"ირანის პრეზიდენტი და საგარეო საქმეთა მინისტრი, ვერტმფრენის ჩამოვარდნის შედეგად, დაიღუპნენ" - რა დეტალები ხდება ცნობილი ავიაკატასტროფის თაობაზე
ირანის პრეზიდენტი ებრაჰიმ რაისი და საგარეო საქმეთა მინისტრი ჰოსეინ ამირ-აბდოლაჰიანი ვერტმფრენის ჩამოვარდნისას დაიღუპნენ, - ამის შესახებ Reuters-ს ირანელმა მაღალჩინოსანმა განუცხადა.
"პრეზიდენტი რაისი, საგარეო საქმეთა მინისტრი და შვეულმფრენის ყველა მგზავრი კატასტროფის შედეგად დაიღუპნენ“, - განაცხადა წყარომ Reuters-თან, რომელმაც, საკითხის სენსიტიურობის გამო, ანომიმურობის დაცვა ითხოვა.
ამასთან, სააგენტო Reuters-ს ოფიციალურმა პირმა განუცხადა, რომ ვერტმფრენის ყველა მგზავრი დაღუპულია.
- "პრეზიდენტ რაისის ვერტმფრენი მთლიანად დაიწვა. სამწუხაროდ, ყველა მგზავრი დაღუპულია“, - განუცხადა Reuters-ს წყარომ.
მანამდე გავრცელდა ინფორმაცია, რომ სამძებრო-სამაშველო ჯგუფებმა იმ ვერტმფრენის ჩამოვარდნის ადგილი დაადგინეს, რომელშიც 9 ადამიანი, მათ შორის ირანის პრეზიდენტი ებრაჰიმ რაისი და საგარეო საქმეთა მინისტრი, ჰოსეინ ამირ აბდოლაჰიანი იმყოფებოდა.
ირანის სასამართლო სისტემის ყოფილი ხელმძღვანელი, ებრაჰიმ რაისი ქვეყნის მერვე პრეზიდენტად 2021 წლის საპრეზიდენტო არჩევნებში აირჩიეს. მისი წინამორბედისგან, ყოფილ პრეზიდენტ ჰასან როჰანისგან განსხვავებით, ებრაჰიმ რაისმა მჭიდრო ურთიერთობა ჩამოაყალიბა ირანის უზენაეს ლიდერთან, ალი ხამენეისთან. ირანში ბევრი თვლიდა, რომ მას, შესაძლოა, მომავალში ხამენეი ჩაენაცვლებინა.
- ირანის მთავრობამ სასწრაფო შეხვედრა ჩანიშნა, მას შემდეგ რაც გავრცელდა ინფორმაცია, რომ პრეზიდენტი ებრაჰიმ რაისი და ქვეყნის საგარეო საქმეთა მინისტრი ჰოსეინ ამირ-აბდოლაჰიანი ვერტმფრენის ჩამოვარდნის შედეგად დაღუპულ მგზავრებს შორის არიან, - ინფორმაციას ირანის სახელმწიფო საინფორმაციო სააგენტო IRNA ავრცელებს.
სააგენტომ გაავრცელა ებრაჰიმ რაისის ცარიელი, შავი სარტყლით შემოსილი სკამის ფოტო.
ამასთან, სააგენტო FARS-ი იუწყება, რომ სამგლოვიარო მსვლელობის დრო და დეტალები უახლოეს მომავალში გახდება ცნობილი.
იხილეთ ასევე: