"ნაპოლიმ" და კვარაცხელიამ იბრძოლეს, თუმცა "ბარსელონასთან" ვერაფერი გააწყვეს - ნეაპოლელები ჩემპიონთა ლიგას დაემშვიდობნენ

ჩემპიონთა ლიგის მერვედფინალური ტურის განმეორებით მატჩში "ნაპოლი" სტუმრად "ბარსელონას" დაუპირისპირდა და დამარცხდა ანგარიშით 3:1.

• გუნდები ასეთი შემადგენლობებით გავიდნენ მოედანზე:

ბარსელონა: ტერ შტეგენი, კუნდე, არაუხო, კუბარსი, კანსელო, კრისტენსენი, ფერმინი, გიუნდოგანი, რაფინია, იამალი, ლევანდოვსკი.

ნაპოლი: მერეტი, დი ლორენცო, რაჰმანი, ჟუან ჟეზუსი, მარიო რუი, ანგისა, ლობოტკა, ტრაორე, პოლიტანო, კვარაცხელია, ოსიმენი.

პირველი ტაიმი ორმხრივი შეტევებით დაიწყო, თუმცა მასპინძლების თამაში სულ უფრო მწვავე ხდებოდა, რაც მალე შედეგშიც აისახა. მე-15 წუთზე ჯერ "ბარსას" 20 წლის ფერმინ ლოპესმა აიღო მერეტის კარი, მე-17 წუთზე კი ჟოაო კანსელომ.

როგორც მოსალოდნელი იყო, ამის შემდეგ "ნაპოლი" შეტევაში კიდევ უფრო გააქტიურდა, რასაც 30-ე წუთზე მორიგი სწრაფი შეტევა, პოლიტანოს ზუსტი პასის შემდეგ ნეაპოლელთა ცენტრალურმა მცველმა ამირ რაჰმანიმ გოლით დააგვირგვინა. პირველი ტაიმი დასრულდა ანგარიშით 2:1.

მეორე ტაიმიც ნეაპოლელთა შეტევებით დაიწყო. ხვიჩა კვარაცხელიას პირველივე წუთებზე მიეცა ანგარიშის გათანაბრების შანსი, თუმცა ხვიჩას დარტყმული კარს ასცდა. მეორე ტაიმის პირველ ნახევარში ნეაპოლელთა შტურმს კატალონიელებმა გაუძლეს, ნელ-ნელა მოახერხეს სტუმართა უპირატესობის დაბალანსება და მერეტის კარს მწვავედ შეუტიეს. შედეგად 83-ე წუთზე ლევანდოვსკიმ მოახერხა და ამ მატჩში თავის სიტყვაც თქვა და "ნაპოლის" მესამე გოლი გაუტანა. მატჩის მიწურულს ხვიჩას კიდევ მიეცა გატანის შანსი, თუმცა მისი დარტყმა ისევ ამაო გამოდგა - ბურთი კატალონიელთა კარს ასცდა.

ორი მატჩის ჯამში (4:2) მეოთხედფინალში "ბარსელონა" გავიდა. "ნაპოლი" კი ჩემპიონთა ლიგას დაემშვიდობა.