თსუ-ს სტუდენტების პროტესტი: ისინი აცხადებენ, რომ ორშაბათიდან ლექციებს არ დასწრებიან - მათ რამდენიმე ლექტორიც უერთდება
თბილისის სახელმწიფო უნივერსიტეტის სტუდენტები პროტესტის ნიშნად, ორშაბათიდან, აუდიტორიებში შესვლასა და ლექციებზე დასწრებაზე უარს ამბობენ და რუსთაველის გამზირზე აქციას აანონსებენ.
მათი გადაწყვეტილების მიზეზი ქვეყანაში მიმდინარე მოვლენებია. სტუდენტები ამბობენ, რომ „დიქტატურულ პროცესს“ არ შეეგუებიან.
ამასთან, ისინი თავიანთ ლექტორებს გაფიცვისკენ მოუწოდებენ, სხვა უნივერსიტეტების სტუდენტებს კი მიმართავენ, პროტესტს შეუერთდნენ.
"თბილისის სახელმწიფო უნივერსიტეტის სტუდენტები არ ვაპირებთ მდუმარედ შევეგუოთ ქვეყანაში მიმდინარე გაცხადებულ დიქტატურულ პროცესს. როგორც ჩანს, საკმარისი აღარაა მხოლოდ აქციებზე დგომა და ამ გზით პროტესტის გამოხატვა, წინააღმდეგობის გაწევა იმ შეუქცევადი კატასტროფის მიმართ. როცა ქუჩაში ხმის ამოღება ბრუტალური მეთოდებით ისჯება, ჩვენთვის შეუძლებელი ხდება მშვიდად აუდიტორიებში ჯდომა. ეს არ არის ორდინარული ვითარება და ასეთი ვითარება ადეკვატურ ქცევას მოითხოვს.
სწორედ ამიტომ, მივიღეთ გადაწყვეტილება, ორშაბათიდან უარი ვთქვათ აუდიტორიებში შესვლაზე. დილის 9 საათიდან ვიდგებით რუსთაველის გამზირზე და გავაპროტესტებთ ქვეყანაში მიმდინარე პუტინისტური დიქტატურის საკანონმდებლო დონეზე გაფორმების მცდელობას. ჩვენს უკან დგას ათასობით სტუდენტი არ აპირებს დათმოს ჩვენი ქვეყნის თავისუფლება და მისი ევროპული მომავალი, კონსტიტუციით გარანტირებული უფლებები.
მოვუწოდებთ ჩვენს ლექტორებს, მიიღონ ადეკვატური გადაწყვეტილება, უარი თქვან სამსახურში მოსვლაზე, გამოაცხადონ საყოველთაო გაფიცვა და დადგნენ ჩვენთან ერთად, რუსთაველის გამზირზე. მივმართავთ სახელმწიფო თუ კერძო უნივერსიტეტების სტუდენტებს, შეწყვიტეთ აკადემიური პროცესი საკუთარ უნივერსიტეტებში. გამოდით აუდიტორიებიდან და შემოუერთდით ჩვენს წამოწყებას. საქართველო არ გახდება რუსეთი და ამის გარანტორები ვიქნებით ჩვენ, დამოუკიდებელ საქართველოში დაბადებული თაობა. წინ ევროპისკენ! ძალა ერთობაშია!“ - აცხადებენ სტუდენტები.
მათ რამდენიმე ლექტორიც უერთდება, მათ შორის თსუ-ის ასოცირებული პროფესორი, ნათია კუპრაშვილი:
"ვუერთდები სტუდენტებს. მეც ვერ ჩავატარებ სააუდიტორიო შეხვედრებს იმ უნივერსიტეტის კედლებში, რომელიც, მინიმუმ, არ იმჩნევს საკუთარ ასოცირებულ-პროფესორზე განგრძობით მუქარებს და ზეწოლას. მარტო მე ვერ გავიფიცები, ცხადია რაც შეეხება სწავლა-სწავლებას, არც მე ვაპირებ შევწყვიტო და არც ეს სტუდენტები შეწყვეტენ განათლებას" - წერს კუპრაშვილი სოციალურ ქსელში.
ასევე თსუ-ის ჰუმანიტარული ფაკულტეტის პროფესორი სოფო შამანიდი.
"სტუდენტებმა განაცხადეს, რომ ორშაბათიდან ტოვებენ აუდიტორიებს. ჩემი, როგორც თსუს პროფესორის ვალია, ვიდგე იქ, სადაც ჩემი სტუდენტები დგანან და მათთან ერთად ვიბრძოლო მათი ევროპული მომავლისთვის. ორშაბათიდან მეც დავტოვებ აუდიტორიას. თბილისის სახელმწიფო უნივერსიტეტი • Tbilisi State University ორშაბათს ოფიციალურად მოგმართავთ გაფიცვის შესახებ - ეს ჩემი კონსტიტუციური უფლებაა (ვიდრე “კონსტიტუციონალისტი” კობახიძე არ ჩამომართმევს ამ უფლებასაც). მანამდე იურიდიულ საკითხებს გავარკვევ იმედია, სხვა პროფესორებიც ამყვებიან" - წერს შამანიდი.