საიდუმლო სპეცოპერაცია ღაზაში - როგორ გაიყვანეს საომარი ზონიდან ამერიკელი ჯარისკაცის ოჯახის წევრები
აშშ-ის სამხედრო მოსამსახურის დედა და ბიძა ღაზიდან, საომარი ზონიდან საიდუმლო ოპერაციის საშუალებით გაიყვანეს და გადაარჩინეს. ოპერაციაში კოორდინირებულად იყვნენ ჩართულები აშშ-ის, ისრაელისა და ეგვიპტის სახელმწიფოების მთავრობისა და საიდუმლო სამსახურების წარმომადგენლები.
- ამის შესახებ Associated Press-თან ამერიკელი მაღალჩინოსანი ანონიმურობის დაცვის პირობით საუბრობს. როგორც გამოცემა წერს, ეს არის პირველი შემთხვევა, როცა ამგვარ ოპერაციაზე საჯაროდ ისაუბრეს.
44 წლის ზაჰრა სკაკმა, ძმასთან, ფარიდ სუკაიკთან ერთად, რომელიც ამერიკის მოქალაქეა, ღაზა ახალი წლის ღამეს დატოვა - აცხადებს გამოცემასთან ამერიკელი ოფიციალური პირი.
- მისივე თქმით, ზაჰრას ქმარი, აბედალა სკაკი ღაზაში მიმდინარე საომარი მოქმედებების დროს მოკლეს. მისი სამი ვაჟიდან ერთი, 24 წლის ახალგაზრდა მამაკაცი ამერიკის შეერთებული შტატების ჯარში ქვეითად მსახურობს. ამერიკელი ოფიციალური პირის თქმით, ამერიკელები სპეცოპერაციის დროს უშუალოდ ღაზაში არ იმყოფებოდნენ.
"ოპერაციაში მონაწილეობდნენ ისრაელელი სამხედროები და ისრაელის ოფიციალური პირები. შეერთებულმა შტატებმა კი შეასრულა დამაკავშირებლის, კოორდინატორის როლი სკაკის ოჯახს, ასევე ისრაელისა და ეგვიპტის მთავრობებს შორის", - ამბობს აშშ-ის ხელისუფლების წარმომადგენელი.
როგორც Associated Press წყაროზე დაყრდნობით წერს, ზაჰრა და ფარიდი მებრძოლებით გარშემორტყმულ შენობაში იმყოფებოდნენ, ჰქონდათ მცირე რაოდენობით საკვები და ხშირ შემთხვევაში, საერთოდ საკვების გარეშე იყვნენ.
აღსანიშნავია, რომ როგორც ამერიკის შეერთებული შტატების სახელმწიფო დეპარტამენტში აცხადებენ, ამერიკის დაახლოებით 300 მოქალაქე, მათი ოჯახის წევრები, კვლავ რჩებიან ღაზაში და მათი სიცოცხლე საფრთხეშია.
ავტორი: ანრი კურტანიძე