დაქირავებული "ჩრდილები", ტელეფონების აკრძალვა და ცირკის მასტერი ქაოსის სამართავად - რა ჯდება და როგორ დაიგეგმა მსოფლიოს უმდიდრესი ადამიანების ქორწილი
წლის ქორწილი ახლოვდება. მდიდრული წინასაქორწინო ზეიმის შემდეგ, რადჰიკა მერჩანტი და ანანტ ამბანი, აზიის უმდიდრესი კაცის უმცროსი ვაჟი, პარასკევს მუმბაიში დაქორწინდებიან.
- მათი სტუმრები, რომელთა შორისაც აქამდე იყვნენ ბოლივუდის მსახიობები, ინდოელი კრიკეტისტები და საერთაშორისო ბიზნეს ლიდერები, ასევე შაბათის ღონისძიებებს და კვირის მიღებას დაესწრებიან.
წინასაქორწინო ღონისძიების დროს მარტში, ამბანიმ განაცხადა, რომ დედამისი წვეულებების წინა ოთხი თვის განმავლობაში დღეში 18 საათს მუშაობდა.
"ეს ყველაფერი დედაჩემმა შექმნა და არავინ სხვამ, ყველაფერი დედაჩემმა გააკეთა ბოლო ოთხი თვის განმავლობაში," - თქვა ამბანიმ.
ასევე, Business Insider-თან საუბრისას ქორწილის დაგეგმვაში ჩართულმა ოთხმა პირმა აღნიშნა, რომ ასეთი ღონისძიების დაგეგმვას მთელი სოფელი სჭირდება. BI-სთან მოსაუბრეებმა განაცხადეს, რომ ტიპური მრავალდღიანი ქორწილი, რომელსაც ისინი გეგმავენ, 5-დან 10 კრორ ინდურ რუპიამდე ღირს, ანუ დაახლოებით 1.2 მილიონი დოლარი. კრორი ინდური ტერმინია 10 მილიონისთვის; 1 კრორი რუპია დაახლოებით 120,000 დოლარია.
ერთ-ერთი რესპონდენტის თანახმად, იქნება ეს ამბანის მსგავსი დიდი ქორწილი თუ საშუალო კლასის ოჯახის ქორწილი, ინდურ ქორწილში მთავარი ხარჯების განაწილება დაახლოებით ერთნაირია.
- დელიში დაფუძნებული ქორწილის დაგეგმარების კომპანია The Event Designer-ის დამფუძნებელმა, ნიშიტა აგარვალმა აღნიშნა, რომ ბიუჯეტის დაახლოებით 40%-50% მიდის ადგილმდებარეობაზე, რაც მოიცავს ოთახებს სტუმრებისთვის. მისივე თქმით, ხარჯების 25%-30% დეკორაციებზე მოდის, რაც მოიცავს ყვავილების კომპოზიციებს იატაკიდან ჭერამდე.
დაახლოებით 10% იხარჯება გართობაზე. წინასაქორწინო ღონისძიებებისთვის ბოლო თვეების განმავლობაში ამბანებმა დაიქირავეს რიანა, ჯასტინ ბიბერი, კეტი პერი, The Backstreet Boys და პიტბული.
როგორც პურვი მოდგილმა, მუმბაიში დაფუძნებულმა ქორწილის დამგეგმავი კომპანიის წარმომადგენელმა აღნიშნა, სხვა ოჯახები ბევრს ხარჯავენ არტისტებზე, მათ შორის მომღერლებზე და ცნობილ დიჯეებზე.
დარჩენილი 10% ჩვეულებრივ მიდის საქორწილო საჩუქრებსა და ლოჯისტიკაზე ოჯახისა და სტუმრებისთვის.
"ახლა, როდესაც საქმე მაღალი შემოსავლის მქონე ან ცნობილი ადამიანის ქორწილს ეხება, ყველაფერი 10-ჯერ ან 100-ჯერ აღემატება" ამ ღირებულებას", - თქვა აგარვალმა. მისი თქმით, "ბიუჯეტზე შეზღუდვა არ არსებობს".
მგეგმავების შეფასებები ამბანის ქორწილის ხარჯებზე ძალიან განსხვავდებოდა და ათეულ მილიონობით დოლარიდან ასეულ მილიონ დოლარამდე მერყეობდა.
ანანტის უფროსმა დამ, იშა ამბანმა 2018 წელს ანალოგიურად მდიდრული ქორწილი გადაიხადა, მათ შორის, ბიონსეს შესრულებით. მაშინ, როდესაც მედიასაშუალებები 100 მილიონი დოლარის ღირებულებაზე სპეკულირებდნენ, ამბანის მფლობელობაში არსებული კომპანიის Reliance-ის წარმომადგენელმა განაცხადა, რომ ის 15 მილიონ დოლარზე ნაკლები დაჯდა.
აგარვალის თქმით, ბევრ წყვილს არ სურს თავიანთი ქორწილის ჩატარება იმ ადგილებში, სადაც სხვა მაღალი პროფილის ოჯახებს უკვე ჩაუტარებიათ ქორწილები.
"მათ სურთ, ყველაფერი ექსკლუზიური იყოს. დეკორაცია უნდა იყოს ისეთი, რაც არავის არასდროს უფიქრია. ეს თითქმის დიდი კინოს გადასაღები მოედნის მსგავსია.
დიდი ცნობილი ადამიანის ქორწილისთვის, დამგეგმავები თავიანთ პერსონალს გუნდებად ყოფენ და ცერემონიის დღეს და მის წინა დღეს ასობით დამატებით ადამიანს ქირაობენ.
მზარეულებთან, მიმტანებთან, განათებისა და აუდიო გუნდებთან და დეკორატორებთან ერთად, ღონისძიებაზე დაახლოებით 500 ადამიანი მუშაობს", აღნიშნა მოდგილმა.
დამგეგმავები ასევე ნიშნავენ მსახურებს ოჯახის თითოეული მთავარი წევრისთვის. ეს თანამშრომლები, რომლებსაც "ჩრდილებს" უწოდებენ, იჭერენ მათ ტელეფონებს და საჩუქრებს და უზრუნველჰყოფენ, რომ ყველაფერი ჰქონდეთ, რაც დასჭირდებათ.
მუმბაელმა ქორწილის დამგეგმავმა, დარშან შროფმა განაცხადა: "თითოეული ქორწილისთვის 70-ზე მეტ მომწოდებელთან და ვენდორთან ვმუშაობთ. მომწონს ინდოეთში ქორწილის დამგეგმავების აღწერა, როგორც ცირკის მასტერების".
ბევრი ცნობილი ან ინფლუენსერი წყვილი განსაკუთრებით ყურადღებით ეკიდება იმას, თუ როგორ არის წარმოჩენილი მათი ქორწილი ახალ ამბებსა და სოციალურ მედიაში.
დიდ ქორწილებში ასევე აგროვებენ სტუმრების ტელეფონებს კონფიდენციალურობის მიზნით, და წყვილებს ჰყავთ გუნდები, რომლებიც მედიასთან მუშაობენ.
"არ შეიძლება ბევრი ადამიანი სურათებს იღებდეს. ეს მათ ძალიან უხერხულად აგრძნობინებს თავს", - აღნიშნა მოდგილმა ცნობილი სტუმრებისა და წყვილების შესახებ.
უსაფრთხოების გეგმებს წამყვანი უსაფრთხოების ფირმები და ადგილობრივი ხელისუფლებაც კი გეგმავს.
"როგორც კი ცნობილ ადამიანებს ეხება საქმე, იქნება ეს პოლიტიკოსები თუ ბოლივუდი, უსაფრთხოება ძალიან მნიშვნელოვანი ხდება. ცალკე ადამიანები გვყავდა, რომლებიც მათ აცილებდნენ და უკანაც კი აბრუნებდნენ, რადგან ზოგჯერ მათ ბრბოც კი თავს ესხმის", - განაცხადა მოდგილმა.
ოჯახებისა და მათი სტუმრების დაკმაყოფილება ყოველთვის ადვილი არ არის.
აგარვალის თქმით, მან დაგეგმა ქორწილები, სადაც ცნობილი სტუმრები რეკავდნენ იმის დასადასტურებლად, თუ რა ტიპის სასტუმროს ნომერში დარჩებოდნენ და რა მანქანა მოვიდოდა მათ წასაყვანად. ყველაფერი მათი ცხოვრების სტილის სტანდარტს უნდა შეესაბამებოდეს.
ამბანის ქორწილი უკვე ახდენს გავლენას იმაზე, თუ როგორ წარმოიდგენენ და გეგმავენ სხვა ინდოელები თავიანთ ქორწილებს.
დამგეგმავებმა BI-ს უთხრეს, რომ პატარძლები მათ იმავე დიზაინერების სამოსს სთხოვენ, რომლებიც რადჰიკა მერჩანტმა თავის წინასაქორწინო ღონისძიებებზე ჩაიცვა. ასეთებია Abu Jani Sandeep Khosla-ს და Tarun Tahiliani-ს მიერ შექმნილი ინდივიდუალური ლეჰენგასი.
დამგეგმავები ვარაუდობენ, რომ მთავარი ქორწილი კიდევ უფრო დიდ კვალს დატოვებს.
"იმის გათვალისწინებით, თუ რა უზარმაზარი გავლენა აქვთ ცნობილ ადამიანებს, მათი ქორწილები ხშირად ხდება მომავალი ზეიმების შაბლონები მთელ მსოფლიოში," თქვა ბჰარატ ჯაგასიამ, ქორწილის დამგეგმავმა დელიში.
"ამბანის ქორწილისთვის, განსაკუთრებით მაინტერესებს, როგორ განასხვავებენ მთავარ ღონისძიებას მათი წინასაქორწინო ფუნქციებისგან," - აღნიშნა მან.
ზეიმი პარასკევს, Jio World Convention Centre-ში დაიწყება, რომელიც ამბანის ოჯახის საკუთრებაშია. მას 16,000-ზე მეტი სტუმრის მიღება შეუძლია.
წაიკითეთ ასევე: