"...არის გარკვეული პრობლემები, რადგან ზოგიერთ საქმეში მთავარი მოქმედი პირები გარდაცვლილები არიან" - რატომ დაიბარეს თამუნა მუსერიძე შსს-ში და რა თქვა უწყებიდან გამოსვლის შემდეგ?

"გამოვედი, მშვიდობაა. გამოძიება მიმდინარეობსო. ზოგი საქმე დაიხურა, ზოგს ისევ ვიძიებთო. მთავარი პრობლემა ის არის, რომ ზოგიერთი მათგანი ხანდაზმულია, დოკუმენტები განადგურებულია და მთავარი დამნაშავეები გარდაცვლილები არიანო" - წერს სოციალრ ქსელში ჟურნალისტი და არასამთავრობო ორგანიზაციის "ვეძებ" ხელმძღვანელი თამუნა მუსერიძე. როგორც სოციალურ ქსელში თავადვე აღნიშნა, ის დაბარებული იყო შსს-ში.

AMBEBI.GE-სთან კი ამ თემაზე მუსერიძემ ასეთი კომენტარი გააკეთა:

- 2022 წლის სექტემბერში რამდენიმე საქმე მივიტანე შინაგან საქმეთა სამინისტროში. საქმეები ეხებოდა რამდენიმე ბავშვს, რომლებიც საქართველოს ფარგლებს გარეთ არიან გაყიდული და საქმეები საქართველოში გაყიდული ბავშვების შესახებ. სხვადასხვა სახის ქეისები გახლდათ. მას მერე წელიწად-ნახევარი გავიდა და არანაირი სიახლე არ გვქონია.

არ ვიცოდით, როგორ მიმდინარეობდა გამოძიება. როდესაც "ბიბისიმ" მკითხა, რა ხდებოდა გამოძიებასთან დაკავშირებით, ვუთხარი, რომ არ ვიცი გამოძიებასთან დაკავშირებით რა ხდება, იმიტომ, რომ პასუხები არ მაქვს-მეთქი. დღეს დამიბარეს და მითხრეს, რომ გამოძიება გრძელდება, უბრალოდ, არის გარკვეული პრობლემები, მაგალითად, ის, რომ ზოგიერთ საქმეში მთავარი მოქმედი პირები გარდაცვლილები არიან, ზოგიერთი საქმე ხანდაზმულია. მითხრეს, რომ ჩემი მიტანილი საქმეების გარდა კიდევ რამდენიმე ათეულობით საქმეა აღძრული, ზოგი არის დასრულებული და ზოგი - მიმდინარეა. ამ ყველაფრის შესახებ საქმის კურსში ჩამაყენეს.

- შენი პასუხი რა არის?

- ჩემი პასუხი არის ის, რომ რეალურად ვიცით ის ადამიანები, რომლებიც ამ საქმეში იყვნენ გარეულები. არავის დასჯას და დაჭერას არ ვითხოვთ, უბრალოდ, ვითხოვთ პასუხებს კითხვებზე, თუნდაც შევიტყოთ ის, ვინ არიან იმ ბავშვების მშობლები, რომლებმაც არალეგალურად გაყიდეს. გვაინტერესებს ინფორმაცია სამშობიარო სასაფლაოების შესახებაც...

ამ კითხვებზე სამწუხაროდ, პასუხები არ მაქვს. ის, რომ საქმე არის ხანდაზმული, გასაგებია, მაგრამ ფაქტია, რომ არსებობენ ადამიანები, რომლებიც უშუალოდ მონაწილეები იყვნენ ამ ბავშვების უკანონო გაყიდვაში და ამ სქემაში იყვნენ გარეულები... თუ არსებობენ ადამიანები, რომლებიც ამ ყველაფრის მონაწილეები არიან, რატომ ვერ უნდა მოხერხდეს სიმართლის გარკვევა? - ეს მაინტერესებს.

წაიკითხეთ ასევე:

• "ბიჭებს საქართველოში 1500 მანეთად ყიდდნენ, გოგონებს - 1000 მანეთად" - სიცრუეზე აგებული გაშვილების საერთაშორისო სქემა და საქართველო: რას წერს "ტელეგრაფი"?