ზაპოროჟიეს ატომურ ელექტროსადგურზე ხანძარია - იმოქმედებს თუ არა ეს რადიაციის დონეზე?
კვირას საღამოს ევროპის უდიდეს ატომურ ელექტროსადგურთან დაკავშირებულ ობიექტზე მასიური ხანძარი გაჩნდა. უკრაინის პრეზიდენტმა ვოლოდიმირ ზელენსკიმ ერთი დღით ადრე განაცხადა, რომ ზაპოროჟიეს ატომურ ელექტროსადგურზე ხანძარი რუსმა სამხედროებმა გააჩინეს. ხოლო კრემლის მიერ დანიშნული ზაპოროჟიეს გუბერნატორი ევგენი ბალიცკი ამბობს, რომ ხანძრის მიზეზი უკრაინელების თავდასხმა გახდა.
"დამკვირვებელთა ჯგუფს შეატყობინეს, რომ თვითმფრინავი თავს დაესხა სადგურის ერთ-ერთ გამაგრილებელ კოშკს. IAEA-ს გენერალურმა დირექტორმა რაფაელ მარიანო გროსიმ დაადასტურა, რომ შემთხვევა ბირთვულ უსაფრთხოებაზე არ იმოქმედებს“, - ნათქვამია ატომური ენერგიის საერთაშორისო სააგენტოს (IAEA) განცხადებაში.
რუსეთის სახელმწიფო კორპორაცია Rosatom-ის ცნობით, ძირითადი ხანძარი 23:30 საათისთვის საგანგებო სიტუაციების სამინისტროს მეხანძრეებმა ჩააქრეს.
- კორპორაცია ირწმუნება, რომ ორი გამაგრილებელი კოშკიდან ერთმა მიიღო "ორი პირდაპირი დარტყმა უკრაინული უპილოტო საფრენი აპარატებისგან." Rosatom-ის ცნობით, გამაგრილებელი კოშკის შიდა სტრუქტურებს "სერიოზული ზიანი“ მიაყენეს, "ეს მოვლენა შეიძლება დახასიათდეს, როგორც ბირთვული ტერორიზმის აქტი“.
Energoatom-ის მტკიცებით, რუსეთი გამაგრილებელ კოშკებს სამხედრო აღჭურვილობისა და ასაფეთქებელი ნივთიერებების შესანახად იყენებს, თუმცა ეს ვარაუდი დაუდასტურებელია.
უკრაინული და რუსული მხარეები ხაზგასმით აღნიშნავენ, რომ ხანძარი რადიაციულ ფონზე გავლენას არ მოახდენს. უკრაინის საგანგებო სიტუაციების სახელმწიფო სამსახურში განაცხადეს, რომ ქვეყანაში რადიაციული მდგომარეობა სტაბილურია, "დარღვევა არ დაფიქსირებულა“.
”ჯერჯერობით, რადიაციის დონე ნორმალურია”, - თქვა ზელენსკიმ.
"მაგრამ სანამ რუსი ტერორისტები ინარჩუნებენ კონტროლს ატომურ ელექტროსადგურზე, სიტუაცია არ შეიძლება იყოს ნორმალური. ზაპოროჟიეს ატომური ელექტროსადგურის დაკავების პირველივე დღიდან რუსეთი მას მხოლოდ უკრაინის და მთელი ევროპისა და მსოფლიოს შანტაჟისთვის იყენებს“.
ცნობისთვის, რუსეთმა 2022 წელს უკრაინაში სრულმასშტაბიანი შეჭრის დაწყებიდან მალევე აიღო ზაპოროჟიეს ატომური ელექტროსადგური - ევროპაში უდიდესი. ქარხნის ექვსივე ბირთვული რეაქტორი ახლა გამორთულია და შენარჩუნებულია დაბალ წნევაზე.