29
მარტიდღის ზოგადი ასტროლოგიური პროგნოზი
მიმდინარე კვირაში ისრაელსა და "ჰეზბოლას" შორის დაძაბულობა კიდევ უფრო გაიზარდა. მუსლიმური დღესასწაულის, ყურბან-ბაირამის (ეიდ ალ-ადჰას) დროს, ისმის ხმამაღალი ურთიერთმუქარები.
- "ჰეზბოლას" ლიდერი ჰასან ნასრალა იმუქრებს, რომ თუ ისრაელი სრულმასშტაბიან ომს დაიწყებს, "ჰეზბოლა" ჩრდილოეთ ისრაელში შეიჭრება. მან ასევე თქვა, რომ ჰეზბოლას ახალი იარაღი აქვს, რომელიც საომარ მოქმედებებში გამოჩნდება. თუმცა ნასრალამ ისიც დასძინა, რომ "ჰეზბოლას" არ სურს ისრაელთან სრულმასშტაბიანი ომი და მათი ჩართულობა კონფლიქტში ღაზაში მოკავშირე ჰამასის მხარდაჭერას გულისხმობს.
გასულ სამშაბათს "ჰეზბოლამ" ჩრდილოეთ ისრაელის ქალაქ ჰაიფაში დრონით გადაღებული კადრები გამოაქვეყნა, სადაც მნიშვნელოვანი სამხედრო და სამოქალაქო ობიექტები იყო მონიშნული. ეს ქმედება ისრაელისთვის მუქარად აღიქმება, ნასრალამ თქვა, რომ ეს მტრის წინააღმდეგ "ჰეზბოლას" "ფსიქოლოგიური ომის" ნაწილი იყო.
- ვიდეოს გამოქვეყნებიდან რამდენიმე საათში, ისრაელის საგარეო საქმეთა მინისტრმა, ისრაელ კაცმა განაცხადა, რომ ქვეყანა "გადამწყვეტ მომენტთან ძალიან ახლოსაა, რათა "ჰეზბოლასა" და ლიბანის წინააღმდეგ მოქმედების წესები შეცვალოს". მისი თქმით, სრულმასშტაბიან ომში, "ჰეზბოლა განადგურდება და ლიბანი მძიმედ დაზარალდება". ისრაელის არმიის პრესსამსახურმა კი განაცხადა, რომ ლიბანში შეტევის საოპერაციო გეგმები "დამტკიცებული და გადამოწმებულია".
დასავლელი ექსპერტები იზიარებენ შეხედულებას, რომ ამჟამად ომის დაწყება არც ისრაელს და არც "ჰეზბოლას" სურს. ეს ომი - ორ კარგად შეიარაღებულ მტერს შორის - საზღვრის ორივე მხარეს მილიონობით ადამიანს შეუქმნის რისკს, და ასევე შესაძლოა, მან გამოიწვიოს "ჰეზბოლას" მხარდამჭერი ირანისა და ისრაელის მთავარი მოკავშირის, ამერიკის შეერთებული შტატების ჩაბმა.
- თუმცა, დაშინებას, მუქარასა და რეალურ დიდ ომს შორის ზღვარი სულ უფრო და უფრო ბუნდოვანი ხდება.
ისრაელის მთავრობის ზოგიერთი წევრი თვლის, რომ 7 ოქტომბრის "ჰამასის" თავდასხმამ უსაფრთხოების გათვლები შეცვალა და ჩრდილოეთის მცხოვრებლები სახლებში მანამ ვერ დაბრუნდებიან, სანამ "ჰეზბოლა" ბრძოლის ველზე არ დამარცხდება. ჩრდილოეთის ბევრი მცხოვრებიც ეთანხმება ამას.
- 60 000-ზე მეტი ისრაელელი დროებით თავშესაფარში ცხოვრობს მას შემდეგ, რაც "ჰეზბოლამ" ჩრდილოეთ ისრაელში "ჰამასის" მხარდასაჭერად, რაკეტების გაშვება დაიწყო. ასევე 90 000-ზე მეტი ლიბანელიც იძულებით გადაადგილებული პირი გახდა, რადგან ისრაელის სამხედრო ძალებმა აღნიშნულზე რეაგირება საჰაერო და საარტილერიო დარტყმებით მოახდინეს.
ამ კვირას “ებრაელი ხალხის პოლიტიკის ინსტიტუტის” მიერ ჩატარებული გამოკითხვის თანახმად, ისრაელის 800 მოქალაქიდან 60%-ზე მეტი "ჰეზბოლაზე" "სრული ძალის გამოყენებით" თავდასხმას მოითხოვს.
აღსანიშნავია, რომ მიმდინარე თვეში ისრაელმა რეზერვისტების გამოძახების ზღვარი 300 000-დან 350 000-მდე გაზარდა, რამაც გააღვივა სპეკულაციები, რომ ახალი "დიდი ომია" მოსალოდნელი.
მიმდინარე კვირაში აშშ-მა კონფლიქტის მოსაგვარებლად საზღვრის ორივე მხარეს გაგზავნა ელჩი, მაგრამ "ჰეზბოლამ" ცხადად განაცხადა, რომ ისინი მოკავშირე "ჰამასის" მხარდასაჭერად მოქმედებენ და რომ ღაზაში სამშვიდობო შეთანხმება დიპლომატიური გადაწყვეტილებისთვის ერთადერთ გზად მიიჩნევა.
