სროლა, აქციები და არეულობა ოკუპირებულ აფხაზეთში - რას გულისხმობს “აპარტამენტების შესახებ კანონპროექტი“, რომელსაც აფხაზები "რეგიონის გაყიდვის" მცდელობად აფასებენ (ვიდეო)

ოკუპირებულ აფხაზეთში დაძაბულობა, რაც წინა კვირაში ლამის მღელვარებაში გადაიზარდა, გრძელდება. ადგლობრივების პროტესტი “ბინების შესახებ კანონპროექტმა“ გამოიწვია. კვირის მთავარი თემა ხელისუფლების მხრიდან ბინების მშენებლობის ლეგალიზაციის მორიგი მცდელობა გახდა.

როგორც ekhokavkaza წერს, 17 ივლისს აფხაზეთის პარლამენტის ეკონომიკური პოლიტიკისა და რეფორმების კომიტეტმა განიხილა კანონპროექტი “აფხაზეთის რესპუბლიკის ოჩამჩირის, ტყუაჩალისა და გალის რაიონების სოციალურ-ეკონომიკური განვითარების დონის ამაღლების ღონისძიებების შესახებ“ და რეკომენდაცია გაუწია “სახალხო კრების“ სესიის მომდევნო სხდომაზე წარედგინათ. კანონპროექტის განხილვა, რომელიც აფხაზეთის აღმოსავლეთ რეგიონებში უცხო ქვეყნის მოქალაქეებისთვის გასაყიდი ბინების მშენებლობას გულისხმობს, პრესისა და საზოგადოებისთვის დახურული იყო. სწორედ ამას მოჰყვა ადგილობრივი მოსახლეობის პროტესტი.

მედიის, საზოგადოების წარმომადგენლებმა, ოპოზიციონერებმა და ყოფილმა დეპუტატებმა, პარლამენტის შენობასთან შეკრება დილიდან დაიწყეს. ისინი ცდილობდნენ ეზოში შევლას, თუმცა უსაფრთხოების სამსახურის წარმომდგენლებმა წინააღმდეგობა გაუწიეს.

კომიტეტის სხდომაში მონაწილეობა თვითგამოცხადებულმა პრეზიდენტმა ასლან ბჟანიამ მიიღო. სწორედ მისი ინიციატივით განახლდა კანონპოექტის განხილვა.

• ბჟანია, “აპარტამენტების შესახებ კანონპროექტის“ მიღებას ჯერ კიდევ გასული წლის ივლისში ითხოვდა. თუმცა, მაშინ საზოგადოების პროტესტის ფონზე, პარლამენტმა ის არ განიხილა და ე.წ. პრეზიდენტს უკან დაუბრუნდა.

“სიცხის მიუხედავად, ასლან ბჟანია პარლამენტში პიჯაკით მივიდა. უშიშროების მრავალრიცხოვანი ძალები საზოგადოებას შენობის მიმდებარე ტერიტორიაზე შესვლის შანსსაც კი არ აძლევდნენ. შეხლა-შემოხლა იყო შენობის ჭიშკართან - აქტივისტმა ჯანსუხ ადლეიბამ ორლულიანი თოფიდან ჰაერში ესროლა, ხოლო ასლან ბჟანიამ პარლამენტის წევრ კან კვარჩიასთან ჩხუბის პროვოცირება მოახდინა. პრეზიდენტის დაცვის თანამშრომლებმა დეპუტატი კვარჩია პარლამენტიდან გააძევეს“, - წერდა ekhokavkaza 17 ივლისს.

სხდომაზე არ დაუშვეს დამოუკიდებელი და უცხოური მედიის წარმომადგენლებიც.

ბჟანია დეპუტატებს წარდგენილი კანონის დაჩქარებულად მიღებას სთხოვდა.

“ჩემს უფლებას ვიყენებ. მე ვლაპარაკობ, ყველა უსმენს. მე ვარ ქვეყნის პრეზიდენტი. რეგლამენტში წერია: ნებისმიერ დროს შემიძლია საუბარი და ყველა ჩერდება...“ - განაცხადა ბჟანიამ, როდესაც დეპუტატ რშტუნის სიტყვა შეაწყვეტინა.

მან ასევე გაახმაურა აფხაზეთის გაზიფიცირების გეგმები.

“ჩვენ გვაქვს გეგმები აფხაზეთის გაზიფიცირებასთან დაკავშირებით. მომხმარებლები უკვე გვეყოლება. ესეც ბიზნესია, თუ გაზპრომი შევა მშენებლობაში, უნდა ჰქონდეს გაყიდვები, უნდა იყოს ანაზღაურება“, - აცხადებდა ბჟანია.

• რას გულისხმობს “კანონი ბინების შესახებ“ აფხაზეთში?

პროტესტის ფონზე, დე ფაქტო პრეზიდენტი ასლან ბჟანია საზოგადოებას კომპრომისს სთავაზობს - უცხოელი ინვესტორებისთვის აპარტ-ოტელების მშენებლობის ნებართვები გარკვეულ რეგიონებში შეიზღუდოს. მაგრამ კრიტიკოსები ამასაც აღიქვამენ, როგორც თავდაპირველი იდეის ფარულად წამოწევის მცდელობას და მალე “მთელი რეგიონის გაყიდვის“ საფრთხედ.

ახალი ინიციატივის მიხედვით, უცხო ქვეყნის მოქალაქეებისთვის გასაყიდი აპარტ-ოტელების მშენებლობა დაშვებული იქნება მხოლოდ თვითგამოცხადებული რესპუბლიკის აღმოსავლეთ ნაწილში. ბჟანიას აზრით, ამ კონკრეტული ტერიტორიების სოციალურ-ეკონომიკური განვითარება, რომლებიც ტურისტული თვალსაზრისით არ არის ყველაზე მიმზიდველი, სახელმწიფოს პრიორიტეტული ამოცანაა და “გადაუდებელ ზომებსაც კი საჭიროებს“.

“აფხაზების მთავარი შიში რეგიონში დემოგრაფიული ბალანსის დარღვევას უკავშირდება. უძრავი ქონება არის მგრძნობიარე თემა მცირე ეთნიკური ჯგუფისთვის, რომლებიც ცდილობენ შეინარჩუნონ თავისი კულტურული და ეთნიკური იდენტობა. კანონპროექტის ძალაში შესვლამ შესაძლოა სერიოზულად იმოქმედოს დემოგრაფიულ მდგომარეობაზე და პოტენციურ საფრთხეს შეუქმნას ქვეყნის ეროვნულ უსაფრთხოებას“, - წერს sova.news ადგილობრივებზე დაყრდნობით.

და მაინც, დე ფაქტო ხელისუფლება დაჟინებით მოითხოვს კანონის მიღებას. სამოქალაქო საზოგადოების წარმომადგენლები კი მიიჩნევენ, რომ არის საფრთხე, აფხაზეთი მოსკოვის ტოტალური კონტროლის ქვეშ მოექცეს.

ასევე იხილეთ:

• დაძაბულობა აფხაზეთში: მოსახლეობა "აპარტამენტების კანონპროექტს" აპროტესტებს - აქციაზე "სამართალდამცავებსა" და მოქალაქეებს შორის შეტაკება მოხდა
• ოჩამჩირე, როგორც რუსული ფლოტის ბაზა - საქართველოს ოკუპირებულ რეგიონში რუსეთის საზღვაო ძალების ხომალდი დააფიქსირეს: რას წერს მედია