ხელისუფლება "უცხოური აგენტების" სკანდალურ კანონპროექტს აბრუნებს: პირველი გამოხმაურება სოცქსელში
საპარლამენტო უმრავლესობა "უცხოური გავლენის გამჭვირვალობის შესახებ“ კანონპროექტს ე.წ. რუსულ კანონს პარლამენტში კვლავ დააინიციირებს.
ამის შესახებ საპარლამენტო უმრავლესობის ლიდერმა მამუკა მდინარაძემ პარტიის ოფისში გამართულ ბრიფინგზე განაცხადა.
მან არასამთავრობო სექტორის დაფინანსებაზე ისაუბრა და განაცხადა, რომ მათი დაფინანსების 90%-ზე მეტი გაუმჭვირვალედ რჩება. როგორც მდინარაძემ აღნიშნა, "საპარლამენტო უმრავლესობამ, პარტიის პოლიტიკურ საბჭოსთან კონსულტაციის შემდეგ, მიიღო გადაწყვეტილება, პარლამენტში ხელახლა წარადგინოს კანონპროექტი "უცხოური გავლენის გამჭვირვალობის შესახებ“. მისივე თქმით, კანონპროექტი საქართველოს პარლამენტში დაინიცირდება ზუსტად იგივე ტექსტით, როგორც შარშან იყო, ერთადერთი განსხვავებით - ნაცვლად ტერმინისა "უცხოური გავლენის აგენტი“ გამოყენებული იქნება ტერმინი - "უცხოური ძალის ინტერესების გამტარებელი ორგანიზაცია“, კანონპროექტის ყველა სხვა ჩანაწერი უცვლელია.
ამ განცხადებას მყისიერად მოყვა გამოხმაურება სოციალურ ქსელში, გთავაზობთ რამდენიმე კომენტარს:
- ანა ნაცვლიშვილი, პარლამენტარი პარტია "ლელოდან":
"სად მივდივართ?
ევროპაში!
დღეს ოცნებამ თავიდან შემოიტანა რუსული კანონი პარლამენტში.
მათი გემი იძირება და როგორც ბოროტ ძალას სჩვევია, უნდათ ამ გემმა მთელი ქვეყანა ჩაიყოლოს.
რადგან არ სურთ ეს ქვეყანა ევროპაში, მათ გარეშე უნდა გავაგრძელოთ ეს გზა!
ზღაპრის ბოლო კეთილია!"
- გია ხუხაშვილი, ექსპერტი:
"FSB-ს გეგმა საქართველოს "რბილი ძალით" ოკუპაციის შესახებ, გადამწყვეტ ფაზაში შევიდა".
- ნინია კაკაბაძე, ჟურნალისტი:
"პირდაპირ და დაუფარავად ამბობს (იგულისხმება მდინარაძე - რედ.), რომ საკონსტიტუციო უმრავლესობა უნდათ! ამაში ხელს არასამთავრობო სექტორი და დამოუკიდებელი მედია უშლის. ამიტომ ღია ომი გამოაცხადეს. ამ ბრძოლაში ან დამარცხდებიან და გაუყვებიან რუსული გემის გზას ან შეეგუეთ, რომ პუტინის რუსეთში ვრჩებით!"
- ეკა შარაშენიძე, გერმანიაში მცხოვრები ემიგრანტი:
"მნიშვნელოვანი ის კი არ არის, რომელი (უცხოური გავლენის აგენტები / რუსული) კანონი დააინიცირეს, არამედ ის, როდის დააინიცირეს ის.
ერთი რაშიც დავრწმუნდი, და ვეღარ გადავრწმუნებდი არის ის, რომ მოსახლეობა ვერ დააკნინეს და ეს მშვენივრად დაინახეს.
ასე რომ, სად მივდივართ?"
- ჟურნალისტი მერაბ მეტრეველიც ხვიჩას ამავე ვიდეო აქვეყნებს და წერს:
"ფეხბურთის ენაზე მივდივართ ევროპაზე.
პოლიტიკის ენაზე - ევროპაში და ამას ვეღარაფერი შეცვლის.
ხვიჩამ, ფაქტობრივად, ხალხს მომავალი აქციებისთვის სლოგანი აჩუქა..."
- ნანა მალაშხია, 2023 წლის მარტის აქციების ერთ-ერთი გმირი, ქალი დროშით:
"ან გავხდებით რუსეთის უკანა ეზო ან ვაგრძელებთ ბრძოლას ქვეყნის განვითარებისთვის, ევროინტეგრაციისთვის! ეს ქვეყანა ჩვენია და არა უსამშობლოების! გავიმარჯვებთ!"