"ეს გადაწყვეტილება იყო ანტიკონსტიტუციური და მოღალატეობრივი" -"ქართული ოცნების" დეპუტატი ე.წ. აგენტების კანონის გამო პარტიას და თელავის საკრებულოში თანამდებობას ტოვებს
თელავის საკრებულო "ქართული ოცნების" დეპუტატმა, სამანდატო, საპროცედურო და იურიდიულ საკითხთა კომისიის თავმჯდომარემ ლევან ბერძენაშვილმა, მმართველი პარტიის მიერ ე.წ. რუსულ კანონზე ვეტოს დაძლევის შემდეგ პარტია და თანამდებობა დატოვა.
26 აპრილს, დეპუტატმა საკრებულოს სხდომაზე მმართველ პარტიას მიმართა და მოუწოდა არ მიეღოთ "რუსული კანონი". ბერძენიშვილმა ფიცი დადო, რომ თუ მმართველი გუნდი რუსულ კანონს არ გაიწვევდა, აუცილებლად დატოვებდა პარტიასა და თანამდებობას.
"თეთრი სახლი, ევროკავშირი, ყველა პარტნიორი, ევროკავშირის ქვეყნების ლიდერები გვეუბნებიან, რომ თუ ამ კანონს მიიღებთ, შესაძლოა, დაკარგოთ ვიზალიბერალიზაცია, დაკარგავთ კანდიდატის სტატუსსა და ყველაფერს, რაც ევროპას უკავშირდებაო. ამიტომ, მე ამას ცალსახად ვემიჯნები და უმორჩილესად ვთხოვ, საქართველოს მთავრობას, პარლამენტს ეს კანონი უკან გაიწვიოს. თქვენ წინაშე ფიცს ვდებ, რომ თუ ეს არ მოხდება, დავტოვებ პარტია "ქართულ ოცნებას", ფრაქცია "ქართულ ოცნებასა" და თანამდებობას, ამას გპირდებით", - განაცხადა ბერძნიშვილმა 26 აპრილს საკრებულოს სხდომაზე
ბერძენიშვილი PALITRAVIDEO-თან ინტერვიუში ამბობს, მან პირობა შეასრულა და ახლა საქმიანობას რიგით, უფრაქციო დეპუტატის რანგში გააგრძელებს.
- მე 26 აპრილს განვაცხადე, რომ თუ პარლამენტი გამჭვირვალობის შესახებ კანონს მიიღებდა, დავტოვებდი პარტიას, ფრაქციას და თანამდებობას. ამ პირობას შევასრულებ. 10 ივნისს ვბრუნდები სამსახურში შვებულებიდან და უახლოეს საკრებულოს სხდომაზე საჯაროდ გავაკეთებ განცხადებას, მივმართავ ჩემს კოლეგებს და დავტოვებ თანამდებობას და პარტიას.
- გქონდათ იმედი, რომ ვეტოს ჩააგდებდნენ?
- გულის სიღრმეში მქონდა მაინც იმედი. ეს ჩემთვის მიუღებელი იყო, პიროვნულ ღირსებას ეწინააღმდეგებოდა, ეს გადაწყვეტილება იყო ანტიკონსტიტუციური, მოღალატეობრივი და არა ევროპული. ჩვენი გზა არის ევროპისკენ. კონსტიტუციის 78-ე მუხლი პირდაპირ გვეუბნება, რომ ყველა სახაზინო სტრუქტურის ვალდებულებაა, რომ იაროს ევროინტეგრაციულის გზით.
ეს ქმედება იყო არაკონსტიტუციური. ამას გვეუბნება ევროკავშირი, ვაშინგტონი, პრეზიდენტის ვეტო, სადაც განმარტებული იყო კონსტიტუციის მუხლების დარღვევა. მე, როგორც იურისტი, ვეთანხმები და ეს იყო მოღალატეობრივი გადაწყვეტილება. მე გავაგრძელებ საქმიანობას, უფრაქციო რიგით დეპუტატად თანამდებობის გარეშე.