"თეატრალურზე მიფიქრია, მაგრამ იქ ჩაბარება არ მინდოდა. არ მქონდა ამის სურვილი" - როგორ ცხოვრობს ჩცდ-ს ჯეკო ეკრანს მიღმა და რას ჰყვება ეკრანული დის შესახებ

პოპულარული სერიალი "ჩცდ" დღეს კიდევ უფრო მეტად აქტუალურია. სერიალის ერთ-ერთი გმირი ჯეკო, რომელიც მაყურებელს ძალიან უყვარს ციხიდან გამოვიდა და სამართალმა იზეიმა. "ჩემი ცოლის დაქალების" ეს ეპიზოდი, სცენარი, მსახიობების შესრულება, რეჟისურა საზოგადოების განხილვის თემაა და ადამიანების უმეტესი ნაწილი დადებითად აფასებს.

Ambebi.ge-ს არქივში არის ჯეკოს როლის შემსრულებელთან, გიორგი ბარბაქაძესთან ინტერვიუ, სადაც გიორგიმ ეკრანს მიღმა ცხოვრების დეტალები გაგვიზიარა და სხვა საინტერესო თემებზეც გვესაუბრა.

• "ბიზნესისა და ტექნოლოგიების უნივერსიტეტში ბიზნესმენეჯმენტის მიმართულებით ვსწავლობ. უნივერსიტეტში მხოლოდ ერთხელ ვიყავი, ჩემი თანაკურსელები და ლექტორები პირისპირ ჯერ არც მინახავს" - ამბობს გიორგი ბარბაქაძე.

- შენი არჩევანი იყო, რომ "ბიზნესმენეჯმენტზე" გესწავლა?

- კი, ჩემი არჩევანი იყო, მაგრამ მისი არჩევაც ისე მოხდა, რომ არ ვიცოდი, რა ჩამეწერა იქ, სადაც ჩავწერე. ისე, ახლაც არ ვარ დარწმუნებული, მინდა, თუ არა ეს დარგი. ჯერ გამოვცდი, ვნახავ და ყველაფერს მივხვდები...

- ამდენწლიანი სამსახიობო გამოცდილების შემდეგ, თითქოს მოსალოდნელი იყო, რომ სწავლას თეატრალურ უნივერსიტეტში გააგრძელებდი. ამაზე არ გიფიქრია?

- "თეატრალურზე" მიფიქრია, მაგრამ იქ ჩაბარება არ მინდოდა. არ მქონდა ამის სურვილი. მინდოდა სხვა რამ მეცადა, რადგანაც სულ მსახიობი ხომ არ ვიქნებოდი?! ისე, "თეატრალურზე" ჩაბარება, ჯობიაო - ამას ბებია სულ მეუბნება.

- სერიალი, სადაც გაიზარდე, პოპულარული გახდი - რა არის შენთვის?

- პირველ რიგში, ჩემი კარიერა და პროფესიაა. ყველა იმ ადამიანთან, ვინც იქ გავიცანი, ვმეგობრობ. ეს სერიალი ჩემთვის მეორე ოჯახივითაა.

- გახსოვს კამერასთან მუშაობის პირელი დღე?

- როგორ არ მახსოვს... თუმცა მანამდე, სანამ სტუდიაში შევიდოდით, რომ მივედით, თავიდან დაცვასთან გავჩერდით, სადაც ასევე მოვიდა ჩემი ეკრანული და - ტასო და დედა - ნინო. მოკლედ, ერთმანეთი "ოჯახის წევრებმა" პირველად იქ ვნახეთ, ასე გავიცანით. მათთან ყველასთან ვმეგობრობ - უახლოესი ადამიანები არიან.

ტასო მაშინ 4 წლის იყო, მე - 9 წლის. ძალიან მარტივად გავუგეთ ერთმანეთს... ტექსტების დამახსოვრების პრობლემაც არასდროს გვქონია... შენიშვნაც არ დაგვიმსახურებია, უბრალოდ, როდესაც რეჟისორები რაღაცებს გვირჩევდნენ, ზუსტად იმას ვითვალისწინებდით, რასაც გვეუბნებოდნენ. ყოველთვის ჭკვიანები ვიყავით.

- ახლა ძველ სერიებში პატარა ჯეკოს რომ უყურებ, მოგწონს?

- ძალიან კარგია, კი, მომწონს...

- როდესაც ტასოს ვესაუბრე, მითხრა, ადრე, სულ თავიდან ეკრანზე ჩემს თავს ვერ ვუყურებდი და სერიალი რომ იწყებოდა, სხვა ოთახში გავდიოდიო. შენ?

- მე საერთოდ არ ვუყურებდი, არ მქონდა სურვილი, რომ მენახა, რატომ? ამაზე პასუხი არ მაქვს...

- შენს გმირს ბაბუის სახელი ჰქვია. სერიალში ამ როლს მსახიობი ლეო ანთაძე ასრულებს. როგორი ურთიერთობა გაქვს მასთან...

- ძალიან მიყვარს ლეო ანთაძე, კარგი კაცია. ისეთია, რომ დაინახავ და გაგიხარდება. ძალიან კარგი ადამიანი და პიროვნებაა. ეკრანულ ბებოზეც, მედიკო ლორთქიფანიძეზე იგივე შემიძლია გითხრათ...

- როგორ ფიქრობ, შენში რეჟისორებს და პროდიუსერებს რა მოეწონათ?

- ალბათ, ჩემი ბუნებრიობა...

- შენი პერსონაჟი თუ მოგწონს?

- კარგი ტიპია, მაგრამ ჩემგან განსხვავდება...

- სერიალის და სწავლის გარდა, დროს რას უთმობ, რა გატაცებები გაქვს?

- კიბერსპორტი მიტაცებს. ეს არის ვიდეოთამაშები, რომელსაც მეგობრებთან ერთად ვთამაშობ, მათთან ერთად ვერთობი, დროს ვატარებ და მინდა, ამას გავყვე კიდეც. ჯერ გამოცდილებას ვიღებ. 21-ე საუკუნეში ის ყველაზე პოპულარული და განთქმული ვიდეოთამაშებია. საქართველოში არ არის ისე განვითარებული, მაგრამ ყველაფერი წინაა. ამ საქმეში ბევრი ჩემი თანატოლია ჩართული, უმეტესობას ვიცნობ და არიან ისეთებიც, ვისაც არ ვიცნობ...

- პოპულარული რომ გახდი, შენს თანატოლებში რამე შეიცვალა?

- არაფერი. ისეთივე ურთიერთობა მაქვს, როგორიც მანამდე მქონდა.

წაიკითხეთ სრულად