მუსიკოსი "ლეიბორისტი" 6 პუნქტიანი გეგმით და თამამი დაპირებებით - ვინ არის დიდი ბრიტანეთის ახალ პრემიერი, რომელმაც ევროკავშირთან ურთიერთობების გადახედვა დააანონსა

დიდ ბრიტანეთში მიმდინარე ვადამდელმა საპარლამენტო არჩევნებმა, რომელიც მიმდინარე წლის 4 ივლისს გაიმართა, ქვეყნის პოლიტიკური კურსი საგრძნობლად შეცვალა. ინგლისის, შოტლანდიის, უელსისა და ჩრდილოეთ ირლანდიის 650 ოლქში 40 000 საარჩევნო უბანი ადგილობრივი დროით 7:00 საათზე გაიხსნა. არჩევნებში 4 515 კანდიდატი მონაწილეობდა.

არჩევნების დასრულების შემდეგ ცხადი გახდა, რომ დიდი ბრიტანეთის პარლამენტში უმრავლესობის მოსაპოვებლად 326 მანდატიდან, თემთა პალატაში “ლეიბორისტებმა“ 410 მანდატი მიიღეს. “კონსერვატიულმა პარტიამ“ 131 მანდატი მოიპოვა. ხოლო ლიბერალ დემოკრატებს თემთა პალატაში 61 წარმომადგენელი ეყოლება. რაც შეეხება შოტლანდიის ნაციონალურ პარტიას, ის 10 მანდატით იქნება წარმოდგენილი.

შედეგები მყისიერად აღიარა გაერთიანებული სამეფოს მოქმედმა პრემიერ-მინისტრმა, რიში სუნაკმა და ბრიტანეთის ახალ პრემიერს - კირ სტარმერს გამარჯვება მოულოცა. მისი თქმით, მის პარტიას რთული ღამე ჰქონდა. მეფე ჩარლზმა “ლეიბორისტული პარტიის“ ლიდერი, კირ სტარმერი გაერთიანებული სამეფოს პრემიერ-მინისტრად ოფიციალურად დანიშნა.

"დიახ, ჩვენ ეს შევძელით! თქვენ ამისთვის ჩაატარეთ კამპანია, იბრძოლეთ ამისთვის, მიეცით ხმა და ახლა მოვიდა. ცვლილება ახლა იწყება ოთხწელიწადნახევრიანი მუშაობა პარტიის შეცვლაზე. შეცვლილი ლეიბორისტული პარტია, რომელიც მზად არის ემსახუროს ჩვენს ქვეყანას, მზადაა დააბრუნოს ბრიტანეთი მშრომელი ხალხის სამსახურში“, - აღნიშნა კირ სტარმერმა ოფიციალურ ბრიფინგზე.

"მიუხედავად იმისა, მიეცით თუ არა ხმა "ლეიბორისტებს“, პირდაპირ გეუბნებით: ჩემი მთავრობა მოგემსახურებათ თქვენ. პოლიტიკა შეიძლება იყოს სიკეთის ძალა. ჩვენ ამას ვაჩვენებთ. ჩვენ შევცვალეთ "ლეიბორისტული პარტია", დავაბრუნეთ იგი ქვეყნის სამსახურში და სწორედ ასე ვმართავთ: პირველია ქვეყანა, მეორე - პარტია. ამიერიდან თქვენ გყავთ მთავრობა, რომელიც ხელმძღვანელობს მხოლოდ მტკიცე გადაწყვეტილებით, რომ თქვენს ინტერესებს ემსახუროს. თქვენ მოგვეცით მკაფიო მანდატი და ჩვენ მას გამოვიყენებთ ცვლილებების განსახორციელებლად. ჩვენი საქმე გადაუდებელია და დღესვე ვიწყებთ“, - აღნიშნა კეირ სტარმერმა მოსახლეობის წინაშე პრემიერ-მინისტრის რანგში პირველად წარდგენისას.

სტარმერმა პრემიერ- მინისტრის უფლებამოსილების მიღების პირველივე დღეებში დააფიქსირა პოზიცია რუსეთ - უკრაინის საომარი მოქმედებების თაობაზე. ის ვოლოდიმირ ზელენსკის ტელეფონით ესაუბრა და მოგვიანებით გაავრცელა განცხადება, რომ “უკრაინის მიმართ დიდი ბრიტანეთის მხარდაჭერა ურყევი რჩება“.

• 6 საკითხი, რისი გამოსწორებაც დიდი ბრიტანეთის პრემიერ მინისტრს მისი მოღვაწეობის პირველივე თვეებში სურს

როგორც ჩანს სტარმერი საკმაოდ პრინციპული პოლიტიკური მოთამაშეა. მან პრემიერ- მინისტრის რანგში გამართული პირველი ოფიციალური ბრიფინგის ფარგლებში იმ მნიშვნელოვან საკითხებზე ისაუბრა, რაც მისი თქმით შესაცვლელია.

"მესიჯი ნათელი იყო, ცვლილებეზე მუშაობა დაუყოვნებლივ იწყება", - წერს politico და სტრამერის სიტყვიდან 6 ძირითად დაპირებას გამოყოფს. მან კი პირობა დადო, რომ “ააშენებს“ ქვეყანას, შეცვლის საჯარო სერვისებისა და ეკონომიკას.

სტრამერის თქმით, სასიკეთო ცვლილებები შევა ქვეყნის საიმიგრაციო პოლიტიკაში, ჯანდაცვის სისტემაში, პენიტენციურ სისტემაში, განხორციელდება დაგეგმილი რეფორმები, გადაიხედება უთიერთობები მეზობელ და სხვა ქვეყნებთან, გადაიხედება ურთიერთობები ევროკავშირთან.

• ბიოგრაფია

კერ სტარმერი 1962 წლის 2 სექტემბერს, ლონდონში დაიბადა. როგორც ცნობილია, მისი მშობლები “ლეიბორისტული პარტიის“ მხარდამჭერები იყვნენ და გავრცელებული ინფორმაციით, შვილსაც სახელი მაშინდელი პარტიის პირველი საპარლამენტო ლიდერის, კირ ჰარდის პატივსაცემად დაარქვეს.

სტრამერი კარგი მოსწავლე იყო. სტუდენტობისას სტიპენდია მოიპოვა და მშობლებს განათლებაში ფინანსების ჩადება თავიდან აარიდა. თინეიჯერობის წლებში ის აქტიური იყო “ლეიბორისტულ“ პოლიტიკაში; 16 წლის ასაკში “ლეიბორისტული პარტიის“ ახალგაზრდა სოციალისტების წევრი იყო. უკრავდა ფლეიტაზე, ფორტეპიანოზე და ვიოლინოზე.

2014 წლის დეკემბერში დეპუტატის ფრენკ დოდსონის გადადგომის შემდეგ, სტარმერი “ლეიბორისტული პარტიის“ კანდიდატად აირჩიეს. სტარმერი 2020 წლის იანვარში პარტიის ლიდერი გახდა. იმ პერიოდში “ლეიბორისტული პარტია“ დაშორდა მემარცხენე პოზიციებს. 2023 წლის თებერვალში სტარმერმა შეიმუშავა ხუთი “ეროვნული მისიის“ ნაბიჯი - ეს ეხება გრძელვადიან მიზნებს ეკონომიკის, კრიმინალის, ჯანდაცვის ეროვნულ სამსახურის (NHS), განათლებისა და კლიმატის კრიზისს.

ის მეუღლეზე, ვიქტორია სტარმერზე 2007 წელს დაქორწინდა. ვიქტორია პროფესიით იურისტია. წყვილს ჰყავს ვაჟი და ქალიშვილი. წყვილის შესახებ დეტალები უცნობია, როგორც მედია წერს, ისინი 13 წლის ვაჟს, ტობის და 11 წლის ქალიშვილს ზრდიან. ჩრდილოეთ ლონდონში მდებარე სახლი კი, სადაც ოჯახი ცხოვრობდა 1,75 მილიონ ფუნტ სტერლინგად არის შეფასებული.