ფერფლის ღრუბელი და გადადებული ფრენები - კადრები სიცილიიდან, სადაც ევროპის ერთ-ერთი ყველაზე აქტიური ვულკანი ამოიფრქვა

სიცილიაში ევროპის ერთ-ერთი ყველაზე აქტიური ვულკანი ეტნა ამოიფრქვა. ადგილობრივი მედიის ცნობით, ბოლო რამდენიმე დღის განმავლობაში აქტივობა საკმაოდ გაიზარდა, ეს განსაკუთრებით შესამჩნევი იყო ვორაჟინის კრატერში.

იტალიის გეოფიზიკისა და ვულკანოლოგიის ეროვნული ინსტიტუტის (INGV) რეგიონული ოფისის შეფასებით, ეტნადან ამოსულმა ფერფლმა დაახლოებით 4,5 კილომეტრის (2,7 მილი) სიმაღლეს მიაღწია და სამხრეთ-აღმოსავლეთის მიმართულებით მოძრაობდა.

• ფერფლის ღრუბლების გამო, შეიზღუდა ფრენები. ვულკანური აქტივობის გამო გაფრთხილება პრემიერ-მინისტრის აპარატთან დაკავშირებულმა სამოქალაქო დაცვის დეპარტამენტმაც გაავრცელა.

ეტნა ამჟამად ყველაზე მაღალი და ყველაზე აქტიური ვულკანია ევროპაში. მისი სიმაღლის მითითება ზუსტად შეუძლებელია, ვინაიდან ის მუდამ იცვლება ამოფრქვევებისა და შლაკების ამოსხმის გამო. ეტნას 400-მდე გვერდითი კრატერი და მრავალი ლავური ნაკადი აქვს.

სტატისტიკურად ვულკანი 150 წელიწადში ერთხელ რომელიმე დასახლებას ანადგურებს. თუმცა გაცივებული ლავის გამო ეტნის გარშემო ნიადაგი განსაკუთრებით ნაყოფიერია და მის კალთებზე ხილს, ზეთისხილსა და ვენახს აშენებენ. ვულკანის ამოფრქვევა ჯერ კიდევ უძველეს ხანებში დასტურდება. ანტიკური ხანის ავტორები ასახელებენ ძვ. წ. 479 და 425 წლებს.

2013 წელს ვულკანი მსოფლიო მემკვიდრეობის სიაში შეიყვანეს.