7
მაისიდღის ზოგადი ასტროლოგიური პროგნოზი
წყნარი ოკეანის სამხრეთ-დასავლეთში მდებარე სახელმწიფოს, პაპუა-ახალი გვინეის მაღალმთიან პროვინცია ენგაში ისევ აქტიურია მეწყერი, რომელმაც ხელისუფლების ინფორმაციით, სავარაუდოდ, უკვე 2000-ზე მეტი ადამიანის სიცოცხლე იმსხვერპლა.
მეწყრული პროცესები 24 მაისის გამთენიისას დაიწყო მულიტაკის რაიონში, სადაც ერთი სოფელი, ფაქტობრივად, მთლიანად მიწაში ჩაიმარხა. გაეროს წარმომადგენლების თქმით, მათ არ აქვთ იმედი, რომ სოფლის 2000-მდე მოსახლიდან ვინმე გადარჩა. სამძებრო-სამაშველო სამუშაოები გართულებულია იმის გამო, რომ ისედაც ძნელად მისადგომ მთიან რაიონში მეწყრული კერები ისევ აქტიურია. ადგილობრივი მცხოვრებნი ნიჩბებით და ხის ჯოხებით თავად ცდილობენ მიწის მასაში მოყოლილთა მოძებნას.
როგორც შესაბამისი უწყებები ამბობენ, მეწყრის ადგილზე გადარჩენილების პოვნის შანსები სულ უფრო მცირდება.
სამაშველო სამუშაოებს და მსხვერპლთა დახმარებას აფერხებს ასევე დასახლებების სიშორე, დაზიანებული გზები, ძლიერი წვიმა და მახლობლად გაჩენილი ტომობრივი არეულობა.
ენგას პროვინციის საგანგებო კომიტეტის თავმჯდომარე სანდის ცაკა აცხადებს, რომ სიტუაცია შეიძლება კიდევ გაუარესდეს. მისი თქმით, სტიქიის ზონიდან რვა ათასამდე ადამიანის ევაკუაცია განხორციელდა.
"ტრაგედია ჯერ კიდევ გრძელდება - ყოველ საათში გესმის ქვების ცვენის ხმა, ეს აფეთქებას ან გასროლას ჰგავს... ქვები აგრძელებენ ცვენას. ეს რაიონი მჭიდროდ იყო დასახლებული, სადაც მდებარეობდა ეკლესიები და სკოლები. ყველა მათგანი მთლიანად წაშლილია დედამიწის პირიდან. ეს ტერიტორია მოსწორებულია, უდაბური, მთვარის ზედაპირს ჰგავს...
სტიქიის ზონაში და მიმდებარე რაიონებში საგანგებო მდგომარეობაა გამოცხადებული", - განუცხადა ცაკამ Reuters-ს.
მისი თქმით, სამხედროებმა საგუშაგოები მოაწყვეს და მოსახლეობას ევაკუაციის ცენტრებში გადაყვანაში ეხმარება. მისივე თქმით, ბევრმა ადგილობრივმა მცხოვრებმა უარი თქვა ევაკუაციაზე იმ იმედით, რომ მოხერხდებოდა მეწყერში მოყოლილი მათი ახლობლების პოვნა.
- ავტორი: ანასტასია შალიკაშვილი
