"მანქანაში მხოლოდ გია იყო... შვილები ძალიან განიცდიან მომხდარს" - რას ჰყვებიან მამაკაცზე, რომელიც გუშინ ავტომობილით მტკვარში გადავარდა
თბილისში, მეტეხის ხიდთან რამდენიმესაათიანი სამძებრო-სამაშველო სამუშაოების შედეგად მაშველებმა მტკვარში გადავარდნილი ავტომობილი წყლიდან გამთენიისას ამოიტანეს.
- როგორც ჟურნალისტებს საგანგებო სიტუაციების მართვის სამსახურის წარმომადგენელმა, თბილისის სახანძრო ძალების სამმართველოს უფროსმა, ლევან მუსელიანმა განუცხადა, ავტომობილში ახალგაზრდა მამაკაცის ცხედარი იპოვეს.
"შემოსული ინფორმაციით, მეტეხის ხიდიდან მდინარე მტკვარში გადავარდა ავტომობილი. ადგილზე დროულად მოახდინა რეაგირება სახანძრო-სამაშველო ძალებმა. ჩართული იყო მყვინთავთა ჯგუფი, ასევე, მცურავი საშუალებები, მეხანძრე-მაშველთა პირადი შემადგენლობა. რამდენიმესაათიანი უწყვეტი ძებნის შემდეგ, მყვინთავებმა იპოვეს ავტომანქანა, რომელიც ამოყვანილია მძიმე ტექნიკის საშუალებით. ავტომანქანაში ნანახია ერთი გარდაცვლილი ახალგაზრდა მამაკაცის ცხედარი. რაც შეეხება ვინაობას, ამ ეტაპზე უცნობია და დაადგენს შესაბამისი სამსახური“, - განაცხადა ლევან მუსელიანმა. მის კომენტარს "საზოგადოებრივი მაუწყებელი" ავრცელებს.
გარდაცვლილი გურამ (გია) ფოცხვერაშვილია. როგორც ჩვენთან საუბარში ყოფილი მეუღლე ლილიკო ხარატიშვილი ამბობს, ბოლო დროს პრობლემები ჰქონდა, მაგრამ არ სჯერა, რომ ეს შემთხვევა სუიციდს უკავშირდება.
- მე და გია 18 წელი ვცხოვრობდით ერთად, სამი საერთო შვილი გვყავს. ხუთ წელზე მეტია ერთად აღარ ვართ, ის მარტო ცხოვრობდა თბილისში, სხვა ოჯახი არ ჰყოლია. წუხელ ლაივს ვუყურებდი ტიკ-ტოკში, როდესაც ეს ავარიის ამბავი გავრცელდა, არც ვიცოდი, რომ გიას მანქანა იყო გადავარდნილი.
შემდეგ ჩემმა გოგონამ დამირეკა, გია დაიღუპაო, მამიდაშვილს უთქვამს. რა მოხდა არ ვიცი, ბოლო პერიოდში ცოტა პრობლემები ჰქონდა, მაგრამ ისეთ დონეზე მისულიყო, რომ თავისი თავი ასე გაეწირა, არ მჯერა, ვერ წარმოვიდგენ ასეთ რამეს.
- ბოლოს როდის ესაუბრეთ?
- გუშინ მომწერა მესიჯი, უმცროსი ბავშვისთვის, რომელიც 12 წლის არის, ფული უნდა ჩაერიცხა, იმაზე ვესაუბრებოდი. უფროსები სრულწლოვანები არიან. მომწერა არ მაქვსო, მეტი პასუხი არ დამიბრუნებია.
- სად მუშაობდა?
- ხელოსანი იყო წლები, ბინებს არემონტებდა. შვილები ძალიან განიცდიან მომხდარს.
- მარტო იჯდა ხომ მანქანაში?
- დიახ, ასე დაიწერა, მეც ინტერნეტში ვკითხულობ, რა მოხდა. თავიდან თითქოს წერდნენ, რომ ოთხი ადამიანი დაიღუპაო და ბოლოს აღმოჩნდა, რომ მარტო გია იყო მანქანაში.