რუსებმა უკრაინის რამდენიმე ქალაქი დაბომბეს - არის მსხვერპლი, დაღუპულებს შორის 8 წლის ბავშვია: ღამის ქრონიკა
3 სექტემბრის ღამე უკრაინისთვის მძიმე იყო. რუსებმა დნიპროზე სარაკეტო თავდასხმა განახორციელეს, არის მსხვერპლი. დაზიანდა, საცხოვრებელი კორპუსები, დაიღუპა 52 წლის მამაკაცი, სამი კი - დაშავდა.
“სამწუხაროდ, უკვე არსებობს ინფორმაცია დნიპროზე განხორციელებული სარაკეტო თავდასხმის შედეგად დაღუპულისა და სამი დაშავებულის შესახებ“, - აცხადებს დნეპროპეტროვსკის საოლქო-სამხედრო ადმინისტრაციის ხელმძღვანელზე, სერგეი ლისაკი.
მანამდე გავრცელდა ინფორმაცია, რომ უკრაინის ქალაქებში, დნიპროსა და ხარკოვში აფეთქებების ხმები ისმოდა.
დნიპროს გარდა, რუსულმა ძალებმა თავდასხმა განახორციელეს ზაპოროჟიეზე. დაიღუპა ორი ადამიანი, ორი კი დაშავდა.
დაღუპულებს შორის 8 წლის ბავშვია.
“სამწუხაროდ, დაიღუპა 2 ადამიანი, მათ შორის 8 წლის ბიჭი. დაჭრილია კიდევ ორი, მათ შორის 12 წლის გოგონა. ბავშვი ამჟამად რეანიმაციაშია“, - აღნიშნავს ზაპოროჟიეს ადმინისტრაციული ხელმძღვანელი.
მისი თქმით, აფეთქების ტალღამ და ნამსხვრევებმა მრავალსართულიანი შენობები დააზიანა. ნანგრევებიდან რამდენიმე ადამიანი ამოიყვანეს.
უკრაინამ 8 ოლქში 27 რუსული დრონი ჩამოაგდო
“რუსებმა 3 სექტემბრის ღამეს უკრაინას “ისკანდერ-მ/კნ-23” ტიპის 3 ბალისტიკური რაკეტით, “ხ-59/69“ ტიპის მართვადი რაკეტითა და “შაჰედ-131/136“ ტიპის 35 დრონით შეუტიეს,“ - ინფორმაციას უკრაინული მედია შეიარაღებული ძალების საჰაერო ძალებზე დაყრდნობით ავრცელებს.
ჯამში, ღამის განმავლობაში უკრაინელებმა 27 დრონი ჩამოაგდეს, 6 - ლოკაციურად გაუჩინარდა, 2 კი რუსეთისა და დონეცკის ოლქის მიმართულებით გაფრინდა.
უკრაინის საჰაერო ძალებში აცხადებენ, რომ რუსებმა თავდასხმა დროებით ოკუპირებული ყირიმის ტერიტორიიდან და რუსეთის ფედერაციის კურსკის ოლქიდან განახორციელეს. უკრაინის საჰაერო თავდაცვა კიევის, ოდესის, ხარკოვის, ნიკოლაევის, ხერსონის, პოლტავას, ჩერნიგოვისა და სუმის ოლქებში მუშაობდა.
ბელგოროდის რეგიონში უპილოტო საფრენმა აპარატმა ეკლესიას დაარტყა, მსხვერპლი არ არის.
“FPV თვითმფრინავმა ბორისოვის რაიონის სოფელ გრუზსკოეში წმინდა ნიკოლოზის ეკლესიის შენობას დაარტყა. აფეთქების შედეგად ტაძრის გუმბათს ცეცხლი გაუჩნდა. სახანძრო ეკიპაჟებმა, რომლებიც ადგილზე სასწრაფოდ მივიდნენ, ცეცხლი ჩააქრეს“, - ავრცელებს ბელგოროდის გუბერნატორი ვიაჩესლავ გლადკოვი.
ასევე ვრცელდება ინფორმაცია, რომ რუსეთის ქალაქ ტვერში, ღამის საათებში, უკრაინელებმა აეროდრომი დაბომბეს. ეს საჰაერო ბაზა აღჭურვილია Il-76MD და An-124 სატრანსპორტო თვითმფრინავებით. იქვე განლაგებულია მე-12 სამხედრო-სატრანსპორტო საავიაციო დივიზიის სარდლობა და მისი მე-8 პოლკი.
იხილეთ ასევე: