ყოფილი ოფიცერი და გეოგრაფიის მასწავლებელი - ვინ არის ტიმ უოლცი , რომელიც კამალა ჰარისმა აშშ-ის ვიცე-პრეზიდენტობის კანდიდატად დაასახელა
კამალა ჰარისმა არჩევნებში გამარჯვების შემთხვევაში ვიცე-პრეზიდენტობის კანდიდატად მინესოტის გუბერნატორი ტიმ უოლცი დაასახელა. ინფორმაციას "სიენენი" ავრცელებს.
უოლცი მინესოტას გუბერნატორია მეორე ვადით, ასევე დემოკრატი გუბერნატორების ასოციაციას ხელმძღვანელობს; მანამდე 12 წელი მსახურობდა კონგრესში. იგი აშშ-ის არმიის ყოფილი ოფიცერი და ასევე ყოფილი მასწავლებელია, 2019 წლიდან მინესოტას 41-ე გუბერნატორის თანამდებობას იკავებს. დაამთავრა ჩადრონის სახელმწიფო კოლეჯი ნებრასკაში. 1996 წელს გადავიდა მინესოტაში. 2006 წელს მინესოტას 1-ლი კონგრესის ოლქში აირჩიეს შეერთებული შტატების წარმომადგენელთა პალატაში.
- "ინსტაგრამის" ვრცელ პოსტში, კამალა ჰარისმა განმარტა თავისი გადაწყვეტილება და აღნიშნა, რომ უოლცის "რწმენა" და "ოჯახურო ფასეულობები" გახდა მისი არჩევის მიზეზი. პოსტში ჰარისმა უოლცის ადრეულ ცხოვრებასა და კარიერაზე ისაუბრა:
”იგი თავისი მეუღლისა და შვილების ერთგულია, მოუთმენლად ველოდები ტიმთან ერთად მუშაობას. შევქმნით ადმინისტრაციას, რომელიც ზუსტად ასახავს ჩვენს საერთო ღირებულებებს" - დაწერა ჰარისმა.
რაც შეეხება შიდა პოლიტიკას, უოლცმა, გუბერნატორობისას, დემოკრატების საკმაო ქება დაიმსახურა – კანაბისის ლეგალიზაციისთვის, იარაღის თავისუფალ გაყიდვაზე შეზღუდვების დაწესებისთვის, სკოლებში უფასო სადილის დაწესებისთვის და აბორტის უფლების დაცვისთვის.
მანამდე იმედოვნებდნენ, რომ ჰარისი ვიცე-პრეზიდენტთან ჯოშ შაპიროს აირჩევდა - პენსილვანიის 51 წლის გუბერნატორი და ყოფილი გენერალური პროკურორი, კანდიდატად დასახელებისა და შემდგომში გამარჯვების შემთხვევაში, პირველი ებრაელი ვიცეპრეზიდენტი იქნებოდა.