საბერძნეთი უკონტროლო ხანძარს ებრძვის - სახიფათო ზონებიდან ათასობით ადამიანია ევაკუირებული (ფოტო/ვიდეო)
საბერძნეთში, რამდენიმე დღის წინ გაჩენილი ხანძრის 40 კერიდან, მეხანძრე-მაშველები შვიდს ჯერ კიდევ ებრძვიან.
ათენთან ახლოს, ატიკის ტერიტორიაზე, მდგომარეობა იმდენად უკონტროლო გახდა, რომ ათასობით მაცხოვრებლის ევაკუაცია მიმდინარეობს.
ხანძრის შეჩერებას მაშველები ჯერჯერობით უშედეგოდ ცდილობენ.
ქალაქ ვარნავასში დაიწვა სახლები და ქონება.
მეხანძრეებმა ცეცხლში ჩარჩენილი ადამიანები 20-დან 25-მდე ავტომანქანის კოლონით გადაიყვანეს.
- “სახანძრო ბრიგადა მთელი ღამის განმავლობაში მუშაობდა, მაგრამ ზეადამიანური ძალისხმევის მიუხედავად, ხანძარი სწრაფად განვითარდა", - თქვა საგანგებო სიტუაციების სამსახურის პრესსპიკერმა ვასილის ვატრაკოგიანისმა.
- მობილიზებულია 500-ზე მეტი მეხანძრე და 150 მანქანა.
ბოლო ინფორმაციით, ცეცხლი ახლა პენტელის მთისკენ მიემართება, რომელიც ცნობილია მარმარილოს კარიერებით. ამავე სახელწოდების გარეუბანში, სამი საავადმყოფოს ევაკუაცია უკვე განხორციელდა.
დედაქალაქის ნაწილი ყავისფერი კვამლის ღრუბელშია გახვეული. ქარის გამო, მოსალოდნელია, რომ ხანძარი ინტენსიურად გავრცელდეს.
ვარნავასში, გაჩენილმა ხანძარმა მოიცვა 100 კვ.კმ ტერიტორია.
ისტორიული ქალაქ მარათონის მაცხოვრებლებს ასევე უთხრეს, რომ ევაკუირებულიყვნენ სანაპირო ქალაქ ნეა მაკრისკენ. მარათონში ერთი მეხანძრე მეორე ხარისხის დამწვრობით საავადმყოფოში გადაიყვანეს, ხუთი ადამიანი კი სუნთქვის პრობლემებით.
გარდა სახანძრო სამსახურისა, ატიკის ჩრდილო-აღმოსავლეთით გაჩენილი ხანძრის ეპიცენტრში მუშაობენ საბერძნეთის პოლიციის ოფიცრებიც, რომლებიც გუშინ 22:00 საათიდან დღეს დილამდე ადამიანების ევაკუაციისთვის იბრძოდნენ.
როგორც ირკვევა, საერთო ჯამში მთელი ღამის მანძილზე 250 ადამიანი გადაარჩინეს, რომელთა უმეტესობასაც დამოუკიდებლად გადაადგილება არ შეეძლო.