის...
- როგორც ვიცი, მიიღეთ ბიენალის პრეზიდენტის პირადი მოწვევა...
- 2020 წელს, ჩემთვის ერთ-ერთი ყველაზე სერიოზული შემოთავაზება მივიღე - მსოფლიოს ყველაზე გრანდიოზული და პრესტიჟული ფესტივალის, ფლორენციის ბიენალეს, დამფუძნებელმა და პრეზიდენტმა პასკალ სელონამ პირადად მიმიწვია ბიენალეზე, რომელზეც გარკვეული მიზეზების გამო ვერ წავედი. შემდეგში კიდევ ორი მოწვევა მომივიდა მისგან, მისი გუნდისგან. ბოლო ფესტივალი 2025 წელს ჩატარდება, რომელზეც აუცილებლად გავემგზავრები.
- როგორი იყო გამოფენა ლუვრში და მისი გამოხმაურებები?
- დიდი მუშაობისა და სხვადასხვა პოპულარულ პლატფორმებზე გამოჩენის შემდეგ, 2021 წელს, მივიღე კიდევ ერთი ღირსშესანიშნავი მოწვევა ლუვრის მუზეუმიდან, სადაც ჩემი ხარჯებით და გულშემატკივრების დახმარებით (რომლებმაც ნახატები შეიძინეს), მონაწილეობა მივიღე ოთხდღიან გამოფენაში. დამთვალიერებლებმა ღრმა ემოციები გამოხატეს ჩემს სტენდთან, განსაკუთრებით ერთი ახალგაზრდა ქალი დამამახსოვრდა, რომელიც დაახლოებით ნახევარი საათი ერთ-ერთ ნახატთან გაქვავებულივით იდგა. როდესაც მე და ჩემი მეუღლე მიზეზით დავინტერესდით, გვითხრა, რომ ეს ერთადერთი ნახატი იყო მთელ გამოფენაზე, რომელმაც მის სულში შეაღწია ... ბევრი მსგავსი კომენტარი და კომპლიმენტი მივიღე საქართველოში ჩამოსვლის შემდეგაც. პოტენციური მყიდველებიც გავიცანი, რომლებიც უკვე გამოფენის შემდეგ დამიკავშირდნენ, მთლიანად გაეცნენ ჩემს იმჟამინდელ შემოქმედებას და ნახატები შეიძინეს. ამ ინფორმაციის გათვალისწინებით, ჩემმა პარიზელმა კურატორმა, დამფუძნებელი ჯგუფის სახელით, მომავალ გამოფენებში და ღონისძიებებში მონაწილეობა შემომთავაზა, კერძოდ 2023 წელს, ნიუ იორკში artsy გალერეაში გამართულ გამოფენაში, მაგრამ, მეუღლის ორსულობის გამო, ვერ წავედი (რასაც, რა თქმა უნდა, 
არ ვნანობ).
2024 წელს უკვე, მესამე ოფიციალური მოწვევა მივიღე ლონდონის გალერეაში გამოფენაზე, რომელიც ოქტომბერში გაიმართება და ყველანაირად შევეცდები მონაწილეობის მიღებას... გამოფენას ლუვრში, სხვა ბევრ ახალ პროექტში მონაწილეობის მიღება მოყვა, აღარაფერს ვამბობ რიგით გამოფენებსა და პროექტებზე, მხოლოდ განსაკუთრებულ შემთხვევებზე მოგახსენებთ, რომელთაგანაც ბრიტანული პროექტი განსაკუთრებით აღსანიშნავია. დამფუძნებელი ბიზნესმენი პირადად ჩამოფრინდა თბილისში ორი დღით ჩემთან შესახვედრად, რათა თანამშრომლობის დეტალებზე პირადად გვესაუბრა. ეს პროექტი დღემდე ხორციელდება და იმედია უახლოეს მომავალში წარმატებულად დასრულდება.
- ამერიკელი მწერალი და პოეტი დინ გარდნერი ისევ აგრძელებს თქვენი ფერწერის მიხედვით წიგნების გამოცემას?
- მან ჩემი ნახატებით გაფორმებული ექვსი კრებული გამოსცა. წელს კიდევ ორ წიგნზე მუშაობს და გამოფენას მოუთმენლად ელის, ახალი ნახატებიდან რომ აარჩიოს წიგნის გარეკანი. ერთი პირადად მომიძღვნა, რადგან თავს ჩემი შემოქმედების მთავარ გულშემატკივრად მიიჩნევს და წლების განმავლობაში ისე დავმეგობრდით, რომ კვირა არ გავა, ერთმანეთი არ მოვიკითხოთ. აღსანიშნავია რომ დინ გარდნერი გაქრისტიანდა, რაც მის პოეზიაშიც აისახა. ეს ჩემთვის ძალიან სასიხარულოა და დიდი სურვილი მაქვს საქართველოში ჩამოვიყვანო ჩემი მისდამი პატივისცემის ნიშნად. მსურს ჩვენი კულტურა გავაცნო. მადლიერებისა და პატივისცემის ნიშნად დავხატე მისი პორტრეტი, მისთვის საყვარელ ფოვისტურ სტილში და შევპირდი, რომ საქართველოში სტუმრობისას პირადად ვაჩუქებ.
მთელი ჩემი შემოქმედება და ზოგადად ცხოვრების აზრი, ჭეშმარიტების ძიებაა და ამ უმძიმეს გზაზე ნაბრძოლი და განცდილ-დანახული ხდება ჩემი შთაგონების წყარო. იქიდან გამომდინარე, რომ ქრისტიანულად ცხოვრებას ვცდილობ და ყველა ჩემი მოქმედება, ქრისტიანული პრიზმიდან გამომდინარეობს, თამამად შემიძლია ვთქვა, რომ არამარტო ხელოვნებაში, ზოგადად ყველაფერში საკუთარი თავიდან დაწყებული, გარე სამყაროთი დამთავრებული, ვხედავ ღმერთს და მის ხელს, რაც ჩემი აზრით განსხვავებულს ხდის ჩემს ნამუშევრებს. თუ რას ვგულისხმობ, ნახატთან პირისპირ დარჩენილი დამთვალიერებლისთვის მიმინდვია. ზოგადად რაც მხატვრობის როლს შეეხება ჩემს ცხოვრებაში, ძნელია გადმოვცე თუ როგორია ის განცდა, როდესაც შემოქმედებით მდგომარეობაში შევდივარ, თუმცა მაინც შევეცდები ორიოდე სიტყვით გითხრათ: შთაგონების დაბადების მომენტიდან, მე მხოლოდ სულიერი ძალის გამტარი ვხდები, უკვე კარგად მომწიფებული და დანახული კი ტილოზე გადმომაქვს, რადგან შემოქმედება, ჭეშმარიტების სულის გარეშე არ არსებობს და უბრალო ხელობა და სიცარიელეა.
ასე რომ მხოლოდ საკუთარი ძალების იმედად არასოდეს მიცდია ხატვა, არამედ ყოველთვის ლოცვით და სულიერი მომზადებით ვიწყებ და იქიდან გამომდინარე, რომ ერთადერთი ჭეშმარიტი შემოქმედი უფალია, როდესაც მის საქმეს ემსახურები, გამორიცხულია მისივე ნების გარეშე, რაიმე ღირებული შექმნა ან თუნდაც სხვას, ვინმე უკეთესს დაუმოწაფდე. ბოლოს კი დავამატებ, ღმერთი თავის შემოქმედების გაზიარებით ნეტარებს ადამიანში, ხოლო ადამიანი, მისი შეცნობით, რისი ცოცხალი დასტურიცაა ის სიყვარული, რომელსაც ხელოვანი განიცდის სამყაროზე დაკვირვების, გააზრების და შემოქმედების დროს.
იხილეთ ასევე: