"როგორც ამბობენ, გადასასვლელზე ცხენებს არ ცვლიან, მაგრამ, როგორც ჩანს, პუტინს ამოუვიდა ყელში შოიგუ" - რისთვის ემზადება რუსი დიქტატორი?
ვლადიმირ პუტინმა, რომელიც 7 მაისიდან მე-5 ვადით შეუდგა რუსეთის პრეზიდენტის უფლებამოსილების შესრულებას, სამინისტროების გადახალისება დაიწყო. 12 მაისს რუსეთის პრეზიდენტმა სერგეი შოიგუ თავდაცვის მინისტრის თანამდებობიდან გაათავისუფლა და მის ნაცვლად წარადგინა პირველი ვიცე-პრემიერის, ანდრეი ბელოუსოვის კანდიდატურა. შოიგუ თავდაცვის სამინისტროს 2012 წლიდან ხელმძღვანელობდა. პუტინის 12 მაისის განკარგულებით, შოიგუ ეროვნული უშიშროების საბჭოს მდივნად დაინიშნა (ამ თანამდებობას ნიკოლაი პატრუშევი იკავებდა).
ამერიკელი ექსპერტები წერენ, რომ ბელოუსოვს სამხედრო გამოცდილება არ აქვს, თუმცა არმიაში არც შოიგუს უმსახურია. ბელოუსოვს ეფექტიანი ტექნოკრატის რეპუტაცია აქვს და ასევე კარგი ურთიერთობები დიქტატორ პუტინთან. ანალიტიკოსების შეფასებით, საკადრო ცვლილებები იმაზე მიუთითებს, რომ პუტინი დგამს ნაბიჯებს ეკონომიკური და სამხედრო მრეწველობის ბაზის მობილიზაციისთვის უკრაინაში ხანგრძლივი ომისთვის.
ვლადიმირ პუტინმა ფედერაციის საბჭოს ასევე წარუდგინა რამდენიმე სამინისტროს და სპეცსამსახურების ხელმძღვანელობის კანდიდატები - შინაგან საქმეთა მინისტრის პოსტზე ვლადიმერ კოლოკოლცევის კანდიდატურა შესთავაზა, სამოქალაქო თავდაცვის, საგანგებო სიტუაციების და კატასტროფების შედეგების ლიკვიდაციის მინისტრად - ალექსანდრე კურენკოვი, საგარეო საქმეთა მინისტრის პოსტზე - სერგეი ლავროვი, იუსტიციის მინისტრად - კონსტანტინ ჩუიჩენკო, საგარეო დაზვერვის სამსახურის დირექტორის პოსტზე - სერგეი ნარიშკინი, უშიშროების ფედერალური სამსახურის დირექტორად - ალექსანდრე ბორტნიკოვი, ეროვნული გვარდიის ჯარების ფედერალური სამსახურის დირექტორის პოსტზე - ვიქტორ ზოლოტოვი, უშიშროების ფედერალური სამსახურის დირექტორად - დიმიტრი კოჩნევი.
ფედერაციის საბჭო კანდიდატურებს 13 და 14 მაისს განიხილავს.
ირაკლი ალადაშვილი, სამხედრო-ანალიტიკური ჟურნალ "არსენალის“ მთავარი რედაქტორი:
"რუსეთის ფედერაციის თავდაცვის მინისტრებს შორის, რომლებიც 1992 წლიდან ინიშნებოდნენ, ყველაზე დიდხანს ამ სავარძელში შოიგუმ გაძლო, რომელიც 2012 წლის 6 ნოემბერს დაინიშნა და, ფაქტობრივად, თითქმის 12 წელი იკავებდა პოსტს. მიუხედავად იმისა, რომ შოიგუ არმიის გენერლის სამხრეებს ატარებდა, მას რეალურად ჯარში არ უმსახურია, არ გაუვლია ყველა ის საფეხური, რასაც კადრის ოფიცერი გადის. პოლკოვნიკის წოდებით და ვარსკვლავებით ის პირველად 1992 წლის ივლისში გამოჩნდა, ცხინვალში ე.წ. სამშვიდობო ძალების შეყვანის შემდეგ, რისი თვითმხილველიც თავად გახლდით. მაშინ დამწყები სამხედრო ჟურნალისტი ვიყავი, ცხინვალში არ გვიშვებდნენ და მახსოვს შოიგუსთან სერიოზული სიტყვიერი შეხლა-შემოხლა მქონდა.
შოიგუს 12-წლიანი ხელმძღვანელობის დროს, ფაქტობრივად, 2014 წელს დაიწყო ყირიმის ოკუპაცია-ანექსია, შემდგომ - 2022 წლის დიდი ომი უკრაინასთან, ფაქტობრივად, ის ომის მინისტრი გახლდათ. როგორც რუსები ამბობენ, გადასასვლელზე ცხენებს არ ცვლიან, მაგრამ, როგორც ჩანს, პუტინს ამოუვიდა ყელში შოიგუს სიტუაცია და მართალია, 9 მაისის სამხედრო აღლუმის მიღება დააცადა, მაგრამ ახალ კაბინეტში მის შეყვანას აღარ მისცა რეკომენდაცია.
ერთი წლის წინ, გახსოვთ, "ვანგერის“ დამფუძნებელმა პრიგოჟინმა ტანკებით რომ გაილაშქრა მოსკოვისკენ შოიგუ-გერასიმოვის დუეტის "ჭკუის სასწავლებლად“. სწორედ პრიგოჟინი ამბობდა, რომ შოიგუ იყო კორუფციის ჭაობში ჩაძირული და მისთვის ჭკუა უნდა ესწავლებინა. მაშინ თვითონ პრიგოჟინს ასწავლეს ჭკუა და "ციდან ჩამოხსნეს“, მაგრამ ერთი წლის შემდეგ ხედავთ, რომ პუტინმა შოიგუ მაინც მოხსნა, ეს მას შემდეგ, რაც ორი კვირით ადრე, 23 აპრილს მის კაბინეტში დააკავეს შოიგუს მოადგილე მომარაგების დარგში ტიმურ ივანოვი (ისიც არმიის გენერალია, რომელიც შოიგუს კაცი იყო და მას ჯერ კიდევ საგანგებო სიტუაციების სამინისტროდან მოჰყვებოდა). ივანოვს კორუფციულ გარიგებებში სდებენ ბრალს, ასეულობით მილიონზეა საუბარი. ლოგიკურად გაჩნდა ეჭვი, რომ ეს ამბავი ივანოვის დონეზე არ გაჩერდებოდა და შოიგუსთან მივიდოდა ყველაფერი. მიუხედავად ამისა, პუტინმა მაინც ბოლომდე არ გაწირა შოიგუ და ის რუსეთის უშიშროების საბჭოს მდივნად დანიშნა, თუმცა ეს ადგილი ბევრს არაფერს ნიშნავს, მინიმალურია და, რა თქმა უნდა, მას ისეთივე გავლენა აღარ ექნება.
რაც შეეხება ახალ თავდაცვის მინისტრ ანდრეი ბელოუსოვს, ის ცნობილი ეკონომისტია და ბოლო წლებში პირველი ვიცე-პრემიერი იყო რუსეთის მთავრობაში. შესაძლოა ეს ერთგვარ ჩამოქვეითებად აღიქვან, რადგან მანამდე პირველი ვიცე-პრემიერი ახლა თავდაცვის მინისტრის კანდიდატადაა წარდგენილი, მაგრამ რეალურად, პუტინს სამოქალაქო პირი ბელოუსოვი თავდაცვის პირველ პირად იმიტომ მოჰყავს, რომ რუსეთი ემზადება გამოფიტვამდე ომისთვის, იცის, რომ საბრძოლო მოქმედებები ჯერ კიდევ დიდხანს გაგრძელდება და რუსეთის ეკონომიკა სამხედრო ლიანდაგებზე გადაჰყავს, ამიტომაც სჭირდება გვერდით გამოცდილი ეკონომისტი. მიუხედავად იმისა, ამ ბოლო წლებში რუსეთზე რამდენიმე ასეული საერთაშორისო ეკონომიკური სანქციაა დაწესებული, როგორც ამბობენ, ანდრეი ბელოუსოვის დიდი დამსახურებაა ის, რომ რუსეთის ეკონომიკა მაინც არ ჩამოიშალა. ასე რომ, მისი, როგორც ძლიერი ეკონომისტის მოსვლა რუსეთის თავდაცვის პოსტზე, რუსეთის არმიის გაძლიერებას ემსახურება. რუსეთი ცდილობს ომში გარდატეხა შეიტანოს, ეკონომიკა გააუმჯობესოს, სამხედრო-სამრეწველო კომპლექსი აამუშაოს და მეტი იარაღი, საბრძოლო მასალა გამოუშვას.
პუტინმა სხვა მინისტრებიც შეცვალა, გადაახალისა კაბინეტი, ახალი სახეები მოჰყავს, და ფაქტია, რომ ყველაფერს ის აკონტროლებს, ნებისმიერ მომენტში შეუძლია ნებისმიერი მინისტრის შეცვლა-ჩანაცვლება და გაგდება. პუტინს ამისთვის არ სჭირდება არც პარტიის, არც პარლამენტის დახმარება და ა.შ. რაც მან გააკეთა, მოსალოდნელი იყო - შოიგუს პუტინი მეხუთედ კურთხევის დროს აღარ დატოვებდა.
სანამ ეს ომი დაიწყებოდა, ერთი პერიოდი, შოიგუ პუტინის შემცვლელადაც განიხილებოდა, მაგრამ იმავე უკრაინის ფრონტზე გარკვეული წარუმატებლობის, ასევე, მაღალი დონის კორუფციის არა ერთი ფაქტის გამოვლენის შემდეგ როგორც ჯარში, ისე საზოგადოებაში მისი ავტორიტეტი ძალიან დაეცა.
პუტინი შოიგუს რომ არ ენდობოდეს, საერთოდ გაუშვებდა, მაგრამ იმის თქმა, რომ ის განაწყენდება და რამეს მოიმოქმედებს, რეალობასთან ახლოს არ მგონია, რადგან შოიგუს არ აქვს ის ძალაუფლება ან გავლენა, რომ სასახლის გადატრიალება მოაწყოს“.
იხილეთ ასევე: