“დაწყევლილი“ წვეულება, ფოტო ტრაგედიამდე და გაუჩინარებული მილიონერები - ახალი დეტალები იტალიის სანაპიროსთან ჩაძირული სუპერიახტის შესახებ

იტალიის სანაპირო დაცვის ინფორმაციით, ძვირადღირებული იახტა Bayesian-ი მოულოდნელად ძლიერ შტორმში მოხვდა და სიცილიის დედაქალაქ პალერმოს მახლობლად ჩაიძირა. შედეგად ერთი ადამიანი დაიღუპა, ექვსი კი დაკარგულად მიიჩნევა.

56-მეტრიანი სიგრძის იახტა დიდ ბრიტანეთშია დარეგისტრირებული და მასზე 22 ადამიანი იმყოფებოდა. სანაპირო დაცვის სამსახურის ინფორმაციით, დაკარგულები ბრიტანეთის, ამერიკისა და კანადის მოქალაქეები არიან. 15 გადარჩენილს შორის ერთი წლის ბავშვიც არის.

გადარჩენილი რვა ადამიანი ადგილობრივ საავადმყოფოებში გადაიყვანეს. ადგილობრივი მედიის ცნობით, ყველა მათგანის მდგომარეობა სტაბილურია.

• დასავლური მედია ტრაგედიის შესახებ ახალ დეტალებს აქვეყნებს:

“ეს ბრიტანელი ტექნიკური მაგნატის მაიკ ლინჩის "გამარჯვების" სადღესასწაულო მოგზაურობა უნდა ყოფილიყო მას შემდეგ, რაც სასამართლომ “თაღლითობის ბრალდებით“ დაწყებული საქმის წარმოება დაასრულა და ის გაამართლეს“, - წერს dailymail.

თუმცა, მისი ოცნების წვეულება სიცილიაში კოშმარად გადაიქცა, როდესაც მისი სუპერიახტა, რომელშიც ეკიპაჟის 10 წევრი და 12 მგზავრი იმყოფებოდა, პალერმოს მახლობლად ჩაიძირა.

ბრიტანეთის “ბილ გეითსად“ წოდებული მისტერ ლინჩი, რომელიც 852 მილიონ ფუნტს ფლობს და მისი 18 წლის ქალიშვილი ექვს სავარაუდო გარდაცვლილთა შორის არიან. ნაპოვნია ბორტის შეფ-მზარეულის ცხედარი. დაკარგულების საპოვნელად მყვინთავები ახლაც მუშაობენ.

• რატომ იყო მაიკ ლინჩი იახტაზე?

ივნისში, მისტერ ლინჩმა მოიგო 13-წლიანი სასამართლო დავა. სან-ფრანცისკოს სასამართლომ ის უდანაშაულოდ ცნო. მას თაღლითობა ედებოდა ბრალად, ბრალის დამტკიცების შემთხვევაში, კი 25 წლიანი პატიმრობა ემუქრებოდა.

სწორედ ამის აღსანიშნავად გამართა მილიონერმა წვეულება სუპერიახტაზე.

• რა დაემართა სუპერიახტას?

გავრცელებული ცნობებით, იახტა ძლიერი შტორმის გამო ჩაიძირა.

მისტერ ლინჩის მეუღლე, ანჯელა ბაკარესი, 57 წლის, რომელიც გადარჩენილთა შორის არის, იხსენებს, რომ ნავი მოულოდნელად "გადაიხარა", რასაც ტრაგიკული მოვლენები მოჰყვა. მოწმეებმა აღწერეს მომენტი, როდესაც იახტა ჩაიძრა, მათი თქმით, ეს ისე სწრაფად მოხდა, რომ ის თითქოს უბრალოდ "გაქრა".

“სახლში ვიყავი, როდესაც შტორმი დაიწყო. მაშინვე დავხურე ყველა ფანჯარა. თუმცა დავინახე იახტა, რომელსაც მხოლოდ ერთი ანძა ჰქონდა, ძალიან დიდი იყო, მაგრამ უცებ ჩაიძირა“, - იხსენებს მეთევზე პიეტრო ასკიუტო.

ექსპერტის აზრით, მისტერ ლინჩის სუპერიახტაზე არსებული უზარმაზარი 246 ფუტი სიმაღლის ალუმინის ანძა შეიძლება ტრაგედიის მიზეზი ყოფილიყო.

Bayesian-ს აქვს მსოფლიოში ერთ-ერთი ყველაზე მაღალი ალუმინის ანძა, რომელიც გატყდა და ამან იახტის ჩაძირვა გამოიწვია.

მისტერ ლინჩი დაკარგულ ექვს ადამიანს შორისაა. მეუღლემ განაცხადა, რომ არა მხოლოდ მისი ქმარი, არამედ მათი 18 წლის ქალიშვილი ჰანაც დაიკარგა. კიდევ ორი ​​მგზავრი, რომლებიც დღემდე დაკარგულები არიან, Morgan Stanley International-ის თავმჯდომარე ჯონათან ბლუმერი და მისი მეუღლეა.

ჯერ არ არის ნაპოვნი მისტერ ლინჩის ადვოკატი კრისტოფერ მორვილო და მისი მეუღლე ნადა.

• ვინ არიან გადარჩენილები?

მისტერ ლინჩის მეუღლე, 57 წლის ანჯელა ბაკარესი არის იმ 15 ადამიანს შორის, რომლებიც გადარჩნენ. ასევე გადარჩენილთა შორის არის კლიფორდ ჩანსის ადვოკატი აილა რონალდი და მისი პარტნიორი. სულ 15 ადამიანი.

იხილეთ ასევე:

• იტალიის სანაპიროსთან მრავალმილიონიანი იახტა ჩაიძირა - გადარჩენილებს შორის არიან: 1 წლის ჩვილი და გემის მფლობელის ცოლი. ერთ ბავშვს, მფლობელს და კიდევ 4 ადამიანს ეძებენ