10
მაისიდღის ზოგადი ასტროლოგიური პროგნოზი
საქართველოს საფეხბურთო ნაკრები ევროპის ჩემპიონატზე დღეს ჩეხეთის ნაკრებს დაუპირისპირდება. მატჩი ჰამბურგში თბილისის დროით 17:00 საათზე დაიწყება. ჯერჯერობით უცნობია, ნაკრების მთავარი შემადგენლობა. მატჩის წინ ჩატარებულ პრესკონფერენციაზე საქართველოს ნაკრების მწვრთნელმა ვილი სანიოლმა თქვა, რომ წინა მატჩისას დაშვებული შეცდომები აღარ უნდა გაიმეორონ.
ევროპის ჩემპიონატზე საქართველოს ნაკრებთან მატჩის წინ ჩეხეთის ეროვნული გუნდის მწვრთნელმა ივან ჰაშეკმა ისაუბრა:
"თურქეთთან საქართველოს შეხვედრას ჩვენი წარმომადგენლები დაესწრნენ. ქართველებმა როგორც ინდივიდუალურად, ასევე გუნდურად კარგად ითამაშეს და ბოლომდე ჰქონდათ შანსი. ვიდეოანალიზი გავაკეთეთ და მეტოქის თამაში გავარჩიეთ. მათ მხოლოდ კვარაცხელია როდი ჰყავთ. მაგალითად, მიქაუტაძემ თურქებს გაუტანა და საფრანგეთის ჩემპიონატზე 11-ჯერ დალაშქრა მოწინააღმდეგეთა კარი. თავისუფლად მოქმედების საშუალება არ უნდა მივცეთ. აგრეთვე ჩაკვეტაძეს გამოვარჩევდი. ის მოედნის კარგი ხედვით გამოირჩევა.
საქართველოს ნაკრები დაცვაშიც ძლიერია, თავისუფალ ზონებს არ ტოვებენ და სწრაფი კონტრიერიშები ეხერხებათ. მათგან ღია თამაშის მოლოდინში არ ვარ. პორტუგალიასთან შეტევები არ გამოგვივიდა, რაც უნდა გამოვასწოროთ. ახალი ბურთით სველ მოედანზე თამაში უფრო სწრაფად მიდის, ამ დროს შორიდან გატანა შედარებით ადვილია. ამაზე ვმუშაობთ. მამარდაშვილი ლა ლიგის ძალიან კარგი მეკარეა, თუმცა შეგვიძლია შორიდან გავუტანოთ. საერთოდ კი, რთულ ჯგუფში მოხვედრის მიუხედავად, შემდეგ ეტაპზე გასვლას შევეცდებით" - თქვა ჰაშეკმა.
ჩეხეთის ნაკრების ფეხბურთელმა, ანტონინ ბარაკმა პრესკონფერენციაზე ხვიჩა კვარაცხელიას შესახებ ისაბრა:
"კვარაცხელია დიდი ვარსკვლავია, განსაკუთრებით, გასულ სეზონში გამოირჩეოდა, როდესაც "ნაპოლიმ" სკუდეტო მოიგო, ის კი, ერთ-ერთი უძლიერესი იყო. ვიტყოდი, რომ ჩემპიონობა მისი დამსახურება იყო. ეროვნულ ნაკრებში მისი როლი ცოტა განსხვავებულია. საქართველოს ასევე ჰყავს სხვა კარგი მოთამაშეები, თუმცა, ყველა მასზე საუბრობს. მზად ვართ, ვითამაშოთ. კვარაცხელია ერთ-ერთი ყველაზე სახიფათო ფეხბურთელია, მაგრამ სხვებიც უნდა გვახსოვდეს, კარგი თავდამსხმელები ჰყავთ, იციან სახიფათო მომენტების შექმნა, კონტრშეტევებზე გადასვლა" - თქვა ბარაკმა. მის კომენტარს EUROPOP ავრცელებს.
საქართველოს საფეხბურთო ნაკრები ევროპის ჩემპიონატზე დღეს ჩეხეთის ნაკრებს დაუპირისპირდება. მატჩი ჰამბურგში თბილისის დროით 17:00 საათზე დაიწყება.
26 ივნისს, საქართველოს ნაკრები გელზენკირხენში, პორტუგალიის ეროვნულ ნაკრებს დაუპირისპირდება. ევროპის ჩემპიონატზე პირველი მატჩი საქართველოს ნაკრებმა თურქეთთან გამართა და 1:3 დამარცხდა.
EURO 2024-ის მატჩების ღია ჩვენებები საქართველოს ყველა ქალაქში დიდ ეკრანებზეა შესაძლებელი. ამასთან, როგორც ცნობილია, მიხეილ მესხის სტადიონზე საქართველოს ეროვნული ნაკრების ყველა თამაშს აჩვენებენ.
