უკრაინის მთავარი მზვერავის თქმით, ნავალნის გარდაცვალება დიდი ალბათობით თრომბმა გამოიწვია - ბუდანოვის განცხადებას მედია შოკისმომგვრელს უწოდებს

იმ განცხადებების ფონზე, რომ ნავალნი კოლონიაში პუტინის დავალებით მოკლეს, უკრაინის სამხედრო დაზვერვის სამსახურის ხელმძღვანელი კირილო ბუდანოვი ახალ ვერსიას ასაჯაროებს. მისი თქმით, ალექსეი ნავალნი შესაძლოა ბუნებრივი სიკვდილით გარდაცვლილიყო.

კიევში გამართულ პრესკონფერენციაზე საუბრისას ბუდანოვმა განაცხადა, რომ ნავალნის სიკვდილის მიზეზი "მეტ-ნაკლებად უკვე დადასტურებულია".

"შეიძლება იმედები გაგიცრუოთ, მაგრამ რაც ვიცით ისაა, რომ ნავალნის გარდაცვალების მიზეზი თრომბი გახდა. ეს მეტ-ნაკლებად დადასტურებულია",- განაცხადა ბუდანოვმა.

კოლონიის ადმინისტრაცია, სადაც ნავალნი გარდაიცვალა, ოჯახისთვის ცხედრის გადაცემაზე კვირაზე მეტი დრო უარს ამბობდა. ამაში პოლიტიკოსის ქვრივი, იულია ნავალნაია პუტინს ადანაშაულებდა: "გადმოგვეცით ჩემი ქმრის ცხედარი. თქვენ ის ცოცხლად აწამეთ და ახლა მკვდარსაც აწამებთ. ვერც ერთი ჭეშმარიტი ქრისტიანი ვერ გააკეთებდა იმას, რასაც პუტინი ალექსეის ცხედარს უკეთებს".

საბოლოოდ, პოლიტიკოსის ნეშტი დედამისს, ლუდმილა ივანოვნა ნავალნაიას გადაეცა იმ ულტიმატუმით, რომ შვილს ფარულად დაკრძალავდა. ამ შეთანხმებაზე ნავალნის დედამ უარი თქვა და მოითხოვა კანონის დაცვა, რომელიც გამომძიებლებს ავალდებულებს, გარდაცვლილის ოჯახს ცხედარი გადასცეს.

წყარო: dailytelegraph

მოამზადა: ანა სიბოშვილმა