პარტნიორები:
ავტორი:

"იქცევა თუ არა კამალა ჰარისი მართლაც "ტრამპის რისხვად"? - ბრძოლა დაიწყო: ყველაფერი ექსპროკურორზე, რომელსაც აქვს შანსი აშშ-ის ისტორიაში პირველი ქალი პრეზიდენტი გახდეს

"იქცევა თუ არა კამალა ჰარისი მართლაც "ტრამპის რისხვად"? - ბრძოლა დაიწყო: ყველაფერი ექსპროკურორზე, რომელსაც აქვს შანსი აშშ-ის ისტორიაში პირველი ქალი პრეზიდენტი გახდეს

“არჩევნების დღემდე გვაქვს 107 დღე. ჩვენ ერთად ვიბრძოლებთ და ჩვენ ერთად გავიმარჯვებთ“, - აღნიშნული განცხადება აშშ-ის ვიცე-პრეზიდენტმა, კამალა ჰარისმა მას შემდეგ გაავრცელა, რაც ცნობილი გახდა, რომ 81 წლის ჯო ბაიდენმა ამერიკის საპრეზიდენტო არჩევნების რბოლა დატოვა.

ის ნოემბრამდე დარჩენილ დროს საპრეზიდენტო მოვალეობების შესრულებას დაუთმობს. ხოლო, “დემოკრატიული პარტიის“ კანდიდატურად მხარი კამალა ჰარისს დაუჭირა.

  • “თქვენს პრეზიდენტად მსახურება უდიდესი პატივი იყო. მიუხედავად იმისა, რომ ჩემი განზრახვა იყო ხელახლა მონაწილეობა, მე მჯერა, რომ ჩემი პარტიისა და ქვეყნის საუკეთესო ინტერესებშია გადგომა და ვადის დარჩენილი პერიოდის განმავლობაში, მხოლოდ ჩემი, როგორც პრეზიდენტის მოვალეობების შესრულებაზე, ფოკუსირება. მე ვესაუბრები ერს ამ კვირის ბოლოს უფრო დეტალურად ჩემი გადაწყვეტილების შესახებ", - წერს ბაიდენი წერილში, რომელიც მან თავის X -ის ანგარიშზე გამოაქვეყნა.

მალევე ბაიდენმა გაავრცელა მეორე განცხადებაც, რომელშიც აღნიშნავდა, რომ მხარს უჭერდა კამალა ჰარისს, როგორც დემოკრატების კანდიდატს აშშ-ს 2024 წლის საპრეზიდენტო არჩევნებში.

  • “ყველაფერს გავაკეთებ იმისათვის, რომ გავაერთიანო “დემოკრატიული პარტია“ და გავაერთიანო ჩვენი ერი, რათა დავამარცხოთ დონალდ ტრამპი. ამერიკელი ხალხის სახელით მადლობას ვუხდი ჯო ბაიდენს მისი არაჩვეულებრივი ლიდერობისთვის, შეერთებული შტატების პრეზიდენტის პოსტზე და ათწლეულების განმავლობაში ჩვენი ქვეყნისთვის გაწეული სამსახურისთვის. მისი შესანიშნავი მიღწევების მემკვიდრეობა შეუდარებელია ამერიკის თანამედროვე ისტორიაში და აღემატება მრავალი პრეზიდენტის მემკვიდრეობას, რომლებმაც ორი ვადით იმსახურეს“, - აღნიშნა ჰარისმა.

მისი თქმით, ბაიდენი ამერიკელ ხალხს და ამერიკას ყველაფერზე მაღლა აყენებს.

ბაიდენის გადაწყვეტილება მყისიერად შეაფასა მისმა პოლიტიკურმა კონკურენტმა, დონალდ ტრამპმა და CNN-ს განუცახადა, რომ ვიცე-პრეზიდენტ კამალა ჰარისის დამარცხება უფრო მარტივი იქნება, ვიდრე ბაიდენის.

  • თუმცა, ჰარისი არ არის ერთადერთი პოტენციური კანდიდატი. სხვა შესაძლო კანდიდატებს შორის მოისაზრებიან: მიჩიგანის გუბერნატორი გრეტჩენ უიტმერი, კალიფორნიის გუბერნატორი გევინ ნიუსომი და აშშ-ს ტრანსპორტის მდივანი პიტ ბუტიჯიგი.

კამალა ჰარისის კანდიდატურას მხარი უკვე დაუჭირეს კლინტონებმა.

“ახლა დროა დავდგეთ კამალა ჰარისთან და ვიბრძოლოთ ყველანაირად იმისთვის, რომ მისი კანდიდატურა დამტკიცდეს“, - დაწერეს ბილ და ჰილარი კლინტონებმა X-ზე.

კამალასთვის დემოკრატების ასეთი მხარდაჭერა ხუთი წლის წინ, 2019 წლის შემოდგომაზე, ნამდვილად საოცნებო იყო. ის 2020 წლის საპრეზიდენტო არჩევნებში მონაწილეობდა, თუმცა მას შემდეგ რაც კრიტიკის ობიექტი გახდა და მხარდაჭერა ვერ მოიპოვა, ჰარისმა მოხსნა კანდიდატურა და სამი თვის შემდეგ გამოაცხადა, რომ მხარს დაუჭერდა ბაიდენს. 2020 წელს კი, ჯო ბაიდენის გამარჯვების შემდეგ, ამერიკის ვიცე - პრეზიდენტი გახდა. აღსანიშნავია, რომ დონალდ ტრამპის მიმართ მისი კრიტიკული განცხადებების გამო, მას წინა არჩევნებისას "ტრამპის რისხვაც" კი უწოდეს?

ჰარისმა დონაციის მსურველებს უკვე მიმართა და მისთვის შემოწირულობის სახით მხარის დაჭერა სთხოვა. აშშ-ის კანონმდებლობის მიხედვით, მას არ შეუძლია ბაიდენისთვის შეგროვებული თანხის გამოყენება.

შემოწირულობის პლატფორმამ ActBlue-მა უკვე გაავრცელა ინფორმაცია, რომ მას შემდეგ, რაც კამალა ჰარისის კანდიდატურას ბაიდენმაც მხარი დაუჭირა, დაახლოებით ერთ დღეში 46,7 მილიონი დოლარი შეგროვდა.

  • ვინ არის კამალა ჰარისი?

ამერიკელი პოლიტიკოსი, სამართალმცოდნე, ადვოკატი კამალა ჰარისი 1964 წლის 20 ოქტომბერს აშშ-ში, ოკლაჰომას შტატში დაიბადა. კამალამ "ჰოვარდისა" და "კალიფორნიის" უნივერსიტეტები დაამთავრა და ადვოკატის კარიერა ქალაქ ალამედაში, საოლქო ადვოკატად დაიწყო. შემდეგ სან-ფრანცისკოს საოლქო ადვოკატი, მოგვიანებით კი სან-ფრანცისკოს საქალაქო ადვოკატი გახდა. 2003 წელს იგი აირჩიეს სან-ფრანცისკოს 27-ე საოლქო ადვოკატად.

2010 წელს ჰარისი კალიფორნიის გენერალური პროკურორი გახდა. მას ხშირად აკრიტიკებდნენ გატარებული რეფორმების გამო. შეიძლება ითქვას, რომ კრიმინალურ პოლიციაში არსებული ვითარება კამალამ მნიშვნელოვნად შეცვალა.

2016 წლის ნოემბერში ჰარისმა ლორეტა სანჩესი დაამარცხა და კალიფორნიის მესამე ქალი სენატორი გახდა. იგი პირველი აფრო-ამერიკელი და პირველი აზიელი ამერიკელი ქალია, რომელიც სენატში მოხვდა.

  • რთული ბავშვობა...

კამალა ჰარისის დედა, შამალა გოპალანი ინდოეთიდან აშშ-ში მიგრირებული ექიმია. ამერიკაში ჩამოსვლის შემდეგ, გოპალანიმ გადამზადების კურსები გაიარა და ენდოკრინოლოგიის განხრით ასოცირებული პროფესორის წოდებაც მოიპოვა. მამა - დონალდ ჰარისი იამაიკაში დაბადებული, ამერიკაში მიგრირებული ეკონომიკის პროფესორია.

როდესაც კამალა 7 წლის იყო, მისი მშობლები დაშორდნენ. მოგვიანებით, ვიცე-პრეზიდენტობის კანდიდატმა მის ბიოგრაფიულ წიგნში დაწერა:

"უქმეებზე მე და ჩემი უმცროსი და მამას სანახავად მივდიოდით. უბანში ბავშვები არათუ არ გვეთამაშებოდნენ, არც კი გვესაუბრებოდნენ, რადგან მუქი ფერის კანი გვქონდა“

  • პირადი ცხოვრება

კამალა ჰარისის მეუღლე 54 წლის სამართალმცოდნე დუგლას ემჰოფია.

წყვილი ოფიციალურად 2014 წელს დაქორწინდა. დუგლას ემჰოფი ბრუკლინში დაიბადა. დაამთავრა სამხრეთ კალიფორნიის გოლდენის სამართლის სკოლა. ამჟამად იგი ერთ-ერთი დიდი კომპანიის DLA Piper Law Firm-ის ბიზნესპარტნიორია. დუგლასი ასევე კომპანია Emhoff-ის დამფუძნებელია, იგი საერთაშორისო კორპორაციებს უძრავი ქონების და ინტელექტუალური საკუთრების სამართალწარმოების დავებში ეხმარება. კამალა ჰარისი დუგლასის მეორე ცოლი და ელა და ჯონ ემჰოფების დედინაცვალია. წყვილს საერთო შვილი არ ჰყავს.

კამალა ჰარისი არის პირველი აფრო-ამერიკელი და პირველი აზიელი - ამერიკელი ქალი, რომელიც სენატში მოხვდა და ვიცე-პრეზიდენტობის შემდეგ, აშშ-ის პრეზიდენტობისთვის იბრძოლებს.

ასევე იხილეთ:

ტეგები თემაზე: