ალენ დელონის "მარტოობის ასი წელიწადი": მემკვიდრეების ბრძოლა მამის სიყვარულისთვის და მსახიობის "ტყის სასახლე" გაპარტახების პირას
ფრანგული კინოს ოქროს ხანის უკანასკნელი სუპერვარსკვლავი ალენ დელონი მედიის პირველ გვერდებზე დაბრუნდა. მაგრამ მიზეზი არც ფილმში თამაში გამხდარა და არც სიბერეში ქორწინება, როგორც ეს მისი ასაკის ვარსკვლავებში ხდება ხოლმე.
მას ოდესღაც ყველაზე ლამაზ მამაკაცად მოიხსენიებდნენ, მაგრამ მას შემდეგ დიდი დრო გავიდა. ახლა ალენი 88 წლის მოხუცია, რომელიც ავად არის და კარჩაკეტილ ცხოვრებას ეწევა.
ის მთავარ თემად ოჯახში მიმდინარე პროცესების გამო იქცა. თაყვანისმცემლები შოკირებულები აკვირდებიან მსახიობის გარშემო მიმდინარე მოვლენებს, რომლის მთავარ როლში მისი სამი შვილია - ისინი უიმედოდ იბრძვიან მამის სიყვარულის ნამსხვრევებისთვის.
"ჩიტები სიკვდილამდე იმალებიან. დიდი ცხოველები კი ყურადღების ცენტრში კვდებიან“, - ასე იწყება ვრცელი სტატია გაზეთ Le Monde-ში დელონის ოჯახური მტრობის შესახებ.
როგორც გაზეთი წერს, ამ ამბავში კლასიკური ბერძნული ტრაგედიის ყველა ელემენტია წარმოდგენილი: მეომარი ოჯახი, დანგრეული სახლი, რომელსაც არც კი ახსოვს ოდესღაც მასში გაჟღენთილი სიცილის ექო. მაგრამ ამ ტრაგედიაში მნიშვნელოვანია მთავარი გმირის ტანჯვა, რომელსაც არ ასვენებენ ახალგაზრდობის დემონები.
ფრანგებისთვის დელონი რჩება "დიდ მტაცებლად", რომელმაც დაიპყრო ევროპა 1960-იან წლებში. მაყურებელი უემოციოდ ვერ იხსნებს ისეთ ფილმებს, როგორიცაა "ლეოპარდი" და "როკო და მისი ძმები".
ათწლეულების განმავლობაში ისინი აღფრთოვანებით მიჰყვებოდნენ დელონის ნაყოფიერი კარიერის ეტაპებს და მისი მრავალფეროვანი პირადი ცხოვრების აღმავლობასა და ვარდნას.
საზოგადოებამ იცოდა, რომ დელონს სამი შვილი ჰყავდა: ორი ვაჟი და ქალიშვილი ორი სხვადასხვა ქალისგან. ასევე ცნობილი იყო, რომ მას ჰყავდა კიდევ ერთი - მესამე ვაჟი, რომელიც მსახიობს არასოდეს უცნია მემკვიდრედ. ის რამდენიმე თვის წინ ზედოზირებით გარდაიცვალა.
ბოლო ორი კვირაა მედია დელონის ოჯახში განხეთქილების შესახებ წერს. მსახიობის სამმა აღიარებულმა შვილმა ვერ იპოვეს უკეთესი გზა საკუთარი პრეტენზიების გამოსახატად, ვიდრე მედია და სასამართლოა. ისინი არ ერიდებიან ერთმანეთის შეურაცხყოფას, ბრალდებებს, სასამართლო პროცესებს და ფარული ჩანაწერების გამოქვეყნებასაც კი.
სცენაზე პირველად 59 წლის ენტონი დელონი - ალენის პირველი ცოლის, ნატალის ვაჟი გამოჩნდა. მან ინტერვიუ მისცა Paris-Match-ს, რომელშიც თავისი უმცროსი (ნახევრად) და, ანუშკა ტყუილში დაადანაშაულა. მისი თქმით, ქალმა დამალა მამის ჯანმრთელობის მდგომარეობა.
33 წლის ანუშკა, ალენის მეორე ცოლის, ჰოლანდიელი მოდელის როზალი ვან ბრემენის ქალიშვილია. ნახევარძმის ბრალდებებს ქალი ადვოკატის საშუალებით გამოეხმაურა და ენტონი მამის შესახებ ცრუ ინფორმაციის გავრცელებაში დაადანაშაულა, ენტონის მტკიცებით, ალენს გონებრივი პრობლემები ჰქონდა.
და-ძმა აქ არ გაჩერებულან და კიდევ ერთხელ საჯაროდ შეურაცხყოფა მიაყენეს ერთმანეთს, ამჯერად ფრანგულ ტელევიზიაში საუბრისას.
მალე კონფლიქტში მსახიობის მესამე შვილი, ანუშკას ძმა და ენტონის ნახევარძმა, 29 წლის ალენ-ფაბიენი ჩაერთო. მან "ინსტაგრამზე" ფარულად გაკეთებული ჩანაწერი გამოაქვეყნა, რომელშიც (მისი თქმით) ანუშკა მამას ძმებზე საშინელ რაღაცებს ეუბნება.
მხარეების დაპირისპირება სასამართლოში გაგრძელდა, რომელიც დაკავშირებული იყო დელონის მკურნალობასთან, რომელმაც 2019 წელს ინსულტი გადაიტანა. მსახიობს სხვა მძიმე ავადმყოფობაც აწუხებს, რომელსაც ფრანგული მედია არ ასახელებს.
შაბათს, 13 იანვარს სასამართლოს მიერ დანიშნულმა ექიმმა მსახიობი გასინჯა, მაგრამ შვილებს სხვა სიმართლე აქვთ.
მოხუცი ვარსკვლავის სასამართლო პროცესები მხოლოდ მისი შვილებით არ შემოიფარგლება. დაპირისპირებაში უკანა პლანზე ჩანს კიდევ ერთი პერსონაჟი: 66 წლის ჰირომი როლინი, დელონის ყოფილი დიასახლისი და სავარაუდოდ, მისი საყვარელი ქალი.
გასულ წელს მსახიობის შვილებმა ქალი სახლიდან გააძევეს. როლინმა მათ წინააღმდეგ სასამართლოში სარჩელი შეიტანა და განაცხადა, რომ მათ მამის სიცოცხლეს საფრთხე შეუქმნეს, რადგან მისთვის აუცილებელი მედიკამენტები არ მისცეს.
ეს ყველაფერი ვითარდება დელონის მიერ აშენებულ ე.წ. ტყის სასახლეში, რომელიც პარიზის სამხრეთ-აღმოსავლეთით 120 კმ-ში მდებარეობს. სწორედ იქ ცხოვრობს მსახიობი თავის უმცროს შვილთან - ალენ-ფაბიენთან ერთად. დანარჩენი ორი შვილი პერიოდულად სტუმრობს მამას.
სასახლე თითქმის მთლიანად მოწყვეტილია გარე სამყაროს. ალენ-ფაბიენის თქმით, მათი საცხოვრებელი დიდი ხანია იქცა სამარცხვინო ჩრდილად იმისა, რაც ადრე იყო. "ყველაფერი მუდმივად ფუჭდება, ელექტროენერგია არ მუშაობს“, - ამბობს ვაჟი.
ყველაზე სამწუხარო ის არის, რომ კონფლიქტის ყველა მხარე ამბობს, რომ მართალია, ალენ დელონი ფიზიკურად სუსტად არის და ყოველთვის ადეკვატურად არ აღიქვამს რეალობას, ის მაინც საღად აზროვნებს და აცნობიერებს, რაც ხდება მის ოჯახში.
ფრანგები მიიჩნევენ, რომ ტრაგედიის ფესვები თავად მსახიობის წარსულშია.
დელონის ბავშვობა და ახალგაზრდობა არ ყოფილა უღრუბლო. შესაძლოა, წარსულის რთულმა მოვლენებმა იმდენად ღრმა კვალი დატოვა მის სულში, რომ ვერასოდეს შეძლო შვილებთან ნორმალური ურთიერთობის დამყარება.
ალენ დელონი პარიზის გარეუბანში 1935 წელს დაიბადა. ოთხი წლის ასაკში, მას შემდეგ, რაც მისი მშობლები განქორწინდნენ, მინდობით ოჯახში გააგრძელა ცხოვრება.
არ უყვარდა სკოლა და ხშირად აცდენდა გაკვეთილებს. სამხედრო სამსახურიდან ინდოჩინეთის ომში გაგზავნეს, მაგრამ მანქანის ქურდობის გამო სამხედრო სასამართლოში გაასამართლეს. 1950-იანი წლების ბოლოს პარიზში დაბრუნებული დელონი მეძავებისა და განგსტერებს შორის ცხოვრობდა, მაგრამ შემდეგ, არაჩვეულებრივი გარეგნობის წყალობით, კინოს სამყაროში მოხვდა.
როგორც გაზეთი Le Monde წერს:
"ეჭვგარეშეა, რომ მისი ეგო უზარმაზარია და ის შვილებს პოტენციურ კონკურენტებად განიხილავდა, რომელთა ამბიციებიც თავიდანვე უნდა დაემხო“.
საიდუმლო არ არის, რომ დელონი ძალიან მკაცრად ექცეოდა თავის ვაჟებს, რომლებიც შედეგად მოიხმარდნენ ნარკოტიკებს, ატარებდნენ იარაღს და კანონთან ჰქონდათ პრობლემები.
მაგრამ ქალიშვილთან ყველაფერი განსხვავებული იყო. 2008 წელს მან ანუშკაზე თქვა, ”ასე ხშირად ქალისთვის არ მითქვამს, რომ მიყვარს”.
დელონის მესამე ვაჟს კიდევ უფრო არ გაუმართლა. მისი დედა გერმანელი როკ ვარსკვლავი გახლდათ. არი ბულონი დაიბადა 1962 წელს, მაგრამ დელონმა არასოდეს აღიარა მისი მამობა. ბიჭს მსახიობის დედა ზრდიდა, რომელიც დარწმუნებული იყო, რომ ის ნამდვილად მისი შვილიშვილი იყო. არი შარშან პარიზში ნარკოტიკების ზედოზირებით გარდაიცვალა.
დელონის ანდერძის თანახმად, მისი ქონების ნახევარი ანუშკას გადაეცემა, მეორე კი ორ ვაჟს შორის გაიყოფა.
თუმცა, როგორც ჩანს, და-ძმებს შორის უთანხმოება ფულზე არ არის.
ისინი სასოწარკვეთილად იბრძვიან მამის სიყვარულისთვის და იმაზე, თუ რა ადგილი დაეთმობათ მათ მსახიობის ბიოგრაფიაში.
წაიკითხეთ ასევე: