"ჩვენთვის, ქართველებისთვის საქართველო წმინდაა. ვაპირებთ მის დაცვას სისხლის ბოლო წვეთამდე" - ესპანური გამოცემა გიორგი ქოჩორაშვილთან ინტერვიუს აქვეყნებს
საქართველოს ეროვნული ნაკრებისა და ესპანური კლუბის "ლევანტეს" ფეხბურთელთან, გიორგი ქოჩორაშვილთან ინტერვიუს გამოცემა avozdegalicia.es აქვეყნებს
გიორგიმ ინტერვიუში საქართველოს შესახებ ისაუბრა.
"ჩვენ ქართველებს გვიყვარს დიდი ოცნებები. საქართველო საოცარი ადგილია. პრობლემები რა თქმა უნდა, გვაქვს, მაგრამ ხალხი მშვენიერი, მოსიყვარულე და შრომისმოყვარეა.
ჩვენმა მშობლებმა ყველაფერი გააკეთეს იმისთვის, რომ გვქონდეს კარგი ცხოვრება,.მათ ყველაფერი გააკეთეს, რომ კარგი ადამიანები ვყოფილიყავით.
ჩვენთვის, ქართველებისთვის საქართველო წმინდაა. ვაპირებთ მის დაცვას სისხლის ბოლო წვეთამდე, რადგან მას გულით ვატარებთ.
ჩვენ ვართ პატარა ქვეყანა, სადაც იყო ომი, მაგრამ გვაქვს ჩვენი ენა, დამწერლობა. ბევრი რამ შევინარჩუნეთ ქვეყნის მიმართ ჩვენი ამგვარი დამოკიდებულების გამო. ჩვენ ვიბრძვით და ვამაყობთ. ყველაფერს ვაკეთებთ იმისთვის, რაც გვიყვარს. ვფიქრობთ მშობლებზე, შვილებზე და მთელ ოჯახზე.
ჩვენ თავისუფალ ქვეყანაში გავიზარდეთ და სკოლაში გავიგეთ, რომ ჩვენი ქვეყნის დასაცავად მიდიოდნენ და იღუპებოდნენ, შეძლეს ჩვენი რელიგიის, ენისა და მიწის შენარჩუნება. ამ ბრძოლის გადმოცემას ჩვენ საფეხბურთო მოედანზე ვცდილობთ", - აღნიშნა ქოჩორაშვილმა.