"მე ზუსტად ვიცი, ყველა გადაცემას, რომელსაც დავკარგავ "საზოგადოებრივზე", ვნახავ სხვაგან, მაგრამ თავად საზოგადოებრივი პლატფორმის იდეა ძალიან კნინდება" - რას წერს ნინო ზაუტაშვილი?
ნინო ზაუტაშვილი, რომელიც წლებია "პირველ არხზე“ გადაცემის "რეალური სივრცე" წამყვანია, სოციალურ ქსელში დათო გორგილაძის საავტორო გადაცემის დახურვას ეხმაურება. როგორც ის წერს, ჯერ ზუსტად არ იციან, "გორგილაძის აუტანელი სიმსუბუქის“ გარდა, კიდევ რომელი გადაცემები შეეწირება ფინანსურ რეორგანიზაციას.
"ძალიან დიდი დანაკლისია საზოგადოებრივი მაუწყებლის მაყურებლისთვის. ყველა მთავრობა ერთი და იგივე გზას დაადგა, არაფრის დიდებით არ დათმოს გავლენა საზოგადოებრივზე. სამწუხარო ისაა, რომ ჯერ ზუსტად არ ვიცით, კიდევ რომელი გადაცემები შეეწირება ფინანსურ რეორგანიზაციას და ეს ყველაფერი იმ ფონზე, როცა პარლამენტში მსხდომებმა საკუთარი ხელფასის მომატებას ერთხმად მისცეს ხმა. მე ზუსტად ვიცი, ყველა გადაცემას, რომელსაც დავკარგავ საზოგადოებრივზე, ვნახავ სხვაგან, მაგრამ თავად საზოგადოებრივი პლატფორმის იდეა ძალიან კნინდება და მთელი გულით განვიცდი" - წერს ნინო ზაუტაშვილი.
გუშინ ცნობილი გახდა, რომ მომავალი წლიდან "საზოგადოებრივი მაუწყებლის" ეთერში აღარ გავა გადაცემა "გორგილაძის აუტანელი სიმსუბუქე". ეს ინფორმაცია დათო გორგილაძემ "რადიო თავისუფლებას" დაუდასტურა. გადაცემის წამყვანმა მედიასთან საუბრისას აღნიშნა, რომ არხის ხელმძღვანელობამ გადაცემის დახურვის მიზეზად ფინანსური რესტრუქტურიზაცია დაასახელა.
ნახეთ ასევე: