"ეს საშინელი ამბავია... როგორც ჩანს, ის პუტინმა მოკლა" - როგორ ეხმაურებიან მსოფლიო ლიდერები ნავალნის გარდაცვალებას?
"ჩვენ უნდა დავადგინოთ ყველა ფაქტი და რუსეთმა უნდა უპასუხოს ყველა სერიოზულ კითხვას მისი გარდაცვალების გარემოებების შესახებ" - ასე ეხმაურება ნატო-ს გენერალური მდივანი, იენს სტოლტენბერგი რუსი ოპოზიციონერი პოლიტიკოსის, ალექსეი ნავალნის გარდაცვალებას.
მისი თქმით, ნავალნის გარდაცვალების შესახებ გავრცელებული ინფორმაციის გამო ღრმად დამწუხრებული და აღელვებულია.
გაერთიანებული სამეფოს პრემიერ-მინისტრი, რიში სუნაკი რუსი ოპოზიციონერი პოლიტიკოსის, ალექსეი ნავალნის გარდაცვალებას "საშნელ ამბავს" უწოდებს.
"ეს საშინელი ამბავია. ალექსეი ნავალნი, რომელიც გამძვინვარებით იცავდა რუსულ დემოკრატიას, წარმოუდგენელ გამბედაობას იჩენდა მთელი ცხოვრების მანძილზე, ჩემი ფიქრები მის მეუღლესთან და რუს ხალხთანაა, ვისთვისაც ეს უდიდესი ტრაგედიაა“, - წერს რიში სუნაკი სოციალურ ქსელში.
ევროპული საბჭოს პრეზიდენტის, შარლ მიშელის განცხადებით, რუსი ოპოზიციონერი პოლიტიკოსის, ალექსეი ნავალნის ტრაგიკულ სიკვდილზე პასუხისმგებლობა მხოლოდ რუსეთის რეჟიმს აკისრია.
„ალექსეი ნავალნი იბრძოდა თავისუფლებისა და დემოკრატიის ღირებულებებისთვის. თავის იდეალებისთვის მან თავი გაწირა. ევროკავშირი ამ ტრაგიკულ სიკვდილზე პასუხისმგებლობას რუსეთის რეჟიმს აკისრებს. ვუსამძიმრებ მის ოჯახს და მათ, ვინც იბრძვის დემოკრატიისთვის მთელ მსოფლიოში ყველაზე ბნელ ვითარებაში. მებრძოლები იღუპებიან, მაგრამ თავისუფლებისთვის ბრძოლა არასოდეს მთავრდება“, - წერს მიშელი სოციალურ ქსელში.
"ახლახან ცნობილი გახდა, რომ ალექსეი ნავალნი რუსეთის ციხეში გარდაიცვალა. როგორც ჩანს, ის მოკლა პუტინმა, ისევე როგორც ათასობით სხვა, ვინც ამ ერთი არსების გამო აწამეს. პუტინისთვის სულ ერთია, ვინ მოკვდება, მთავარია თავისი პოზიცია შეინარჩუნოს. ამიტომაც არ უნდა დავზოგოთ არაფერი. პუტინმა უნდა წააგოს, უნდა დაკარგოს ყველაფერი და აგოს პასუხი იმისთვის, რაც გააკეთა" - წერს უკრაინის პრეზიდენტი ვოლოდიმირ ზელენსკი.
შეგახსენებთ, რუსეთის ფედერალური სასჯელაღსრულების სამსახურის იამალო-ნენეცის ავტონომიური ოლქის რეგიონული დეპარტამენტის ცნობით, დღეს, სასჯელაღსრულების მე-3 გამოსასწორებელ კოლონიაში რუსი ოპოზიციონერი პოლიტიკოსი, ალექსეი ნავალნი გარდაიცვალა.
უწყების მტკიცებით, ნავალნიმ თავი ცუდად იგრძნო და გონება დაკარგა, რის შემდეგაც მედიკოსებმა მის გადასარჩენად რეანიმაციული ღონისძიებები განახორციელეს, მაგრამ უშედეგოდ.