რა არის რუსეთის იდუმალი კოსმოსური იარაღი - "...მისი გამოცდა დამანგრეველ შედეგებამდე მიგვიყვანს"
14 თებერვალს ცნობილი გახდა, რომ რუსეთი კოსმოსში ბირთვული იარაღის განთავსებას აპირებს. ამან, რა თქმა უნდა, აჟიოტაჟი გამოიწვია: აშშ-ის პალატის სადაზვერვო კომიტეტის თავმჯდომარის მაიკ ტერნერის განცხადებით, ბირთვულმა იარაღმა შესაძლოა, საფრთხე შეუქმნას ხელოვნური თანამგზავრების უსაფრთხოებას.
თუმცა, კონკრეტულად რა სახის იარაღზეა საუბარი, დაზვერვისთვის უცნობია. სხვადასხვა გამოცემის თანახმად, საქმე ეხება ატომურ კოსმოსურ ხომალდს, ან ბირთვულ შეიარაღებას. არსებობს შემდეგი ვარიანტები: ბირთვული იარაღი, რომელიც განლაგდება ორბიტაზე; ან ბირთვულ ენერგიაზე მომუშავე თანამგზავრი, რომელიც თავად არ იქნებოდა ბომბი, არამედ გამოიყენებს ატომურ ენერგიას სხვა სახის მოწყობილობის გასაძლიერებლად.
- ნებისმიერ შემთხვევაში, რუსეთი არღვევს 1967 წლის კოსმოსურ ხელშეკრულებას, რომლის მიხედვითაც კოსმოსში ბირთვული დეტონაციები აკრძალულია.
მეცნიერები შიშობენ, რომ კოსმოსში მსგავსი დესტრუქციული სახის იარაღის გამოცდა დამანგრეველ შედეგებამდე მიგვიყვანს. 1962 წელს ამერიკამ მაღალ სიმაღლეზე ბირთვული ტესტი ჩაატარა - შედეგად დაზიანდა არა მხოლოდ მხედველობის ხაზის თანამგზავრები, არამედ დედამიწის მეორე მხარეს მდებარე თანამგზავრებიც - რადიაცია გადადიოდა პლანეტის მაგნიტური ველით.
თუ რუსეთი მსგავს დეტონაციას განახორციელებს, ეს გავლენას მოახდენს არა მხოლოდ ამერიკულ თანამგზავრებზე, არამედ რუსეთის, ჩინეთისა და სხვა ქვეყნების თანამგზავრებზეც. ზიანი მიადგება საერთაშორისო კოსმოსურ სადგურსაც.
- ვარაუდობენ იმასაც, რომ რუსეთი აპირებს განათავსოს ატომური სატელიტი ელექტრონული ომის ( ew ) შესაძლებლობით. ელექტრონული შეტევის მიზანია სამიზნე თანამგზავრის მიერ გაგზავნილი ან მიღებული სიგნალების დაბლოკვა ან გაყალბება;
„ახალი მტკიცებულებები აჩენს ვარაუდს, რომ რუსეთი შესაძლოა ავითარებდეს მაღალი სიმძლავრის კოსმოსურ EW პლატფორმებს, რათა გააძლიეროს არსებული სახმელეთო პლატფორმები“ - აღნიშნულია Secure World Foundation-ის გასულ წელს გამოქვეყნებულ მოხსენებაში.
წყარო: economist