ეს დაუჯერებელია: საქართველომ კიდევ ერთი ისტორიული გამარჯვება მოიპოვა - პირველივე ევროპის ჩემპიონატზე მერვედფინალში გავედით
ევროპის ჩემპიონატის ბოლო, მესამე ტურში, F ჯგუფში საქართველოს ნაკრები პორტუგალიას დაუპირისპირდა და დაამარცხა ანგარიშით 2:0.
გუნდები შემდეგი სასტარტო შემადგენლობებით გავიდნენ მოედანზე:
საქართველო:
მამარდაშვილი, კაშია, გველესიანი, დვალი, კაკაბაძე, ქოჩორაშვილი, კიტეიშვილი, ლოჩოშვილი, ჩაკვეტაძე, კვარაცხელია, მიქაუტაძე
პორტუგალია:
კოშტა, სემედუ, ა. სილვა, დიაში, კანსელუ, ნევეში, პალინია, ფერნანდეში, ბ. სილვა, ფელიქსი, რონალდუ
პირველი ტაიმი ქართველების აქტიურობით დაიწყო, რაც მე-2 წუთზე ხვიჩა კვარაცხელიას გოლით გაგრძელდა.
მან პორტუგალიელების კარი მიქაუტაძის გადაცემის შემდეგ აიღო. ამის შემდეგ პორტუგალიელები ინიციატივას დაეუფლნენ და უპირატესობაც მათ მხარეს იყო, თუმცა ჩვენები კარგად იცავდნენ თავს. მე-16 წუთზე თამაშში ჩართვა მოუწია გიორგი მამარდაშვილს, რომელმაც რონალდუს უძლიერესი დარტყმა ულამაზესი ნახტომით მოიგერია. მან კიდევ რამდენჯერმე ითამაშა უნაკლოდ. პორტუგალიელები ბევრს გვიტევდნენ, მაგრამ ჩვენი დაცვის ხაზი, ფაქტობრივად, უშეცდომოდ თამაშობდა.
30-ე წუთზე რონალდუმ სიმულაციისთვის ყვითელი ბარათი მიიღო, ის ჩვენს საჯარიმოში წაიქცა, რის მერეც თერთმეტმეტრიანს ითხოვდა.
მეორე ტაიმი პორტუგალიის შეტევებით დაიწყო, რასაც ქართველები კონტრშეტევებით პასუხობდნენ.
57-ე წუთზე კი პორტუგალიის კარში პენალტი გიორგი მიქაუტაძემ გაიტანა. ეს მისი მე-3 გოლია ჯგუფურ ეტაპზე. პორტუგალიელებმა საკუთარ საჯარიმოში ლუკა ლოჩოშვილი წააქციეს, VAR-ზე გადამოწმების შემდეგ მსაჯმა თერთმეტმეტრიანი დანიშნა, რაც ზუსტად შეასრულა მიქაუტაძემ.
ამის შემდეგ უპირატესობას ისევ პორტუგალია ფლობდა, თუმცა ვერაფერს ხეირიანს ვერ ახერხებდნენ, მათ დარტყმულ ბურთებს ან "მამარდა" იგერიებდა ან კარს ცდებოდა. 66- წუთზე შეცვალეს რონალდუ.
76-ე წუთზე გველესიანი კვირკველიამ შეცვალა, 82-წუთზე კი ჩაკვეტაძისა და კვარაცხელიას ნაცვლად მოედანზე წიტაიშვილი და დავითაშვილი გამოვიდნენ. შეცვლიდან მალევე ზურიკო დავითაშვილს გოლის გატანის შანსი ჰქონდა, თუმცა ბურთი კარს ასცდა.
თამაშის მიწურულს საქართველო კიდევ რამდენჯერმე გიორგი მამარდაშვილმა გადაარჩინა. საბოლოოდ ანგარიში არ შეცვლილა, საქართველომ პორტუგალია ანგარიშით 2:0 დაამარცხა და მერვედფინალში გავიდა, სადაც ესპანეთის ნაკრებს დაუპირდაპირდება.
იხილეთ ასევე: