"ნემო პირველი გამარჯვებულია, რომელმაც ჯილდო პირდაპირ ეთერში დაამსხვრია" - როგორი იყო "ევროვიზიის" 68-ე კონკურსი: სკანდალები, პროტესტი და პოლიტიკური ელფერი
"ევროვიზიის" სკანდალური 68-ე კონკურსის გამარჯვებული შვეიცარიელი მონაწილე გახდა. წლის ერთ-ერთი უმნიშვნელოვანესი მუსიკალური ღონისძიება საპროტესტო აქციებისა და კონკურსანტების გამოთიშვის პარალელურად ჩატარდა.
შვეიცარიელი მომღერალი ნემო ევროვიზიის ფინალში სიმღერით The Code-ით წარსდგა. სიმღერა ჰიპ-ჰოპისა და ოპერის უცხო სინთეზი იყო და მან ჟიურის კენჭისყრაში საერთო ქულების ნახევარი დაიმსახურა.
ცოცხალი მუსიკის მსოფლიოს ერთ-ერთ უდიდეს ღონისძიებაზე ჰოლანდიელი კონკურსანტი იუსტ კლაინი ფინალიდან მას შემდეგ იყო დისკვალიფიცირებული, რაც მას პროდიუსერების ჯგუფის წევრ ერთ-ერთ ქალთან ინციდენტი მოუხდა. ჰოლანდიელმა ჟიურის წარმომადგენელმა, რომელმაც კლაინი გაგზავნა კონკურსზე, აღნიშნა, რომ "შოკირებული იყო არაპროპორციული გადაწყვეტილებით" და შოუს მიწურულს ქულების გადაცემაზე უარი თქვა.
პოლიტიკურად დატვირთულ კონკურსზე ატმოსფერო კიდევ უფრო დამძიმდა მას შემდეგ, რაც კლაინმა ისრაელის კონკურსზე ყოფნის შესახებ თავისი უკმაყოფილება გამოხატა.
ევროპის მაუწყებელთა კავშირმა (EBU) ისრაელის წარმომადგენელ ედენ გოლანს კონკურსში მონაწილეობის უფლება მას შემდეგ მისცა, რაც მისი ბალადის, Hurricane-ის ტექსტი და სახელწოდება შეცვალეს. სიმღერა "ჰამასის" 7 ოქტომბრის ტრავმულ გამოცდილებაზე საუბრობდა და მისი თავდაპირველი სახელწოდება "ოქტომბრის წვიმა" იყო.
კონკურსის პარალელურად, შვედეთის ქალაქ მალმოში პალესტინის მხარდამჭერი აქტივისტების აქციები იმართებოდა, სადაც ისინი ევროვიზიის მონაწილეებს ბოიკოტისკენ მოუწოდებდნენ. მათი თქმით, ისრაელს საერთოდ არ უნდა ჰქონოდა კონკურსზე გასვლის უფლება და 2022 წელს რუსეთის ბედი უნდა გაეზიარებინა, როცა ის ევროვიზიიდან გამოთიშეს.
ნემოს პერფორმანსი თავისი სიმარტივითაც გახდა მაყურებლისა და ჟიურის ფავორიტი. ნემო მოძრავ პლატფორმაზე ასრულებდა სიმღერას, მოცეკვავეებისა და სცენის სხვა გაფორმებების გარეშე.
ექსცესების გარეშე არც ფინალს ჩაუვლია. ნემომ ღონისძიება თავისი სიმღერით დახურა, თუმცა პერფორმანსის ბოლოს მან შემთხვევით ევროვიზიის ჯილდო გატეხა, რამაც მაყურებელი გაახალისა: "ნემო პირველი გამარჯვებულია, რომელმაც ჯილდო პირდაპირ ეთერში დაამსხვრია, თანაც გამარჯვებისთანავე",- წერდნენ სოციალურ ქსელებში.
საქართველო წლევანდელ კონკურსში 21-ე ადგილს დასჯერდა. ნუცა ბუზალაძემ ჟიურის ქულები შემდეგი ქვეყნებიდან მიიღო: 7 ქულა - აზერბაიჯანისგან, 2 ქულა - მალტისგან, 2 ქულა - ისრაელისგან, 1 ქულა - ნორვეგიისგან, 3 ქულა კი სომხეთისგან. მაყურებლისგან კი 19 ქულა მიიღო.
მომღერალი მიღწეული შედეგით კმაყოფილია. მისი თქმით, ის ფაქტიც კი, რომ საქართველო კონკურსის ფინალში მოხვდა, დიდი წარმატებაა.
ასევე იხილეთ:
- "ძალიან ბედნიერი ვარ, იმ შედეგით, რაც დადო საქართველომ წელს...ის ფაქტიც, რომ ჩვენმა დროშამ ამაყად იფრიალა ფინალში, ეს არის ჩვენ დიდი გამარჯვება" - ნუცა ბუზალაძე
- "25 წელია ამას ვამბობ: "ევროვიზიის" საშინელ კონკურსს არაფერი ეშველება, სანამ..." - რას წერს ზაზა შენგელია
- "ევროვიზიის" ისტორიაში ერთ-ერთი ყველაზე განსჯადი ვარსკვლავი - კონჩიტა ვიურსტი "ევროვიზია 2024" - ის სცენაზე წარსდგა
წყარო: theguardian
მოამზადა: ანა სიბოშვილმა