სიკვდილით დასჯა მიესაჯა ISIS-ის ლიდერის ქვრივს - რას უკავშირდება უმძიმესი განაჩენი და რა არის ცნობილი ჰუდაიფაზე, რომლის ქმარმა თავი შვილებთან ერთად აიფეთქა
ჯიჰადისტური დაჯგუფება "ისლამური სახელმწიფოს" ლიდერის, აბუ ბაქრ ალ-ბაღდადის ქვრივს, უმ ჰუდაიფას ერაყის სასამართლომ სიკვდილით დასჯა მიუსაჯა.
ის სასამართლო დოკუმენტებში მოხსენიებულია როგორც ასმა მუჰამედი, მაგრამ ცნობილია, როგორც უმ ჰუდაიფა.
- ისლამისტური სახელმწიფოს ქვრივი 2018 წელს თურქეთში დააკავეს, სადაც ის ყალბი სახელით ცხოვრობდა. 2024 წლის თებერვალში ექსტრადირებული იქნა ერაყში, სადაც მის წინააღმდეგ გამოძიება დაიწყო ტერორიზმთან დაკავშირებული დანაშაულების ბრალდებით.
ბაღდადის სისხლის სამართლის სასამართლომ ქვრივი დამნაშავედ ცნო ექსტრემისტულ ორგანიზაციის დახმარებასა და იეზიდი ქალების იძულებითი ტყვეობის ხელშეწყობაში.
ამ დროისთვის ბრალდებულის ადვოკატს უმ ჰადაიფას სიკვდილით დასჯაზე კომენტარი არ გაუკეთებია. უცნობია, აქვს თუ არა დაცვის მხარეს გასაჩივრების შესაძლებლობა.
ერაყის ციხიდან BBC-სთან მიცემულ ექსკლუზიურ ინტერვიუში, უმ ჰუდაიფამ აღიარა, რომ 2014 წლის ზაფხულში მისმა ქმარმა ცხრა იეზიდი გოგონა მასთან სახლში მიიყვანა, მაგრამ მისი თქმით, მას არანაირი გავლენა არ ჰქონდა ქმრის ქმედებებზე.
ერაყში ისლამური სახელმწიფოს სისასტიკეების მწვერვალზე ისლამისტებმა ათასობით ეთნიკური იეზიდი, მათ შორის ქალები და ბავშვები დახოცეს.
BBC-მ ჩაწერა რამდენიმე მსხვერპლი, რომლებიც ისლამური სახელმწიფოს მონობას გადაურჩნენ. ისინი აცხადებდნენ, რომ უმ ჰუდაიფა თანამონაწილე იყო იეზიდი ქალების მონობის.
”ის იყო პასუხისმგებელი ყველაფერზე. მან არჩევანი გააკეთა - ის ემსახურებოდა ქმარს“, - განუცხადა BBC-ს ერთ-ერთი ტყვე ქალის დამ, რომელიც IS-ის ლიდერმა საკუთარ სახლში მიიყვანა. "ის არის კრიმინალის აბუ ბაქრ ალ-ბაღდადის ცოლი და ისიც მასავით კრიმინალია."
ბოლო წლებში ერაყის სასამართლომ ასობით სასიკვდილო განაჩენი და სამუდამო პატიმრობა მიუსაჯა მამაკაცებსა და ქალებს, რომლებიც მსჯავრდადებულნი არიან „ტერორისტული ორგანიზაციის წევრობისთვის“.
უფლებადამცველი ჯგუფები აცხადებს, რომ სასამართლო პროცესები ხშირად ნაჩქარევად ტარდება და წამების დროს აღებულ ჩვენებებს ეფუძნება.
პირველი ცოლი
უმ ჰუდაიფა იყო ალ-ბაღდადის პირველი ცოლი იმ დროს, როდესაც ტერორისტი ისლამური სახელმწიფოს ოპერაციებს ხელმძღვანელობდა ერაყსა და მეზობელ სირიაში.
2019 წელს, რეგიონში ტერორისტული ჯგუფის მარცხიდან რამდენიმე თვის შემდეგ, ამერიკულმა ძალებმა ალ-ბაღდადის ჩრდილო-დასავლეთ სირიაში სამალავი დაარბიეს. იქ კაცი ოჯახის რამდენიმე წევრთან ერთად იმალებოდა.
- ისლამური სახელმწიფოს ლიდერმა, რომელიც ერთ-ერთ გვირაბში იყო ჩარჩენილი, ასაფეთქებელი ქამრის საშუალებით როგორც საკუთარი თავი, ასევე ადგილზე მყოფი ორი შვილი ააფეთქა. აფეთქების დროს ალ-ბაღდადის ოთხი ცოლიდან ორი დაიღუპა.
უმ ჰუდაიფა იმ მომენტში თურქეთის სამხრეთით იმყოფებოდა, სადაც ყალბი სახელით ცხოვრობდა. ქვრივი მალევე დააკავეს. მიმდინარე წლის თებერვალში იგი ერაყში გადაიყვანეს და საპატიმროში მოათავსეს.
გაეროს გამომძიებლები აცხადებენ, რომ მათ აქვთ დამაჯერებელი მტკიცებულება იმისა, რომ ისლამურმა სახელმწიფომ ჩაიდინა გენოციდი და სხვა დანაშაულები იეზიდი რელიგიური უმცირესობის წინააღმდეგ. მათ უყენებდნენ ულტიმატუმს, მიეღოთ ისლამი ან დაიხოცებოდნენ.
იეზიდური საზოგადოების ათასობით წევრი აწამეს, მათზე იძალადეს, გაიტაცეს და სიკვდილით დასაჯეს.
უმ ჰუდაიფას სასამართლო პროცესზე პროკურატურამ ასევე ისაუბრა 2014 წელს ისლამური სახელმწიფოს მიერ მოწყობილ ხოცვა-ჟლეტაზე, რომლის დროსაც დაახლოებით 1700 ერაყელი ჯარისკაცი, ძირითადად შიიტი მუსლიმები მოკლეს.
ქვრივი ამბობდა, რომ ის ყოველთვის საყვედურობდა ქმარს „უდანაშაულო ხალხის სისხლისთვის“ და რომ „რცხვენია“ ყველაფრის, რაც იეზიდი ქალების შემთხვევაში მოხდა და განსაკუთრებით იმ ცხრა ქალის, ვინც მის სახლში მოხვდა.
წაიკითხეთ ასევე: