ალენ დელონის ანდერძით დატოვებული სურვილი, რომელიც ვერ შეუსრულდა - "თუ ადრე მოვკვდები, მას გაუკეთებენ ინექციას, რომ ჩემს მკლავებში მოკვდეს"
ალენ დელონის ოჯახი მსახიობის ნების მიუხედავად მისი ძაღლის ევთანაზიას არ დაუშვებს. ინფორმაციას უცხოური მედია ავრცელებს. მსახიობის ოჯახმა უარი თქვა ფრანგული და მსოფლიო კინოს ვარსკვლავის ანდერძის იმ პუნქტის შესრულებაზე, რომელშიც მსახიობმა მოითხოვა, რომ მისი სიკვდილის შემთხვევაში, საყვარელი ძაღლი ევთანაზიის საშუალებით დააძინონ და პატრონთან ერთად დაკრძალონ.
საფრანგეთში არ არსებობს კანონი, რომელიც კრძალავს მეპატრონეებისთვის შინაური ცხოველების ევთანაზიას საკუთარი შეხედულებისამებრ. ალენ დელონს, რომელიც გასულ კვირას 88 წლის ასაკში გარდაიცვალა, უნდოდა, რომ მისი ბელგიელი ნაგაზი, სახელად ლუბო მასთან ერთად დაკრძალულიყო, მაგრამ ცხოველთა უფლებების დამცველების პროტესტის ფონზე, მსახიობის ქალიშვილმა ანუშკამ განაცხადა, რომ 10 წლის ლუბო ცოცხალი დარჩება და მსახიობის ოჯახში გააგრძელებს ცხოვრებას.
ფრანგული საქველმოქმედო ორგანიზაცია Brigitte Bardot Foundation, რომელიც ცხოველთა უფლებებს იცავს, სოციალურ ქსელ X-ში წერს, რომ დელონის ქალიშვილმა დაადასტურა, რომ არავინ აპირებს ლუბოს ევთანაზიას, ძაღლს აქვს სახლი და ოჯახი.
მანამდე ცხოველთა დამცველმა ფრანგულმა ორგანიზაცია SPA-მ შეშფოთება გამოთქვა, რომ „ცხოველის სიცოცხლე არ უნდა იყოს დამოკიდებული ადამიანზე...“ მათ მზადყოფნა გამოთქვეს, რომ წაიყვანენ ძაღლს და მოუძებნიან ახალი ოჯახს.
ალენ დელონს ყოველთვის უყვარდა ძაღლები. ჟურნალ Paris Match-ს ჯერ კიდევ 2018 წელს განუცხადა, რომ სურდა საკუთარ ძაღლთან ერთად დაკრძალულიყო, რომელიც "ბავშვივით უყვარდა".
"ცხოვრებაში 50 ძაღლი მყავდა, მაგრამ ამ ძაღლთან განსაკუთრებული ურთიერთობა მაქვს. მენატრება, როდესაც მასთან ახლოს არ ვარ. თუ ადრე მოვკვდები, მას გაუკეთებენ ინექციას, რომ ჩემს მკლავებში მოკვდეს, ვიდრე ვიცოდე, რომ ძაღლი საშინელი ტანჯვისგან მოკვდება ჩემს საფლავზე“, - თქვა მსახიობმა.
ალენ დელონის ძაღლებიდან სულ მცირე 35 დაკრძალულია დელონის ლა ბრულერიის სასაფლაოზე.
წაიკითხეთ ასევე: