მეცნიერებმა შეიმუშავეს ახალი, “რევოლუციური“ გზა, რომელიც მარსს საცხოვრებლად ვარგისს გახდის - რა იგეგმება წითელ პლანეტაზე?

მეცნიერებმა მარსის ტერაფორმირების ახალ გზას მიაგნეს, რათა ის დედამიწას დაემსგავსოს და შესაძლოა, ადამიანების მეორე სახლადაც კი იქცეს.

Independent-ის ცნობით, ახალი კვლევა გვთავაზობს მარსის ატმოსფეროში საინჟინრო მტვრის ნაწილაკების გაფრქვევას, რათა ის გახურდეს და სიცოცხლისთვის შესაფერისი გახდეს.

• რა არის მეთოდის არსი

მეთოდი მიზნად ისახავს სათბურის ეფექტის შექმნას, დაახლოებით ისე, როგორც დედამიწაზე.

ახალი კვლევა გვთავაზობს მარსზე გავრცელებული რკინისა და ალუმინის საინჟინრო მტვრის ნაწილაკებად გადაქცევას. მოსალოდნელია, რომ ისინი შეაკავებენ სითბოს და ზედაპირზე მზის შუქს აირეკლავენ, რაც სათბურის ეფექტს შექმნის.

“პლანეტის გასათბობად, მილიონობით ტონა მტვერი დაგვჭირდება, მაგრამ ეს იმაზე ხუთი ათასჯერ ნაკლებია, ვიდრე აქამდე სხვა გეგმებში გვქონდა გაწერილი“,- ამბობს პროექტის ავტორი ედვინ კაითი.

სავარაუდოდ, ეს ჯერ კიდევ არ იქნება საკმარისი იმისთვის, რომ ადამიანის საცხოვრებელი პირობები შეიქმნას. მაგრამ საკმარისი იქნება მიკრობების და შემდეგ საკვები კულტურების ზრდის დასაწყებად.

მეცნიერთა აზრით, ტერაფორმირების ახალი მეთოდი წინა მეთოდებთან შედარებით 5000-ჯერ უფრო ეფექტურია, რადგან ის მარსზე ადვილად ხელმისაწვდომ რესურსებს იყენებს.

მარსის ტერაფორმირების პირველი წინადადებები 1970-იანი წლების დასაწყისში გამოჩნდა. მას შემდეგ მკვლევარებმა მრავალი განსხვავებული გზა შეიმუშავეს, მაგრამ დღემდე არცერთი მათგანი არ განხორციელებულა.