ქვეყანა, რომელმაც კატასტროფის “შერბილება” შეძლო - რა ასწავლა იაპონიას მიწისძვრების საუკუნემ?
1-ლ იანვარს, იაპონიაში ძლიერი მიწისძვრების სერია მოხდა. ქვეყნის ცენტრალურ ნაწილში 30-მდე მიწისძვრა დაფიქსირდა 3,6 -დან 7,6-მდე მაგნიტუდის სიმძლავრის. აღსანიშნავია, რომ იაპონიისთვის ბუნებრივი კატასტროფები არც თუ ისე იშვიათი მოვლენაა.
ქვეყანაში მომხდარი ყველაზე დამანგრეველი მიწისძვრისა და ცუნამის შემდეგ თითქმის 13 წელი გავიდა:
ტოჰოკუს მიწისძვრა და ცუნამი - 8,9–9,0 მაგნიტუდის მიწისძვრა, რომელიც 2011 წლის 11 მარტის 14:46 საათზე მოხდა. მიწისძვრამ ცუნამი გამოიწვია - იაპონიაში ტალღები ხმელეთში 10 კილომეტრის მანძილზე შეიჭრა.
იაპონიის პოლიციის ეროვნულმა სააგენტომ ოფიციალურად დაადასტურა 14 063 ადამიანის გარდაცვალება, შემთხვევის შედეგად დაშავდა 4916ადამიანი, ხოლო 14 175 უგზო-უკვლოდ გაქრა.
მიწისძვრამ იაპონიას უმძიმესი ზარალი მიაყენა: მძიმედ დაზიანდა რკინიგზა და საავტომობილო გზები, დაინგრა რამდენიმე დამბა. 4.4 მილიონი საცხოვრებელი სახლი ჩრდილო-აღმოსავლეთ იაპონიაში ელექტროენერგიისა და წყლის გარეშე დარჩა. გაითიშა ენერგიის მრავალი გენერატორი, მათ შორის დადნა ორი ატომური სადგურის რეაქტორის აქტიური ზონა, რის გამოც მიახლოებული ტერიტორიებიდან მოსახლეობის ევაკუაცია განხორციელდა. მიწისძვრის შედეგად, აფეთქდა ფუკუშიმას ატომური სადგური; მიუხედავად გარე შენობის დანგრევისა, რეაქტორის დამცველი სარკოფაგი არ დაზიანებულა.
იაპონიას დიდი ზარალი მიადგა ორშაბათს მომხდარი მიწისძვრის შემდეგაც, თუმცა ქვეყანას კატასტროფის „შერბილება“ კარგად შეუძლია - იაპონიის ისტორიაში კიდევ ერთი დამანგრეველი მიწისძვრა 1923 წელს მოხდა. კანტოს მიწისძვრამ ქალაქში არსებული თითქმის ყველა შენობა დაანგრია.
ამ შედეგების გათვალისწინებით, იაპონიამ მდგრადი სამშენებლო კოდექსი შეადგინა, რომლის მიხედვითაც, ახალი შენობები ფოლადითა და ბეტონით უნდა გაემაგრებინათ. ფაქტი სახეზეა - ამდენმა მიწისძვრამ იაპონიას მასთან გამკლავების გზები ასწავლა:
2011 წელს არცერთი ძირითადი შენობა არ დანგრეულა. ძნელი წარმოსადგენია დედამიწაზე რომელიმე სხვა ქვეყანა, რომელსაც ბუნებრივ კატასტროფასთან ასე გამკლავება შეუძლია.