"მიიტანა შეკვეთა და ვიღაც მთვრალმა კაცებმა სცემეს და მერე დაახალეს ჯერი. დაფშვნილია ძვლები ფეხის თითების, ტერფები..." - რას წერს დაჭრილი კურიერის ნათესავი, ჟურნალისტი სალომე გოგოხია
თბილისში "გლოვოს" კურიერი დაჭრეს. არსებული ინფორმაციით, კურიერს, შეკვეთის მიტანის შემდეგ მომხდარი სიტყვიერი შელაპარაკების გამო, ჯერ ფიზიკურად გაუსწორდნენ, შემდეგ კი, პნევმატური იარაღიდან ესროლეს.
- დაჭრილი მამაკაცი სიმონ ხეჩინაშვილის სახელობის კლინიკაშია გადაყვანილი. დაჭრილის ნათესავია ჟურნალისტი სალომე გოგოხია, რომელიც მისი მდგომარეობის შესახებ ინფრომაციას სოციალურ ქსელში ავრცელებს.
"მადლობა ყურადღებისთვის და გამხნევებისთვის . დიდი ჭიდილის შემდეგ კლინიკამ დაიტოვა პაციენტი, ჩემს თვალწინ გაუკეთდა გადახვევა და დაჭრიდან ორი საათის შემდეგაც სისხლი სდიოდა დაზარალებულს და ამ ფონზე ლოგიკას ცდება ხეჩინაშვილის კლინიკის გადაწყვეტილება, რომ ასეთ პაციენტს გვატანდნენ სახლში! ახლა გაირკვა თურმე რომ ადგილზე მოიწვევენ ხვალ მიკრო ქირურგს, ანგიოლოგსაც.. თურმე საჭირო და შესაძლებელი ყოფილა სპეციალისტის მოწვევა. სჭირდება ოპერაცია რომ მოხდეს ტერფის რეკონსტრუქცია და თითების ამპუტაცია აირიდოს. თქვენ შეაფასეთ ახლა რა ქვეყანაში ვცხოვრობთ და რა ნებისყოფა გჭირდება ბრძოლისთვის, რომ ახლობელი გადაარჩინო და მის ჯანმრთელობას საფრთხე არ შეექმნას!
დამატებითი დეტალები ხვალ გვეცოდინება. რაც შეეხება სავარაუდო დამნაშავეებს, ჩემს ხელთ არსებული ინფორმაციით, ამ დრომდე არავინაა დაკავებული. წესით არ უნდა გაუჭირდეს მათ კვალზე გასვლა პოლიციას, აქვთ საკმარისი სამხილები და მტკიცებულებები. და აქვე, ეს ყველაფერი მოხდა ნუცუბიძეზე, ხალხმრავალ ადგილზე, ხედავდნენ ჩხუბს, სროლას და მათში ერთი ადამიანიც არ მოიძებნა ვინც112-ზე დარეკავდა.
ხალხო, ნებისმიერი შეიძლება მსგავს ვითარებაში აღმოვჩნდეთ და ჩვენ მაინც დავინდოთ და დავეხმაროთ ერთმანეთს, ზოგჯერ ერთი ზარია გადამწყვეტი სიცოცხლის გადასარჩენად და გადავარჩინოთ, ნუ გავწირავთ ერთმანეთს თორემ ხელისუფლებამ რომ გაგვწირა და განუკითხაობაა კი ხედავთ ყველა. ახლა ვიმყოფები ხეჩინაშვილის კლინიკა ში, სადაც წევს ჩემი მამიდაშვილი, დაჭრილი წევს. ჯერი დაახალეს დღისით, მზისით შუა ქალაქში, გლოვოს კურიერია და მიიტანა შეკვეთა და ვიღაც ნაბიჭვარმა მთვარალმა კაცებმა და კაიფში მყოფებმა სცემეს და მერე დაახალეს ჯერი. დაფშვნილია ძვლები ფეხის თითების, ტერფები", - წერს სალომე გოგოხია.
- როგორც "ინტერპრესნიუსს" შინაგან საქმეთა სამინისტროში განუცხადეს, მომხდართან დაკავშირებით გამოძიება სისხლის სამართლის კოდექსის 120-ე მუხლით მიმდინარეობს, რაც ჯანმრთელობის განზრახ მსუბუქ დაზიანებას გულისხმობს.
ნახეთ ასევე: