თანამედროვე დროის აფხაზეთი - პრემიერა სოხუმის თეატრში
12 ივნისს, 20:00 საათზე, სოხუმის დრამატულ თეატრში სპექტაკლის „იქ, ჩვენთან“ პრემიერა გაიმართება!..
ერთმოქმედებიან ფსიქოლოგიურ დრამაში, მოქმედება თანამედროვე დროს, აფხაზეთში ვითარდება. ერთ-ერთ შერეულ ოჯახს, სადაც ქმარი აფხაზია, ხოლო ცოლი - ქართველი, პატარა, საოჯახო სასტუმრო აქვს, რომელსაც არცთუ ისე ხშირად ჰყავს მდგმურები.
ნესტორისა და ნინოს ერთადერთი მოზარდი შვილი საბი წიგნაკში ლექსებს წერს, თავის გამოგონილ სამყაროში ცხოვრობს და როგორც ამბობს, გამუდმებით „ცოტაოდენ სილამაზეს ეძებს მახინჯ სამყაროში“, მაგრამ ოჯახის წევრებსა და ახლობლებს მისი გაგება უჭირთ და „უცნაურსა“ და „ეშმაკის მიერ შეპყრობილს“ უწოდებენ. გარშემო არსებული ვითარების გამო, საბი მძიმე ფსიქოლოგიურ წნეხს განიცდის და სასტიკი რეალობის მიღება უჭირს.
ენგურს მიღმა არსებულ სახლში, თავს იყრიან საოჯახო საქმეებით დაკავებული ინდივიდები, მდგმური, რუსულენოვანი მღვდელი და თბილისში ნასწავლი აფხაზი ექიმი. სპექტაკლის მსვლელობისას ამ ადამიანების ირგვლივ მოვლენები ძალიან საინტერესოდ, მძაფრად და მოულოდნელად ვითარდება, საიდანაც საბოლოო ჯამში, ნათლად იკვეთება თუ რა გარემოებების გამოა მოწყვეტილი ჩვენი ქვეყნისგან... აფხაზეთი.
რეჟისორი და ტექსტის ავტორი: მერაბ ყოლბაია
მხატვარი: ნინო ქუთელია
მუსიკალური გაფორმება: მერაბ ყოლბაია
რეჟისორის თანაშემწე: სვეტლანა გოგოხია
მონაწილეობენ: ნიკა ჭკადუა (საბი აჩბა), ედემი ხვიჩია (ნესტორ აჩბა), ლელა შარაბიძე (ნინო), ჯულიეტა პაკელიანი (ანტისა), ლალიკო ღერკენაშვილი (ადელი), ლევან ლეჟავა (დაური), დავით ბერაძე (გარენი), მერაბ ყოლბაია (ეგორი).
(ერთი მოქმედება, ხანგრძლივობა: 1 სთ. და 50 წთ. ასაკობრივი შეზღუდვა: 10+_)
სოხუმის დრამატულ თეატრს 2025 წელს 140 წელი უსრულდება. სოხუმში შექმნილ თეატრს კონსტანტინე გამსახურდიას სახელი 1983 წელს მიენიჭა. გასული საუკუნის 90-იან წლებში დატრიალებული ტრაგედიისა და ქართულ-რუსული ომის შედეგად, სხვებთან ერთად, აფხაზეთის დატოვება თეატრსა და დასის წევრებს მოუწიათ. მათ შორის იყო მერაბ ყოლბაიაც. დევნილი თეატრი წარმოდგენებს სხვადასხვა სივრცეში მართავდა. 2019 წლიდან კი საკუთარი ჭერი აქვს და კონსტანტინე გამსახურდიას სახელობის სოხუმის სახელმწიფო დრამატული თეატრი მაყურებელს თბილისში, დიმიტრი უზნაძის ქუჩა N68-ში მასპინძლობს.
მერაბ ყოლბაია სოხუმის თეატრში 1985 წლიდან მუშაობს და არაერთი როლი აქვს შესრულებული როგორც სოხუმში, ისე თბილისში განხორციელებულ დადგმებში. ხოლო მისი რეჟისორული ნამუშევრებია სპექტაკლები: „სხვა საქართველო სად არის?!“ , „ორეული“, „ვაჟიშვილი“ (ეს უკანასკნელი დღესდღეობით სოხუმის თეატრის რეპერტუარშია). ხოლო „იქ, ჩვენთან“ მერაბ ყოლბაიას IV სპექტაკლია სოხუმის დრამატული თეატრის სცენაზე.
სოხუმის თეატრის საინფორმაციო მხარდამჭერები არიან: ambebi.ge • ამბები.ge და Palitranews - პალიტრანიუსი
ლოკაცია: სოხუმის სახელმწიფო დრამატული თეატრი. მის: დ. უზნაძის ქ. N68.
R