პარიზში ოლიმპიური "ციებ-ცხელება" იწყება - ყველაფერი ქართველ ათლეტებზე: ვინ უკვე ჩემპიონია, ვინ - რეკორდსმენი, ვინ - ფავორიტი და ვინ - დებიუტანტი?

ზაფხულის XXXIII ოლიმპიური თამაშებს, რომელიც 26 ივლისიდან -11 აგვისტომდე გასტანს, საფრანგეთის დედაქალაქი პარიზი მასპინძლობს.

აქამდე პარიზმა ოლიმპიადას ორჯერ (1900, 1924) უმასპინძლა. ის გახდება მეორე ქალაქი ლონდონის შემდეგ, რომელშიც ზაფხულის ოლიმპიადა მესამედ იმართება.

პარიზში ოლიმპიური მედლებისთვის სულ 206 ქვეყნის 10 500 სპორტსმენი იბრძოლებს.

უკრაინის წინააღმდეგ ომის გამო, საერთაშორისო ოლიმპიურმა კომიტეტმა რუსეთის და ბელარუსის წარმომადგენლებს მხოლოდ ნეიტრალური სტატუსით, დროშებისა და სხვა ეროვნული ატრიბუტიკის გარეშე მონაწილეობის უფლება მისცა.

რუსეთის ხელისუფლებამ გადაწყვიტა, არ აჩვენოს პარიზის ზაფხულის ოლიმპიადა. ოფიციალურად უარი თამაშების ტრანსლაციაზე რუსულმა სატელევიზიო არხებმა და სტრიმინგ-სერვისებმა თქვეს, თუმცა ყველაფერი მიუთითებს, რომ გადაწყვეტილება მთავრობამ მიიღო.

• ყველაფერი ქართველ ოლიმპიელებზე

საქართველოდან ოლიმპიადაში ქართული ოლიმპიზმის ისტორიაში ყველაზე ნაკლები მონაწილე - 28 სპორტსმენი იასპარეზებს, რომელთაგან 7 ქალი და 4 ოლიმპიური ჩემპიონია.

ეროვნული ოლიმპიური კომიტეტის გადაწყვეტილებით, ჩვენი მედროშეები პარიზში ოლიმპიური ჩემპიონები, ტყვიის მსროლელი ნინო სალუქვაძე და ძალოსანი ლაშა ტალახაძე იქნებიან.

ქართველი სპორტსმენები ოლიმპიურ თამაშებზე 1952 წლიდან მონაწილეობენ. ჰელსინკის ოლიმპიადიდან მოყოლებული, საქართველოს სულ 37 ოლიმპიური ჩემპიონი ჰყავს.

ძიუდო, ჭიდაობა, ძალოსნობა, კრივი, ტყვიის სროლა, მძლეოსნობა, ცურვა, ბატუტზე ხტომა და ფარიკაობა - ქართველი ათლეტები სპორტის ამ 9 სახეობის პირად შეჯიბრში მიიღებენ მონაწილეობას. ამას გარდა, ჩვენი ძიუდოისტები იასპარეზებენ ოლიმპიადის შერეულ გუნდურ ტურნირში.

ჩვენი სპორტსმენები (ძიუდო, ფარიკაობა, კრივი, ცურვა) შეჯიბრებაში ჩაებმებიან 27 ივლისიდან.

საქართველოს დელეგაციის ყველაზე ასკოვანი წევრი 55 წლის ტყვიის მსროლელი ნინო სალუქვაძეა, რომელიც ოლიმპიურ თამაშებზე მეათედ იასპარეზებს, ყველაზე უმცროსი კი - 15 წლის მოცურავე ანა ნიჟარაძე, რომლისთვისაც ეს პირველი ოლიმპიადაა.

როგორც უკვე აღვნიშნეთ, ჩვენი დელეგაცია პარიზში 4 ოლიმპიური ჩემპიონით იასპარეზებს.

• ესენია:

ნინო სალუქვაძე - ტყვიის სროლა (სეული 1988)

ლაშა ტალახაძე - ძალოსნობა (რიო-დე-ჟანეირო 2016, ტოკიო 2020)

ლაშა შავდათუაშვილი - ძიუდო (ლონდონი 2012)

ლაშა ბექაური - ძიუდო (ტოკიო 2020)

ახლა გადავხედოთ ჩვენს სპორტსმენებს სახეობების მიხედვით:

• ძიუდო

ყველაზე დიდი დელეგაცია პარიზში ძიუდოს ფედერაციას ეყოლება - 10 სპორტსმენი, რომელთაგან 3 ქალია.

ისტორიაში პირველად, ჩვენი ნაკრები გუნდურ შეჯიბრშიც გამოვა.

ძიუდოისტთა ნაკრების სპორტსმენების უმრავლესობა ოლიმპიური თამაშების, მსოფლიოსა და ევროპის ჩემპიონატების მედალოსნები არიან, მათგან ვაჟთა ნაკრებში 2 ოლიმპიური (ლაშა ბექაური - ტოკიო 2020 და ლაშა შავდათუაშვილი - ლონდონი 2012), 4 - მსოფლიოს და 6 ევროპის ჩემპიონია.

გიორგი სარდალაშვილი (-60კგ.)

ვაჟა მარგველაშვილი (-66 კგ.)

ლაშა შავდათუაშვილი (-73 კგ.)

ტატო გრიგალაშვილი (-81 კგ.)

ლაშა ბექაური (-90 კგ.)

ილია სულამანიძე (-100 კგ.)

გურამ თუშიშვილი (+100 კგ.)

ეთერ ლიპარტელიანი (-57 კგ).

ეთერ ასკილაშვილი (-63 კგ.)

სოფიო სომხიშვილი (+73 კგ.)

• ჭიდაობა

სპორტის ამ სახეობის ორივე დისციპლინაში მსოფლიოსა და ევროპის ჩემპიონები წარსდგებიან. მოჭიდავეთა გუნდის გამორჩეულ ლიდერად კი უნდა მივიჩნიოთ 30 წლის გენო პეტრიაშვილი, მსოფლიოსა და ევროპის ჩემპიონი, ოლიმპიური თამაშების ვერცხლის და ბრინჯაოს პრიზიორი. წელს გენო მესამე ოლიმპიური სინჯისთვის - ოქროსთვის იბრძოლებს.

გოდერძი ძებისაშვილი (თავისუფალი ჭიდაობა, 65 კგ.)

ვლადიმერ გამყრელიძე (თავისუფალი ჭიდაობა, 86 კგ.)

გივი მაჭარაშვილი (თავისუფალი ჭიდაობა, 97 კგ.)

გენო პეტრიაშვილი (თავისუფალი ჭიდაობა, 125 კგ.)

რამაზ ზოიძე (ბერძნულ-რომაული ჭიდაობა, 67 კგ.)

რობერტ კობლიაშვილი (ბერძნულ-რომაული ჭიდაობა, 97 კგ.)

ლაშა გობაძე (ბერძნულ-რომაული ჭიდაობა, 87 კგ.)

• ტყვიის სროლა

ტყვიის მსროლელი 55 წლის ნინო სალუქვაძისთვის "პარიზი 2024“ მეათე ოლიმპიური თამაშები იქნება. ეს ქალთა შორის მსოფლიო რეკორდია. ის ოლიმპიური თამაშების ოქროს (სეული- 1988) და ბრინჯაოს (პეკინი - 2008) პრიზიორია.

• ძალოსნობა

როგორც ძალოსნობის ნაკრების, ისე ზოგადად ჩვენი დელეგაციის ლიდერია ორგზაის ოლიმპიური ჩემპიონი, 30 წლის ლაშა ტალახაძე. მას აქვს უნიკალური შანსი პარიზის ოლიმპიურ თამაშებზე მოიპოვოს მესამე ოქროს მედალი და გაიმეოროს ოლიმპიურ თამაშებზე ყველა დროის საუკეთესო ქართველი ოლიმპიელის, ვიქტორ სანეევის (მძლეოსნობა) შედეგი და გახდეს სამგზის ოლიმპიური ჩემპიონი.

ლაშა ტალახაძე (+ 109 კგ)

შოთა მიშველიძე (61 კგ)

ირაკლი ჩხეიძე (102 კგ)

• ფარიკაობა

ქართველი გუშემატკივარი დიდ იმედს ამყარებს ევროპის ჩემპიონ და მსოფლიო პრიზიორ 30 წლის მოფარიკავე სანდრო ბაზაძეზე, მისთვის ეს მესამე ოლიმპიური თამაშებია.

• ბატუტზე ხტომა

ლუბა გოლოვინა - 34 წლის სპორტსმენისთვის ეს მეოთხე ოლიმპიური თამაშებია. ევროპის ჩემპიონატების პრიზიორის საუკეთესო მაჩვენებელი ოლიმპიურ თამაშებზე 2008 წლის პეკინის ოლიმპიადაზე მოპოვებული მე-6 ადგილია.

• კრივი

პარიზის ოლიმპიადაზე ამ სახეობაში ორი სპორტსმენი იასპარეზებს:

27 წლის ლაშა გურული, მსოფლიოსა და ევროპის პრიზიორი;

29 წლის გიორგი ყუშიტაშვილი, ევროპის ჩემპიონი და მსოფლიოს პრიზიორი.

• ცურვა

იმის მიუხედავად, რომ სპორტის ამ სახეობაში ქართველმა სპორტსმენებმა ვერცერთ დისციპლინაში ვერ მოიპოვეს ოლიმპიური ლიცენზია, საერთაშორისო ფედერაციამ საქართველოსთვის ე.წ. "ველური ბარათით" 2 საგზური გამოყო.

ანა ნიჟარაძე - (100 მეტრი ბატერფლაი)

ნოე ფანცხავა - (100 მეტრი გულაღმა ცურვა)

• მძლეოსნობა

ლიკა ხარჩილავა - 23 წლის მორბენალი ოლიმპიურ თამაშებზე პირველად მიდის. ისიც ე.წ. "ველური ბარათით“ მოხვდა და 100 მეტრზე სირბილში იასპარეზებს.

საქართველოს მთავრობის გადაწყვეტილებით ოლიმპიური ოქროს მფლობელი ჯილდოდ ერთ მილიონ ლარს მიიღევს. ვერცხლის მედალოსანი 500 ათას ლარს. ბრინჯაოს მფლობელს 250 ათასი ლარი გადაეცემა.

• წარმატება ჩვენს ოლიმპიელებს!

სტატიაში გამოყენებულია საქართველოს ოლიმპიური კომიტეტის ინფორმაცია და ფოტოები

ჩვენი სპორტსმენების ასპარეზობის განრიგი იხილეთ აქ