მოსკოვის მერიამ სექს წვეულებები აკრძალა - ორგანიზატორები ამბობენ, რომ ეროტიკულ ღონისძიებებს საქართველოში გამართავენ

მოსკოვის მერიამ ეროტიკული წვეულებები აკრძალა, ამის შესახებ გაფრთხილება უკვე გაეგზავნათ წვეულებების ორგანიზატორებს. კანონის დარღვევისთვის მათ პასუხისმგებლობა დაეკისრებათ. იუწყება ტელეარხი Dozhd, Kinky Party საზოგადოებაზე დაყრდნობით.

"მიუხედავად იმისა, რომ ჩვენი ღონისძიებები ყოველთვის ემორჩილებოდა კანონს და მიზნად ისახავდა თავისუფალი გამოხატვისთვის უსაფრთხო გარემოს შექმნას, მივიღეთ გაფრთხილება, რომ სექსის თემატიკასთან დაკავშირებული ნებისმიერი ღონისძიების გამართვა დაუშვებელია“, - ნათქვამია ოთხშაბათს ტელეგრამის Kinky Party-ის არხზე.

"დოჟდი“ აღნიშნავს, რომ შემდეგი დახურული წვეულება მოსკოვში 17 თებერვალს უნდა გამართულიყო, მაგრამ ორგანიზატორებმა გააუქმეს.

"ამჟამად ჩვენ ვაგრძელებთ ღონისძიებებს საქართველოში და ვიმედოვნებთ, რომ შეგხვდებით სხვა ქვეყნებში“, - განაცხადეს ორგანიზატორებმა.

ამ დროისთვის უცნობია, მსგავსი წვეულებები უკვე გაიმართა თუ არა საქართველოში, თუ მომავალში გეგმავან.

მას შემდეგ, რაც რუსეთის ხელისუფლებამ არარსებული "საერთაშორისო ლგბტ მოძრაობა“ ექსტრემისტულ ორგანიზაციად აღიარა და ასევე ბლოგერ ანასტასია ივლეევას მიერ ჩატარებული სკანდალური "თითქმის შიშველი“ წვეულების შემდეგ, რომელმაც ოფიციალური პირების აღშფოთება გამოიწვია, სამართალდამცავმა უწყებებმა დაიწყეს წვეულებების მასიური ჩაშლა. თებერვლის დასაწყისში, ძალოვანებმა ჩაშალეს ეკატერინბურგში სექს წვეულება, რომელიც ასევე დახურულ ფორმატში იმართებოდა. ასეთ წვეულებებში მონაწილეებს აკავებენ, აპატიმრებენ ან აიძულებენ საჯაროდ ბოდიში მოიხადონ "ამორალური საქციელისთვის“ და კლუბები იხურება.

წაიკითხეთ ასევე:

• სკანდალად ქცეული "შიშველი წვეულება" რუსეთში, რომელსაც კირკოროვი, დიმა ბილანი, სობჩაკი და სხვა ცნობილები ესწრებოდნენ - "ჩვენი კაცები ფრონტზე იღუპებიან და ესენი შიშვლები დადიან!"