"მის იაპონიის" სილამაზის კონკურსს მოულოდნელი გამარჯვებული ჰყავს. 26 წლის კაროლინა შინომ ორშაბათს კონკურსის მთავარი პრიზი მიიღო, თუმცა მისმა გამარჯვებამ ქვეყანაში მწვავე დებატები გამოიწვია იმის შესახებ, თუ რას ნიშნავს იყო იაპონელი.
საქმე ის არის, რომ კაროლინა უკრაინელია. იგი 1998 წელს უკრაინაში დაიბადა. 5 წლის ასაკში კი იაპონიაში გადავიდა საცხოვრებლად, მას შემდეგ, რაც დედამისი ცოლად იაპონელს გაჰყვა.
"ეს ადამიანი, რომელიც მის იაპონიად აირჩიეს - უკრაინელია. გავიგეთ, რომ ლამაზია, მაგრამ ეს არის "მის იაპონია?" - წერენ კომენტარებში.
"ნახევრად იაპონელი რომ ყოფილიყო, გავიგებდით, მაგრამ საერთოდ სხვა ეროვნებისაა. დაბადებულიც კი არ არის აქ", - ნათქვამია სხვა კომენტარში.
იმასაც ამბობენ, რომ კაროლინას გამარჯვება პოლიტიკურია და რომ იაპონიამ უკრაინისადმი მხარდაჭერა ამ გზით გამოხატა.