"ეს მთელი ოჯახისთვის შოკი იყო" - ბრიტანელი ბიჭი, რომელიც ექვსი წლის განმავლობაში დაკარგულად ითვლებოდა, საფრანგეთში იპოვეს

ბრიტანელი ბიჭი, რომელიც ექვსი წლის განმავლობაში დაკარგულად ითვლებოდა, საფრანგეთში იპოვეს. ალექს ბატი 2017 წელს გაუჩინარდა. იგი იმ დროს ესპანეთში დედასთან ერთად იმყოფებოდა. აღსანიშნავია, რომ ქალი შვილის კანონიერი მეურვე არ ყოფილა.

• გავრცელებული ინფორმაციით, ქუჩაში მარტო მოსიარულე ალექსი მძღოლმა, ფაბიენ აციდინმა შენიშნა და პოლიციის განყოფილებაში წაიყვანა.

ბიჭმა ბებიასთან დასაკავშირებლად ფაბიენის სოციალური ქსელი გამოიყენა და წერილი მისწერა: "გამარჯობა ბებო, ალექსი ვარ. საფრანგეთში, ტულუზში ვიმყოფები. დიდი იმედი მაქვს, რომ ამ შეტყობინებას მიიღებ. მიყვარხარ, მინდა სახლში დავბრუნდე" - ეწერა აღნიშნულ შეტყობინებაში.

რეგიონული ხელისუფლების წარმომადგენლების თქმით, ბატი საფრანგეთში, ოტ-გარონში, ქალაქ ტულუზის მახლობლად იპოვეს. ოჯახმა მოზარდის ვინაობა უკვე დაადასტურა და ის ინგლისში მალე დაბრუნდება.

"ძალიან ბედნიერი ვარ. მე მას უკვე ვესაუბრე. ამჟამად საფრანგეთშია. ეს მთელი ოჯახისთვის შოკი იყო" - განაცხადა ალექსის ბებიამ ჟურნალისტებთან საუბრისას. მისივე მტკიცებით, ალექსი დედამ, მელანი ბატიმ და ბაბუამ, დევიდ ბატიმ მაროკოში წაიყვანეს. მათ 2017 წლის 30 სექტემბერს ბავშვთან ერთად დატოვეს მანჩესტერი და ერთკვირიანი შვებულებისთვის ესპანეთში გაემგზავრნენ.

ალექსი ბოლოს იმავე წლის 8 ოქტომბერს, მალაგას პორტში ნახეს. მელანისა და დევიდის ადგილსამყოფელი დღემდე უცნობია...წყარო