ნატო-სა და რუსეთს შორის ომის სცენარი - Bild საიდუმლო დოკუმენტებს აქვეყნებს: პუტინი ახალი ომისთვის ემზადება?

ჩრდილო ატლანტიკურ ალიანსში (ნატო) რუსეთის მასშტაბური შეტევისთვის ემზადებიან, რომელიც შესაძლოა, აღმოსავლეთ ფლანგზე განხორციელდეს. მონაცემები ბუნდესვერის (გერმანიის ფედერაციული რესპუბლიკის შეიარაღებული ძალები) საიდუმლო დოკუმენტებით გახდა ცნობილი.

დოკუმენტებში ნათქვამია, რომ გერმანიის თავდაცვის სამინისტრო დეტალურად განიხილავს NATO-ს რუსეთთან შესაძლო "კონფლიქტის გზას“. ნაბიჯ-ნაბიჯ არის აღწერილი რუსეთისა და დასავლეთის შესაძლო მოქმედებები, კულმინაცია კი ნატო-ს ასობით ათასი ჯარისკაცის განთავსება და რუსეთთან გარდაუვალი კონფლიქტის დაწყებაა.

BILD დოკუმენტის მიხედვით აღწერილ სცენარს აქვეყნებს, თუმცა უსაფრთხოების გამო, მთელ ინფორმაციას რიცხოვნობასა და ნატო-ს ჯარისკაცების გადაადგილებაზე არ ასაჯაროებს.

• ბუნდესვერის სცენარი, "ალიანსის თავდაცვა 2025“ შემდეგნაირია:

მოქმედებები 2024 წლის თებერვლიდან დაიწყება. რუსეთი მობილიზაციის მორიგ ტალღას დაიწყებს და ჯარში დამატებით 200 000 ადამიანს გაიწვევს. ივნისში კრემლი უკრაინაში გაზაფხულის შეტევას დაიწყებს და უკრაინის შეიარაღებულ ძალებს უკან დაახევინებს. თავდაპირველად დაფარული, ხოლო ეტაპობრივად სულ უფრო ნათელი შეტევა დასავლეთზე ივლისში დაიწყება.

ბალტიის ქვეყნებში მოსალოდნელია კიბერ შეტევები და ჰიბრიდული ომის სხვადასხვა სახეები. მოხდება შეტაკებები, რომელსაც რუსეთი გამოიყენებს თავის და ბელარუსის ტერიტორიებზე მასშტაბური წვრთნების დასაწყებად. სცენარის მიხედვით, დაძაბულობა იქნება იმ შემთხვევაში, თუ რუსეთი თავის ჯარებსა და საშუალო მანძილზე მოქმედ რაკეტებს კალინინგრადში გადაისვრის.

2024 წლის დეკემბრიდან "სუვალსკის დერეფნის“ ადგილას ხელოვნურად გამოწვეული "სასაზღვრო კონფლიქტი“ მოხდება, რომელიც "უამრავ მსხვერპლსა და არეულობას“ გამოიწვევს.

იმ მომენტში, როდესაც აშშ, არჩევნების შედეგების გამოცხადებამდე, შესაძლოა, რამდენიმე კვირით, ლიდერის გარეშე დარჩეს, რუსეთი ბელარუსის მხარდაჭერით, ნატო-ს ტერიტორიაზე უკრაინაში 2014 წლის შეჭრის მსგავსს გაიმეორებს. 2025 წლის მაისში ნატო მიიღებს შეკავების გადაწყვეტილებას, "X დღეს“ ნატო აღმოსავლეთის ფლანგზე 300 000 ჯარისკაცს გადაისვრის, მათ შორის 30 000 ბუნდესვერის იქნება.

სცენარი “X-დღის“ შემდეგ 30 დღეში მთავრდება. შეკავებული იქნება თუ არა რუსეთი ამ სცენარით, ღია კითხვად რჩება. გერმანიის თავდაცვის წარმომადგენელმა ალიანსის დაცვის სცენარის კომენტარზე უარი თქვა.

ავტორი: ანრი კურტანიძე