“ტრამპი ერთადერთი პრეზიდენტია, ბოლო ათწლეულის განმავლობაში, რომლის დროსაც აშშ-ს ომი არ ჰქონია, ამ თვალსაზრისით სერიოზული მსგავსებაა ჩვენს ხელისუფლებასა და ტრამპის მმართველობას შორის“ - პრემიერი
“ტრამპი არის ის ერთადერთი პრეზიდენტი ბოლო რამდენიმე ათწლეულის განმავლობაში, რომლის დროსაც აშშ-ს არცერთი ომი არ ჰქონია, ამ თვალსაზრისით არის სერიოზული მსგავსება ჩვენს ხელისუფლებასა და დონალდ ტრამპის მმართველობას შორის“, - ამის შესახებ პრემიერ-მინისტრმა, ირაკლი კობახიძემ ჟურნალისტებს განუცხადა.
ირაკლი კობახიძე მიიჩნევს, რომ თუ დონალდ ტრამპი აშშ-ის არჩევნებში გაიმარჯვებს, უკრაინის ომი იანვრისთვის დასრულდება, წინააღმდეგ შემთხვევაში კი დაახლოებით 6 თვით შეიძლება გადაიწიოს.
“გეტყვით რა თვალსაზრისით არის უშუალოდ ტრამპის ფაქტორი მნიშვნელოვანი. თქვენ იცით, რომ ტრამპი არის ის ერთადერთი პრეზიდენტი ბოლო რამდენიმე ათწლეულის განმავლობაში, რომლის დროსაც აშშ-ს არცერთი ომი არ ჰქონია, ამ თვალსაზრისით არის სერიოზული მსგავსება ჩვენს ხელისუფლებასა და დონალდ ტრამპის მმართველობას შორის. ვფიქრობთ, იმ შემთხვევაში, თუ ტრამპი არჩევნებს მოიგებს, უკრაინაში ომი უფრო ადრე დასრულდება, ვიდრე სხვა შემთხვევაში, დაახლოებით ნახევარ წლით ადრე. ჩვენ ვფიქრობთ, რომ ტრამპის გამარჯვების შემთხვევაში, ომი იანვრისთვის დასრულდება, თუ პროცესები სხვაგვარად განვითარდა, ამ შემთხვევაში, დაახლოებით 6 თვით შეიძლება გადაიწიოს ომის დასრულება. რაც უფრო ადრე დასრულდება ომი, მით უკეთესი მთლიანად რეგიონში ვითარების გაჯანსაღებისთვის და მით უკეთესი ქართულ-ამერიკული ურთიერთობებისთვის. ამ კუთხით არის ჩვენთვის საინტერესო ეს ფაქტორი, მაგრამ ასეც და ისეც დარწმუნებული ვარ, რომ მომავალ წელს უკრაინაში ომი დასრულდება, რაც არის აუცილებელი პირობა იმისთვის, რომ გაჯანსაღდეს რეგიონში ვითარება და მეორე, გაჯანსაღდეს “ქართულ-ამერიკული ურთიერთობები“,- განაცხადა კობახიძემ.
პრემიერმა ასევე კომენტარი გააკეთა სენატორ ჯინ შაჰინის განცხადებაზე, რომლის თანახმადაც ბიძინა ივანიშვილი მათ არ შეხვდა. მისივე თქმით, რაც შეეხება იმას, თუ რამდენად შეიძლება გახდეს ეს განმარტება საჯარო, ეს დამოკიდებულია თავად ბიძინა ივანიშვლისა და ამერიკელ პარტნიორებზე.
“ძალიან მკაფიოდ განმარტა ბატონმა ბიძინა ივანიშვილმა მიზეზები და ეს მიზეზები უშუალოდ განემარტათ ჩვენს ამერიკელ პარტნიორებს. რაც შეეხება იმას, თუ რამდენად შეიძლება გახდეს ეს განმარტება საჯარო, ეს არის დამოკიდებული ბიძინა ივანიშვლიზე, ეს დამოკიდებულია ჩვენს ამერიკელ პარტნიორებზე. თუ დადგება დღის წესრიგში ამის გასაჯაროება, შესაბამისი მხარეები მიიღებენ ამის გადაწყვეტილებას,"- განაცხადა პრემიერმა.