"უკვე მესამედ მომწამლეს, აშკარად ვერ ვარ ფრთხილი..." - რას ამბობს მამუკა მამულაშვილი მოწამვლის თაობაზე გავრცელებულ ინფორმაციაზე და როგორია მისი ჯანმრთელობის მდგომარეობა?
გავრცელებული ინფორმაციით, უკრაინაში "ქართული ლეგიონის" მეთაური მამუკა მამულაშვილი მოწამლეს. მომხდარზე სოციალურ ქსელში ცნობები გამოაქვეყნეს მამულაშვილის თანამებრძოლებმა. მათი თქმით, მამულაშვილის ორგანიზმში აღმოჩენილია ტოქსიკური ნივთიერებები - დარიშხანი, ვერცხლისწყალი და კალა.
როგორც ირკვევა, "ქართული ლეგიონის“ მეთაურმა ტოქსიკოლოგიური კვლევის შედეგები გერმანული კლინიკის ლაბორატორიიდან მიიღო. უკრაინის სამხედრო პროკურატურამ და უშიშროების სამსახურებმა გამოძიება უკვე დაიწყეს. როგორია ახლა ლეგიონის მეთაურის ჯანმრთელობის მდგომარეობა, საბრძოლო განწყობა და რას ფიქრობს მომხდარზე? - ამის შესახებ მამუკა მამულაშვილი თვითონ გვიამბობს:
- ხელწერა რუსულია, თუმცა, საქართველოს სპეცსამსახურებიდანაც არაერთხელ მომიგზავნეს ადამიანი, ვის შესახებაც მქონდა ინფორმაცია, რომ ჩემი ლიკვიდაციისთვის იყო უკრაინაში ჩამოსული.
- როდესაც ასეთ ინფორმაციას იღებთ, მოგზავნილი მკვლელის შესახებ, როგორ მოქმედებთ?
- მე არანაირ არ ვმოქმედებ, ეს უკრაინის უშიშროების სამსახურის საქმეა. მე არც კი მაინტერესებს მათი ბედი.
- როდის და რა ვითარებაში მოიწამლეთ?
- როგორც ექიმებმა მითხრეს, ჩემს ორგანიზმში საწამლავი, სავარაუდოდ 4-5 თვის წინ მოხვდა. საკვებში იყო რაიმე შერეული თუ სასმელში, ეს აღარ ვიცი.
- საკვების და სასმელი წყლის მიღების დროს სიფრთხილეს არ იჩენთ?
- უკვე მესამედ მომწამლეს, აშკარად ვერ ვარ ფრთხილი ან კი ჩემს მდგომარეობაში მყოფმა კაცმა, როგორ უნდა გამოიჩინოს სიფრთხილე? ხან რა სიტუაციაში მიწევს კვება და ხან რა სიტუაციაში... როგორც ჩანს, ადამიანი ან ადამიანთა ჯგუფი ჩემთან ფიზიკურად ახლოს იყვნენ და ამით ისარგებლეს. მე ეჭვი იმ ქართველებზე უფრო მაქვს, ვინც უკრაინაში ვითომ საომრად ჩამოდიან და "ქართული ლეგიონის“ რიგებში ეწერებიან. მაგათ უფრო აქვთ ჩემთან ახლოს ყოფნის შესაძლებლობა, ვიდრე რუსებს....
- პირველი ორი შემთხვევა როდის იყო?
- პირველად 2017 წელს, მაშინაც დარიშხანით მომწამლეს, მუცლის ძლიერი ტკივილი, ინტოქსიკაცია მქონდა და ექიმები მალევე მიხვდნენ, რა საწამლავიც შეიძლება მოხვედრილიყო ჩემს ორგანიზმში. მეორე შემთხვევა 2018 წელს იყო, მაგრამ ვერ გაარკვიეს რა ნივთიერებით ვიყავი მოწამლული. ამჯერად ნაწლავების ანთება დამემართა, რამდენიმე კვირის განმავლობაში ანტიბიოტიკებით მიმკურნალეს, მაგრამ რამდენიმე დღეში ანთება ისევ განმეორდა და ექიმებმა ტოქსიკოლოგიური ანალიზების გაკეთება მირჩიეს. ასეთ კვლევებს უკრაინაში არ აკეთებენ, ანალიზები გერმანიაში გავაგზავნეთ და გაირკვა, რომ ისევ დარიშხანით ვიყავი მოწამლული.
- ახლა როგორია თქვენი მდგომარეობა?
- ნაწლავები და ღვიძლი მაქვს დაზიანებული, მაგრამ არა უშავს, ეს ყველაფერი მკურნალობას ექვემდებარება. რაც შეეხება, საბრძოლო განწყობას, რუსებთან ბრძოლის განწყობაზე სულ ვარ, უბრალოდ ამ ეტაპზე საბრძოლო ოპერაციებში ვერ ვმონაწილეობ, მხოლოდ დაგეგმარებაში ვიღებ მონაწილეობას.
- როგორ აფასებთ ახლა უკრაინის ფრონტზე არსებულ ვითარებას?
- ძალიან კარგია, რომ უკრაინას იარაღიც მისცეს და რუსეთის ტერიტორიაზე შეტევის განხორციელების უფლებაც. ჩვენ უკვე გვაქვს არტილერიის ისეთი სისტემები, რომლებსაც რუსულ ლოჯისტიკაზე აქვთ წვდომა. ეს იარაღი პირდაპირ უკრაინის საზღვარზეა განლაგებული.
- თუმცა, ჯერჯერობით შეტევას ისევ რუსეთი ახორციელებს.
- არც ასეა საქმე, კი ბატონო, უკრაინა აქტიურ თავდაცვაზეა გადასული, მაგრამ გარკვეულ მონაკვეთებზე შემტევი ოპერაციებიც მიმდინარეობს. უკეთესის იმედი გვაქვს.
- საქართველოში მიმდინარე ამბებს, თუ ადევნებთ თვალს?
- თვალსაც ვადევნებთ და მხარსაც ვუჭერთ დამოუკიდებლობისთვის მებრძოლ ახალგაზრდებს.
- ოპოზიციურ ველზე, რომელიმე პოლიტიკურ ძალას თუ უჭერთ მხარს?
- სამწუხაროდ, დღეს საქართველოს პოლიტიკურ ველზე არ არის ისეთი პოლიტიკური ძალა, რომელსაც ჩვენ მხარს დავუჭერდით. იმედია, მალე გამოიკვეთებიან ისეთი ადამიანები, რომლებიც თავისუფლები იქნებიან ძველი, ნომენკლატურული გადმონაშთებისგან და ახალი ტიპის პოლიტიკას აწარმოებენ.
იხილეთ ასევე: